އޮސްޓްރޭލިއާގެ ހައި ކޮމިޝަނެއް ދިވެހިރާއްޖޭގެ ގާއިމް ކުރުމަށް ނިންމައި މިއަދު އެ ގައުމުން ރަސްމީކޮށް އިއުލާނުކޮށްފި އެވެ.
އޮސްޓްރޭލިއާގެ ފޮރިން މިނިސްޓަރު މެރީސް ޕޭން މިއަދު ނެރުއްވި އިއުލާނެއްގައި ވިދާޅުވެފައި ވަނީ ރާއްޖޭގެ ވެރިކަން ހިންގާ ރަށް މާލޭގައި ހައި ކޮމިޝަނެއް ގާއިމް ކުރަން ނިންމީ "އިންޑިއާ ކަނޑުގެ މުހިންމު އަވައްޓެރި ގައުމަކާއެކު އިތުރަށް ގުޅުން ބަދަހިކުރުމަށް" ކަމަށެވެ.
"ހައި ކޮމިޝަން ބިނާ ކުރެވޭނީ އޮސްޓްރޭލިއާ އާއި ދިވެހިރާއްޖެއާ ދެކޭ ހަމަޖެހޭ، ރައްކާތެރި އަދި ކުރިމަތިވެދާނެ ނުރައްކަލަކުން ރައްކާވުމުގެ ގާބިލްކަން ހުރި އިންޑޯ ޕެސިފިކްއެއްގެ މައްޗަށް،" މެރީސް ވިދާޅުވެފައިވެ އެވެ.
"އޮސްޓްރޭލިއާގެ އާ ހަައި ކޮމިޝަނުގެ ފަރާތުން ދެ ގައުމުގެ ޑިމޮކްރެޓިކް އިދާރާތަކަށް އެހީތެރިކަން ފޯރުކޮށްދޭނެ. އަދި މަލްޓިލެރަލް ގުޅުންތައް އިތުރަށް ވަރުގަދަކޮށް ކޮމަންވެލްތާއި މި ސަރަހައްދުގެ އެހެން ޖަމާއަތްތަކާ އޮންނަ ގުޅުން ބަދަހި ކުރުމަށް ވެސް މަސައްކަތް ކުރާނެ،" މެރީސް ނެރުއްވާފައިވާ އިއުލާނުގައި ވިދާޅުވެފައިވެ އެވެ.
އޮސްޓްރޭލިއާގެ ހައި ކޮޮމިޝަން މާލޭގައި ގާއިމް ކުރުމުން އެއީ ރާއްޖޭގައި ގާއިމް ކުރެވޭ 10 ވަނަ ހައި ކޮމިޝަން ނުވަތަ އެމްބަސީ އެވެ. ބަންގްލަދޭޝް، ޗައިނާ، ޖަޕާން، އިންޑިއާ، ޕާކިސްތާން، ސައުދީ އަރަބިއްޔާ، އިނގިރޭސިވިލާތް، ސްރީ ލަންކާ އަދި ޔުނައިޓެޑް އެރެބް އެމިރޭޓްގެ ޑިޕްލލޮމޭޓުން ރާއްޖޭގައި ގާއިމްވެފައި މިހާރު ވެސް ތިބެ އެވެ.
