ރިޔާދް، ސައުދީ އަރަބިއްޔާ (ފެބްރުއަރީ 10) - ސައުދީ އަރަބިއްޔާ އާއި ޔަމަނު ގުޅޭ ބޯޑަރު ކައިރީގައިވާ އެއާޕޯޓަކަށް ހަމަލާ ދޭން ހޫތީ ހަނގުރާމަވެރިން ފޮނުވި ޑްރޯންއެއް ސައުދީ ސިފައިން ގޮއްވާލުމުން 12 މީހުންނަށް އަނިޔާވެއްޖެ އެވެ.
އަބްހާ އިންޓަނޭޝަނަލް އެއާޕޯޓުގެ މަތިން ޑްރޯން ގޮއްވާލުމުން ބަޔަކަށް އަނިޔާވީ އޭގެން ބުރައިގެން ދިޔަ ތަކެތީގެ ސަބަބުންނެވެ. މީގެ ކުރިން ހޫތީން ވަނީ އެތައް ފަހަރެއްގެ މަތިން އަބްހާ އެއާޕޯޓަށް ޑްރޯން ހަމަލާތައް ދީފަ އެވެ.
އިރާނުގެ ތާއީދާ އެކު އުޅޭ ހޫތީން ކުރި ޓްވީޓެއްގައި ދޭން އުޅުނު ހަމަލާގެ ޒިންމާ އުފުލުމަށް ފަހު ބުނީ އެއީ ޔަމަނާ ދެކޮޅަށް އަސްކަރީ ފިޔަވަޅު އަޅަން ބޭނުން ކުރާ އެއާޕޯޓެއް ކަމަށެވެ. އެފަދަ ތަންތަނާ ދުރުގައި ތިބުމަށް އާއްމުންނަށް ނަސޭހަތްދޭ ކަމަށް ވެސް ހޫތީން ބުންޏެވެ.
ޔަމަނުގެ ދާހިލީ ހަނގުރާމަ 2014 ވަނަ އަހަރު ފެށީ ގާނޫނީ ސަރުކާރާ ދެކޮޅަށް ހޫތީން ތެދުވެ، ވެރިރަށް ސަނާ ހިފުމުންނެވެ. އެއާއެކު ސަރުކާރުގެ އެދުމަށް ސައުދީ އަރަބިއްޔާގެ އަސްކަރީ ކޯލިޝަނަކުން ހަނގުރާމައިގެ ތެރެއަށް ވަނެވެ.
އެހެންވެ، ހޫތީން އަންނަނީ ބޯޑަރު ހުރަސްކޮށް ސީދާ ސައުދީ އަރަބިއްޔާގެ ފަސްގަނޑަށް ވެސް ހަމަލާ އަމާޒު ކުރަމުންނެވެ. ފަހަކަށް އައިސް، ސައުދީގެ އިތުރުން އަސްކަރީ ކޯލިޝަނުގައި ހިމެނޭ ޔޫއޭއީއާ ދެކޮޅަށް ވެސް ހޫތީން ދަނީ އެފަދަ ހަމަލާތައް ދެމުންނެވެ.
ސައުދީ އަރަބިއްޔާއިން ބުރާސްފަތި ދުވަހު ބުނީ ޑްރޯން ހަމަލާ ހުއްޓުވުމުން އަނިޔާވީ 12 އާއްމު ރައްޔިތުންނަށް ކަމަށެވެ. އޭގެ ތެރޭގައި ބަންގްލަދޭޝް، އިންޑިއާ، ނޭޕާލް، ފިލިޕީންސް އަދި ސްރީލަންކާގެ ރައްޔިތުންނާއި ސައުދީ އަރަބިއްޔާގެ ދެ މީހުން ހިމެނެ އެވެ.
ސައުދީ އަސްކަރީ ކޯލިޝަނުން ބުނީ އެކަމުގެ ބަދަލު ހިފަން ހޫތީންނާ ދެކޮޅަށް ހަމަލާ ދޭނެ ކަމަށެވެ. އެހެންވެ، ހޫތީންގެ އަސްކަރީ ބޭނުމަށް ސަނާގައި ހުންނަ މަރުކަޒުތަކާ ދުރުގައި 72 ގަޑިއިރު ވަންދެން އާއްމުން ތިބުމަށް އެދިފައިވެ އެވެ.
