ބެންކޮކް، ތައިލޭންޑް (ފެބްރުއަރީ 10) - ޖަރުމަނުގެ ގައުމީ ފުޓްބޯޅަ ޓީމާ އެކު ފީފާ ވޯލްޑު ކަޕް ތަށި ހާސިލްކޮށްފައިވާ މެޓް ހަމެލްސްގެ އަންހެނުންނަށް ތައިލޭންޑުގެ ގޮނޑުދޮށެއްގައި ހަމަލާ ދީފި އެވެ.
ޖަރުމަނުގެ ބިލްޑް ނޫހަށް ކޭތީ ހަމެލްސް ބުނީ އޭނާއަށް ހަމަލާ ދިނީ މަސައްކަތް ނިންމުމަށް ފަހު ގޮނޑުދޮށުގައި ހިނގާލަން ގޮސް އުޅެނިކޮށް މިދިޔަ ހޮނިހިރު ދުވަހު ކަމަށެވެ.
ކޭތީ މަސައްކަތް ކުރަނީ ޓީވީ ޝޯ "ބެޓްލް އޮފް ދަ ރިއެލިޓީ ސްޓާޒް" ގެ ޕްރެޒެންޓަރެއްގެ ގޮތުގަ އެވެ. އުމުރުން 34 އަހަރުގެ ކޭތީ އާއި ބޮރޫޝިއާ ޑޯޓްމަންޓްގެ ޑިފެންޑަރު އުޅެނީ 2015 ވަނަ އަހަރުން ފެށިގެން ކައިވެނިކޮށްގެންނެވެ. ނަމަވެސް އެ ދެ މީހުންގެ މެދުގައި މައްސަލަ ޖެހި، ދިރިއުޅެނީ ވަކިންނެވެ.
އޭނާ ބުނީ މީހަކު އައިސް މަސައްކަތް ކުރީ ފޭރެން ކަމަށާއި ވަރަށް ގިނަ ފަހަރު ޖަހައި، އަނިޔާ ކުރަން ފެށުމުން މޮބައިލް ފޯނު ދިނީ ކަމަށެވެ.
ކޭތީ އިންސްޓަގްރާމުގައި އޭނާގެ 665،000 ފޮލޯވަރުން ކައިރީގައި ބުނީ އެ ހާދިސާ ހިނގަމުން ދިޔަ ވަގުތު އޭނާ ވިސްނީ ދަރިފުޅު ލުޑްވިގްއާ މެދު ކަމަށެވެ. އެ ހާދިސާ ދިމާވި ނަމަވެސް، ތައިލޭންޑަކީ ރަނގަޅު ގައުމެއް ކަމަށް އޭނާ ބުންޏެވެ.
ތައިލޭންޑުގެ ދެކުނުގައި މަސައްކަތް ކުރާ ފުލުހުންގެ އިސް ކޮމާންޑަރު އަމްފޮން ބުއަރުއްޕޯން ފޭސްބުކް މެދުވެރިކޮށް ވިދާޅުވީ ފަންގް ނާ ޕްރޮވިންސްގެ ގޮނޑުދޮށެއްގައި ޖަރުމަނު ރައްޔިތަކަށް ހަމަލާދީ، އައިފޯނު ފޭރުނު ކަމަށެވެ.
