ވެލިންގްޓަން، ނިއުޒީލޭންޑް (ފެބްރުއަރީ 10) - ނިއުޒީލޭންޑްގެ ޕާލިމެންޓް އިމާރާތް ހުންނަ ބިމުގައި މުޒާހަރާ ކުރަމުންދާ މީހުންނާއި ފުލުހުންނާ ދެމެދު ބުރާސްފަތު ދުވަހު ކުރިމަތިލުންތައް ހިނގައިފި އެވެ.
މީގެ ތިން ދުވަހު ފެށި މުޒާހަރާގައި އަޑު އުފުލަމުން ދަނީ ކޮވިޑް ވެކްސިން ޖެހުން މަޖުބޫރު ކުރުމާ ދެކޮޅަށެވެ. ޕާލިމެންޓަށް ދެވެން އޮންނަ މަގުތައް ބަންދު ކުރުމަށް ފަހު، މުޒާހަރާގެ ބައިވެރިން ވަނީ ޕާލިމެންޓް އިމާރާތް ހުންނަ ބިމުގައި ކޭމްޕު ޖަހައިފަ އެވެ.
އެ ސަރަހައްދުން ކޭމްޕު ރޫޅާލައި މުޒާހަރާގެ ބައިވެރިން ފޮނުވާލުމަށް ފުލުހުން މަސައްކަތް ފެށުމާ އެކު މުޒާހަރާގެ ބައިވެރިން ވަނީ ފުލުހުންނާ ދެކޮޅަށް ސަފު ހަދައިގެން ތިބުމަށް ގޮވައި، އަޑުގަދަކޮށްފަ އެވެ. ފާއިތުވި ދެ ދުވަހު މުޒާހަރާއާ ދެކޮޅަށް ފުލުހުން އެއްވެސް ފިޔަވަޅެއް ނާޅަ އެވެ.
ނަމަވެސް ބުރާސްފަތި ދުވަހުގެ ހެނދުނު މުޒާހަރާ ރޫޅާލާނެ ކަމަށް ލައުޑްސްޕީކަރުން ގޮވުމަށް ފަހު، ފުލުހުން އިންޒާރު ދިނީ ޕާލިމެންޓު އިމާރާތުގެ ބިމުގައި ކޭމްޕު ޖަހައިގެން ތިބި 150 އެއްހާ މީހުން އެތަނުން ނުގޮސްފި ނަމަ ހައްޔަރު ކުރާނެ ކަމަށެވެ.
އޭގެ ފަހުން މުޒާހަރާގެ ބައިވެރިން ވަނީ ފުލުހުންނަށް ހަމަލާދީ، އަނިޔާކޮށް "މިއީ ޑިމޮކްރަސީއެއް ނޫން" ކަމަށް ބުނެ އަޑު އުފުލާފަ އެވެ.
އަންގާރަ ދުވަހު ނިއުޒީލޭންޑުގައި މުޒާހަރާ ފެށީ، ކެނެޑާގައި ކޮވިޑް ވެކްސިނާ ދެކޮޅަށް ޓްރަކް ދުއްވާ މީހުން ކުރަމުންދާ "ފްރީޑަމް ކޮންވޯއި" މުޒާހަރާ ނަމޫނާއަކަށް ބަލައިގެންނެވެ. ކެނެޑާގައި ވެސް މުޒާހަރާގެ ބައިވެރިން ވަނީ ވެރިރަށް އޮޓާވާގެ މަގުތައް ބަންދުކޮށް، ސިޓީ ހުއްޓުމަކަށް ގެނެސްފަ އެވެ.
ނިއުޒީލޭންޑުގެ މުޒާހަރާއަށް ދިޔަ ގިނަ މީހުން 24 ގަޑިއިރު ފަހުން އެނބުރި ގެތަކަށް ދިޔަ އެވެ. ނަމަވެސް ބައެއް އެކްޓިވިސްޓުން ބުނީ ސަރުކާރުން ދޫ ނުދޭ ނަމަ އެ މީހުން ގެޔަށް ނުދާނެ ކަމަށެވެ.
ޑެޕިއުޓީ ބޮޑު ވަޒީރު ގްރާންޓް ރޮބަޓްސަން ވިދާޅުވީ މުޒާހަރާގެ ސަބަބުން އާއްމުންނަށް އުނދަގޫވާކަމުގެ ޝަކުވާތައް އިތުރުވެފައި ވާތީ، ފުލުހުން އެކަމާ ދެކޮޅަށް ފިޔަވަޅު އެޅުމަށް ގޮވާލާ ކަމަށެވެ.
"ސިޓީގެ މަގުތައް ހުރީ ބަންދުވެފައި. ވިޔަފާރިތައް ނުހިންގޭ. މީހުން ތިބީ މުޒާހަރާގެ ބައެއް ބައިވެރިން ދެކެ ބިރުން،" ރޭޑިއޯ ނިއުޒީލޭންޑަށް ދެއްވި އިންޓަވިއުގައި ރޮބަޓްސަން ވިދާޅުވި އެވެ.
ވެލިންގްޓަން ފުލުހުންގެ ކޮމާންޑަރު ސުޕްރިންޓެންޑެންޓް ކޮރީ ޕާނެލް ވިދާޅުވީ މުޒާހަރާ ރޫޅާލުމަށް އެހެން ސިޓީތަކުން އިތުރު 100 ފުލުހުން ގެންނަން ޖެހުނު ކަމަށެވެ.
"މުޒާހަރާގެ ކުރުމުގެ ހައްގު އާއްމުންނަށް އެބަ އޮތް ކަމަށް ފުލުހުން ގަބޫލުކުރޭ. އެކަމަކު މިކަން ކުރަން ޖެހޭނީ މުޖުތަމައުގެ އެހެން މީހުންނަށް އުނދަގޫ ނުވާ ގޮތަށް،" އޭނާ ވިދާޅުވި އެވެ.
ނިއުޒީލޭންޑްގައި ވަކި ދާއިރާތަކެއްގެ މުވައްޒަފުން ކޮވިޑް ވެކްސިން ޖެހުން މަޖުބޫރެވެ. އެއީ ސިއްހީ ދާއިރާ، ގާނޫނު ތަންފީޒު ކުރުމުގެ ދާއިރާ، ތައުލީމީ ދާއިރާ އަދި ދިފާއީ ދާއީރާ އެވެ.
އޭގެ އިތުރުން ވެކްސިން ޖަހާފައިވާ ކަމުގެ ހެކި ދައްކައިގެން ނޫނީ ރެސްޓޯރެންޓްތަކާއި، ކުޅުވަރި ހޯލްތަކާއި، ދީނީ އަޅުކަން ކުރިއަށްދާ ތަންތަނަށް ވެސް އާއްމުންނަށް ނުވަދެވެ އެވެ.
