ކޮލޮމްބޯ، ސްރީލަންކާ (ފެބްރުއަރީ 9) - އެމެރިކާގެ ރީތީގެ މުބާރާތުން އެއް ވަނަ ނުލިބުނީ ކޮރަޕްޝަނާ ހެދި ކަމަށް ތުހުމަތު ކުރި ސްރީލަންކާގެ ރީތީގެ ރާނީގެ ތާޖު އަތުލައިފި އެވެ.
ޕުޝްޕިކާ ޑެ ސިލްވާގެ ވާހަކަ އެންމެ ފުރަތަމަ ނޫސްތަކަށް އެރީ މިދިޔަ އަހަރު އޮތް "މިސިސް ސްރީލަންކާ" މުބާރާތުން އެއް ވަނަ ހޯދި ނަމަވެސް، އޭނާގެ ޝަރުތު ހަމަނުވާ ކަމަށް ބުނެ ސްޓޭޖް މަތީގައި ތާޖު އަތުލުމުންނެވެ.
ސޯޝަލް މީޑިއާގައި ކުރި ޕޯސްޓުތަކެއްގައި ޑެ ސިލްވާ ބުނީ ލަސް ވޭގަސްގައި މިދިޔަ މަހު އޮތް "މިސިސް ވޯލްޑް" މުބާރާތުގެ ތާޖު އޭނާއަށް ނުލިބުނީ ފަނޑިޔާރުންނަށް ނުފޫޒު ފޯރާފައިވާތީ ކަމަށެވެ.
"މިސިސް ވޯލްޑް" އަކީ ކައިވެނިކޮށްގެން އުޅޭ އަންހެނުންގެ ތެރެއިން ރީތީގެ ރާނީ ހޮވަން ބާއްވާ ބައިނަލްއަގްވާމީ މުބާރާތެވެ. މި އަހަރުގެ މިސިސް ވޯލްޑަކީ އެމެރިކާގެ ޝެއިލީން ފޯޑް އެވެ.
"މިސިސް ސްރީލަންކާ" އިންތިޒާމް ކުރާ ފަރާތުން ބުނީ ޑެ ސިލްވާގެ ތުހުމަތުގެ ސަބަބުން ބައިނަލްއަގްވާމީ މުޖުތަމައުގައި ގައުމުގެ އަގު ވެއްޓިފައިވާ ކަމަށެވެ.
އެހެންވެ، އޭނާއަށް ދީފައިވާ މިސިސް ސްރީލަންކާ ލަގަބު އަތުލައި، އެއްވެސް ހަރަކާތެއްގައި އޭނާއަކީ މިސިސް ސްރީލަންކާގެ ގޮތުގައި ޕްރޮމޯޓް ކުރުން މަނާވާނެ ކަމަށެވެ.
ޑެ ސިލްވާއަށް މިސިސް ސްރީލަންކާ ތާޖު ލިބުނީ މިދިޔަ އޭޕްރިލް މަހު އެވެ. ނަމަވެސް އޭގެ ކުރީ އަހަރުގެ ރީތީގެ ރާނީ ކެރޮލީން ޖޫރީ، ޑެ ސިލްވާގެ އަތުން ސްޓޭޖް މަތީގައި ތާޖު އަތުލި އެވެ.
ޖޫރީ އާއި އެހެން އަންހެނަކަށް ހަމަލާ ދިނުމާއި ގެއްލުން ދިނުމުގެ ދައުވާ ވަނީ އުފުލާފަ އެވެ. ޑެ ސިލްވާގެ އަތުން ތާޖު އަތުލީ އޭނާއަކީ ވަރިވެފައި ހުރި މީހެއް ކަމަށް ބުނެ އެވެ. ނަމަވެސް ޑެ ސިލްވާ ބުނީ އޭނާ ފިރިމީހާއާ ވަކިން ދިރިއުޅުނު ނަމަވެސް، ވަރިނުވާ ކަމަށެވެ.
