ކުށްތަކުގައި ހައްޔަތު ކުރެވޭ ކުދިންނަށް ކުރާ ޖިނާއީ ދައުވާތަކުގެ މައްސަލަތައް މަތީ މަރުހަލާގެ ކޯޓެއްގައި އިސްތިއުނާފްކޮށްފިނަމަ ހަ މަސް ދުވަސް ތެރޭގައި ނިންމުމަށް އަންގާ ސުޕްރީމް ކޯޓުން ގަވާއިދެއް އެކުލަވާލައިފި އެވެ.
މިމަހުގެ 22 ވަނަ ދުވަހު ފެށިގެން އަމަލުކުރަން ލާޒިމްކުރާ އެ ގަވާއިދަކީ ކުޑަކުދިންގެ އަދުލުގެ ގާނޫނުގެ ދަށުން ކުޑަކުދިންނަށް ކުރާ ޖިނާއީ ކުށުގެ މައްސަލަތައް އިސްތިއުނާފް މަރުހަލާގައި ބެލުމުގައި އަމަލު ކުރާނެ ގޮތުގެ ގަވާއިދެވެ.
އެ ގަވާއިދުގައިވާ ގޮތުން ޝަރީއަތް ކުރިއަށް ގެންދިއުމުގައި ދިމާވާ ހުރަހެއްގެ ސަބަބުން ނަމަވެސް އެ މުއްދަތުގެ ތެރޭގައި މައްސަލަ ނުނިންމޭނަމަ، އެކަން ކުއްޖާގެ ބެލެނިވެރިޔާއާއި، ޑިޕާޓްމަންޓް އޮފް ޖުވެނައިލް ޖަސްޓިސްއަށްވެސް އަންގަން ޖެހެ އެވެ.
ދަށުކޯޓުގެ އަމުރެއް، ނުވަތަ ނިންމުމެއް މަތީ މަރުހަލާގެ ކޯޓެއްގައި އިސްތިއުނާފްކޮށްފި ނަމަ ހަތް ދުވަސްތެރޭ އެކަމުގައި ގޮތެއް ކަނޑައެޅުމަށްވެސް އެ ގަވާއިދުގައި އަންގާފައި ވެއެވެ. އަދި ކުޑަކުދިންނާ ގުޅޭ މައްސަލަތައް ނިންމުމަށްފަހު، ލިޔުމަށް ތިރިކުރާއިރު، އެކުދިންނަށް ދޭހަވާނެ ފަދަ އިބާރާތްތައް ބޭނުންކުރުމަށްވެސް އިރުޝާދު ދީފައި ވެއެވެ.
"...ކޮންމެހެން ބޭނުންކުރަން ޖެހޭ ހާލަތުގައި އެ ނޫން އިބާރާތެއް ނެތިގެން މެނުވީ ބޮޑެތި މީހުންގެ މައްޗަށް ޝަރީއަތް ކުރާއިރު ބޭނުންކުރާ ފަދަ އިބާރާތްތައް ކުޑަކުދިންނާ ގުޅޭ ގޮތުން ބޭނުންކޮށްގެން ނުވާނެ،" ސުޕްރީމް ކޯޓުން ނެރުނު ގަވާއިދުގައި ވެެއެވެ.
އޭގެ އިތުރުން، އެކަށީގެންވާ އަވަސް މިނެއްގައި ޝަރީއަތް ފެށުމަށާއި، އިސްލާމް ދީނުގައި ހައްދު އަދި ގިސޯސް ކަނޑައެޅިފައިވާ ކުށެއްގެ ޝަރީއަތް، ކުއްޖާގެ ކަރާމާތަށް އެއްވެސް އުނިކަމެއް ނާންނާނެ ގޮތެއްގެ މަތިން ކުރިއަށް ގެންދާނެ ގޮތުގެ އިރުޝާދު ވެސް ސުޕްރީމް ކޯޓުން ދީފައި ވެއެވެ.
"ކުޑަކުއްޖެއްގެ މައްޗަށް ހިންގޭ ޒިނޭގެ ކުށެއްގެ ޝަރީއަތެއްގައި، ތުހުމަތު ކުރެވިފައިވާ ކުށުގައި އެކުލެވޭ ބަދުއަހްލާގީ އަމަލުތަކުގެ ތަފްސީލުތައް ޝަރީއަތުގެ މަޖިލީހުގައި ތަކުރާރުކޮށް ދެއްވުމާއި ނުވަތަ ގަސްދުގައި ލަދުވެތިކަން ނުވަތަ ބިރުވެރިކަން އިހުސާސްކުރުވުމުގެ މަގްސަދުގައި ކުއްޖާއާ ސުވާލު ނުކުރުމާއި އެފަދަ ގޮތެއްގައި މުހާތަބު ނުކުރުން." ޝަރީއަތް ކުރުމުގައި ކުޑަކުދިންނާ ރައްޓެހި ނިޒާމެއް ގާއިމްކުރުމަށް އެ ގަވާއިދުގައި ބާރު އަޅާފައި ވެއެވެ.
ކުޑަކުދިންގެ އަދުލުގެ ގާނޫނުގައި ވެސް ގިނަވެގެން ހަ މަސް ދުވަސްތެރޭ އެ ކުދިންނަށް ކުރާ ޖިނާއީ މައްސަލަތަކުގެ ޝަރީއަތް ނިންމުމަށް ބާރު އަޅަ އެވެ.
