ވެލިންގްޓަން، ނިއުޒީލޭންޑް (ފެބްރުއަރީ 8) - ކެނެޑާގައި ކޮވިޑްގެ ގަވާއިދުތަކާ ދެކޮޅަށް ކުރަމުންދާ މުޒާހަރާ ނަމޫނާއަކަށް ބަލައި، ނިއުޒީލޭންޑްގެ ޕާލިމެންޓަށް ދެވެން އޮންނަ މަގުތައް ބަންދުކޮށް މުޒާހަރާ ކުރަން ފަށައިފި އެވެ.
"ދަ ބީހައިވް"ގެ ނަން ދީފައިވާ ޕާލިމެންޓް އިމާރާތަށް ދެވެން އޮންނަ މަގުތަކުގައި އުޅަނދުތައް ޕާކުކޮށްގެން، މުޒާހަރާގެ ބައިވެރިން އަޑު އުފުލަމުން ދަނީ ވެކްސިން ޖަހަން މަޖުބޫރު ކުރާ ކަމަށް ބުނެ އެވެ. ވެލިންގްޓަންގެ ސިޓީ ސެންޓަރުގައި ވެސް އުޅަނދުތަކުން އަޑު ގަދަ ކުރަމުން އެތައް ސަތޭކަ ބަޔަކު ދުއްވި އެވެ.
ސިޓީ ސެންޓަރުގައި މުޒާހަރާގެ ލީޑަރުން ވާހަކަދައްކަމުން ދިޔަ އިރު، އެ ވާހަކަތަކަށް ތާއީދު ކުރާ ހާހަކަށް ވުރެ ގިނަ މީހުން ތިބީ ކައިރީގައި އަޑުއަހަން މަޑުކޮށްގެންނެވެ.
މުޒާހަރާގެ ބައިވެރިންގެ ތެރޭގައި ވެކްސިން ފުރިހަމަކޮށްފައި ތިބި ބައެއް މީހުން ވެސް އުޅުނެވެ. ނަމަވެސް އެ މީހުން ބުނީ ވެކްސިން ޖަހަން މަޖުބޫރު ކުރުމަކީ ބަލައިގަންނާނެ ނިންމުމެއް ނޫން ކަމަށެވެ.
ސުލްހަވެރިކަމާ އެކު މުޒާހަރާ ކުރިއަށް ދިޔަ އިރު، ފުލުހުން ބުނީ އެއްވެސް މީހަކު ހައްޔަރު ނުކުރާ ކަމަށެވެ.
ބޮޑު ވަޒީރު ޔެސިންޑާ އާޑޭން ވިދާޅުވީ މުޒާހަރާގެ ބައިވެރިންނާ މަޝްވަރާ ކުރުމުގެ ވިސްނުމެއް ނެތް ކަމަށާއި ނިއުޒީލޭންޑްގެ މެޖޯރިޓީ މީހުން ތާއީދު ކުރަނީ ސަރުކާރުގެ ނިންމުމަށް ކަމަށެވެ.
"ނިއުޒީލޭންޑްގެ 96 ޕަސެންޓް މީހުން އެ ވަނީ ވެކްސިން ޖަހާފައި. އޭގެ ސަބަބުން ފިޔަވަޅުތަކަށް ލުއިދޭން މަގުފަހިވެއްޖެ،" ރޭޑިއޯ ނިއުޒީލޭންޑަށް އެކަމަނާ ވިދާޅުވި އެވެ.
ނިއުޒީލޭންޑްގައި ވަކި ދާއިރާތަކެއްގެ މުވައްޒަފުން ކޮވިޑް ވެކްސިން ޖެހުން މަޖުބޫރެވެ. އެއީ ސިއްހީ ދާއިރާ، ގާނޫނު ތަންފީޒު ކުރުމުގެ ދާއިރާ، ތައުލީމީ ދާއިރާ އަދި ދިފާއީ ދާއީރާ އެވެ.
އޭގެ އިތުރުން ވެކްސިން ޖަހާފައިވާ ކަމުގެ ހެކި ދައްކައިގެން ނޫނީ ރެސްޓޯރެންޓްތަކާއި، ކުޅުވަރި ހޯލްތަކާއި، ދީނީ އަޅުކަން ކުރިއަށްދާ ތަންތަނަށް ވެސް އާއްމުންނަށް ނުވަދެވެ އެވެ.
