ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވި ފަސް އަހަރުގެ ޖަލު ހުކުމް ސުޕްރީމް ކޯޓުން ބާތިލް ކުރުމުން ރައްޔިތުންގެ މަޖިލީހުގެ އިއްޔެގެ ޖަލްސާގައި މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕީޖީ ލީޑަރު އަލީ އާޒިމް ފާޑު ވިދާޅުވެފައިވާތީ އޭނާގެ މައްސަލަ ސުޕްރީމް ކޯޓަށް ވެއްދުމުގެ މަސައްކަތް އިދިކޮޅު ކޯލިޝަނުން ފެށީ އިއްޔެ އެވެ.

ޔާމީންގެ މައްޗަށް ކްރިމިނަލް ކޯޓުން އިއްވި ފަސް އަހަރުގެ ޖަލު ހުކުމް ބާތިލް ކުރުމަށް ސުޕްރީމް ކޯޓުން އިއްވި ހުކުމް ބަލައި ނުގަނެވޭނެ ކަމަަށް އިއްޔެގެ ޖަލްސާގައި އާޒިމް ވިދާޅުވި އެވެ. އަދި ޔާމީންގެ މައްޗަށް އުފުލާފައިވާ ޖިނާއީ ދައުވާތައް އެމަނިކުފާނުގެ މައްޗަށް ސާބިތުވާ ކަމަށް ކަނޑައަޅައި ހުކުމްނުކޮށްފި ނަމަ "ވަކިކުރަން ޖެހޭ ކޮންމެ ބައެއް" ވަކި ކުރާނެކަމުގެ އިންޒާރުވެސް އޭނާ އިއްޔެ ދެއްވި އެވެ.

އެ ކަމާ ގުޅިގެން ޔާމީން ލީޑް ކުރައްވާ އިދިކޮޅު ޕްރޮގްރެސިވް ކޯލިޝަނުން ނެރެފައިވާ ބަޔާނުގައި ވަނީ އެ ވާހަކަތައް ކުށްވެރިކޮށް، އެއީ ޝަރުއީ ދާއިރާއަށް ނުފޫޒު ފޯރުވުމުގެ އަމަލެއް ކަމަށް ބުނެފަ އެވެ. އަދި ސުޕްރީމް ކޯޓުގެ ހުކުމަށް ކުޑައިމީސްކޮށް، އާޒިމް ވާހަކަދެއްކުމުން، އެ ކޯޓުގެ ހުރުމަތް ކަނޑައިލި މައްސަލަ ހުށަހަޅާނެ ކަމަށް ވެސް އެ ބަޔާނުގައި ވެއެވެ.

"...އާޒިމް ޖުޑީޝަރީއަށް ފާޑު ކިޔާ، ނުފޫޒު ފޯރުވާ، ފަނޑިޔާރުންނަށް ބިރު ދެއްކުމުގެ ގޮތުން ފަނޑިޔާރުން ވަކި ކުރާނެ ކަމަށް ބުނެ މިއަދު މަޖިލީހުގައި ދެއްކި ވާހަކަތައް އެންމެ ހަރުކަށި އިބާރާތުން ކުށްވެރިކުރަމެވެ. މި މައްސަލަ ބައްލަވާ ފިޔަވަޅު އަޅުއްވައިދެއްވުން އެދި ސުޕްރީމް ކޯޓަށް މި މައްސަލަ ހުށަހެޅުމުގެ މަސައްކަތް މި ކޯލިޝަނުން ކުރިއަށް ގެންދާ ވާހަކަވެސް ދެންނެވީމެވެ." ޕީޕީއެމް, ޕީއެންސީ ހިމެނޭ އިދިކޮޅު ކޯލިޝަނުން އިއްޔެ ނެރުނު ބަޔާނުގައި ވެއެވެ.

އާޒިމް ވިދާޅުވީ ކީކޭ؟

ދައުލަތުގެ ގިނަ އަދަދެއްގެ ފައިސާ ޔާމީނުގެ އެކައުންޓުގައި ހުރި ކަމަށް ފަނޑިޔާރުންގެ ބެންޗުން އިއްތިފާގުވުމަށްފަހު ވެސް ކުށް ސާބިތުނުވުން ބަލައިނުގަނެވޭނެ ކަމަށް އިއްޔެ ޖަލްސާގައި އާޒިމް ވިދާޅުވި އެވެ.

"އެފަދަ ކަންކަން ވެގެން ދާއިރުގައި، ބޮޑެތިު ކޯޓްތަކުން ކަންކަން ނިންމާއިރުގައި އެބަ ބަލައިލަން ޖެހޭ، މިއީ ހަމަ ހަގީގަތުގައި ވެސް ދައުލަތުގެ ފައިސާ އަޅުގަނޑުމެން އަޖައިބުވާ ވަރަށް، އިންތިހާއަށް އަޖައިބުވާ ވަރަށް ނަގައި އެކައުންޓަށް ލާފައި ހުރި މީހަކު ހަމަ ދޫކޮށްލަންވީތޯ، މާލެތެރެއަށް ދޫކޮށްލައިގެން ދޭތެރޭ ގައުމާ ދޭތެރޭ ޖައްސަމުން ބޭނުން ރަށަކަށް އަރަމުންދާން ފުރުސަތު ދޭންވީތޯ،" އާޒިމް އިއްޔެ ވިދާޅުވި އެވެ.

އާޒިމް ވަނީ ޔާމީން "ހުއްޓުވުމަށް" ރައްޔިތުން ބޭނުންވާ ކަމަށާއި ފަނޑިޔާރުން އެކަންނުކޮށްފި ނަމަ އެއީ ޖުޑީޝަލް ސާވިސް ކޮމިޝަނުގެ މެމްބަރުން ވެސް ވަކި ކުރަންޖެހިދާނެ ކަމުގެ އިންޒާރު ވެސް ދެއްވާފަ އެވެ.

"ރައްޔިތުން ބުނީ އަޅުގަނޑުމެން އެކަން ހުއްޓުވާށޭ. ފަނޑިޔާރުން އެކަން ނުކޮށްފިއްޔާ އަޅުގަނޑުމެން މިތިބީ އަޅުގަނޑުމެން ވަކިކުރަން ޖެހޭ ކޮންމެ ބައެއް ވަކިކުރަން ނުކުމެ ތައްޔާރަށް،" އާޒިމް ވިދާޅުވެފައިވެ އެވެ.

އާޒިމް ވަނީ ޔާމީނު ދޫކޮށްލާފައި ބެހެއްޓުމަކީ އެއްވެސް ރައްޔިތަކު ގަބޫލުކުރާނެ ކަމެއް ނޫން ކަމަށާއި ފަނޑިޔާރުންނާއި ޖުޑިޝަލް ސާވިސް ކޮމިޝަނުން ވެސް ވިސްނާ ފިކުރުކުރަން ޖެހޭ ކަމެއް ކަމަށް ވެސް އިއްޔެގެ ޖަލްސާގައި ވިދާޅުވެފަ އެވެ.

ބައެއް މުހިންމު ހަބަރުތައް

• ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓު ހަމަލާ ދިން ކަމުގެ ތުހުމަތުކޮށް، ކްރިމިނަލް ކޯޓުގައި ދައުވާ އުފުލާފައިވާ މީހުންގެ ޝަރީއަތްތައް ލަސްވާތީ، އެ މައްސަލައަށް ފާރަވެރިވުމަށް ރައިސުލްޖުމްހޫރިއްޔާ އައްޔަންކުރެއްވި އިނގިރޭސިވިލާތުގެ މަންދޫބު، އައްބާސް ފާއިޒް ކަންބޮޑުވުން ފާޅު ކުރެއްވީ އިއްޔެ އެވެ.

• "އިންޑިއާ އައުޓް" ކެމްޕޭނާ މެދު ކަންބޮޑުވުން ފާޅުކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހެޅުއްވި މައްސަލަ ފުޅާ ދާއިރާއެއްގައި ބަލަން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) ގެ މެމްބަރުން ގިނަ ހުށަހެޅުންތަކެއް އިއްޔެގެ ކޮމިޓީ ބައްދަލުމަށް ވަނީ ހުށަހަޅުއްވާފަ އެވެ.

• މަތީ ތައުލީމް ހާސިލްކުރަން ދޫކުރާ ލޯނުގެ އެޑްމިިނިސްޓްރޭޓިވް ފީގެ ގޮތުގައި ނަގަމުން އަންނަ އިންޓްރެސްޓު އެއް ޕަސެންޓަށް ކުޑަކޮށް، 720 ލޯނުގެ ފުރުސަތަށް ހުޅުވާލީ އިއްޔެ އެވެ.

ދުވަހުގެ ކޯޓޭޝަން

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓު ހަމަލާ ދިން ކަމުގެ ތުހުމަތުކޮށް، ކްރިމިނަލް ކޯޓުގައި ދައުވާ އުފުލާފައިވާ މީހުންގެ ޝަރީއަތްތައް ލަސްވާތީ، އެ މައްސަލައަށް ފާރަވެރިވުމަށް ރައިސުލްޖުމްހޫރިއްޔާ އައްޔަންކުރެއްވި އިނގިރޭސިވިލާތުގެ މަންދޫބު، އައްބާސް ފާއިޒް ވިދާޅުވީ:

"މެއި މަހުގެ ހަ ވަނަ ދުވަހުގެ ހަމަލާގައި ތުހުމަތު ކުރެވޭ ފަރާތުގެ ޝަރީއަތް މިހާރު ލަސްވުމަކީ ނުހަނު ކަންބޮޑުވާ ކަމެއް. އެ ދައުވާތައް އުފުލި ފަހުން މަސްތަކެއް ފާއިތުވެގެން ހިނގައްޖެ. އެންމެ މައްސަލައެއްގެ ޝަރީއަތް އަދި ނިމުނީ.

ދުވަހުގެ ފޮޓޯ

ރާއްޖެ އާއި ބަންގްލަދޭޝް ބައްދަލުކުރި އެކުވެރިކަމުގެ ވޮލީ މެޗުގެ ތެރެއިން ރާއްޖޭގެ ކުޅުންތެރިޔަކު ބޯޅަ ފޮނުވާލާއިރު ބަންގްލަދޭޝްގެ ކުޅުންތެރިން ބްލޮކަށް އަރައި. ރޭގެ މެޗުގެ އިތުރުން ސޯޝަލް ސެންޓަރުގައި މި ދެ ޓީމު އަދި ދެ މެޗު ކުޅޭނެ. -- ފޮޓޯ: މުހައްމަދު ޝާބިން/އަދަދު

ދިރާސާތަކުން ކިޔާލުމަށް

"މާދަރީބަސް އަށަގަތުމުގައި ދެ ޖިންސުގެ ކުދިންގެ މެދުގައި ތަފާތެއް ވޭހެއްޔެވެ؟"

އެއީ 2013 ވަނަ އަހަރު ގައުމީ ޔުނިވާސިޓީ އިން ދިވެހި ބަހުގެ ޑިގްރީ ކޯސް ފުރިހަމަ ކުރެއްވި ހާމިދު ރަޝީދު ހައްދަވާފައިވާ ދިރާސާ އެކެވެ. އެ ދިރާސާއަކީ ދިވެހިރާއްޖޭގެ ކުޑަކުދިންގެ މެދުގައި މާދަރީ ބަސް އަށަގަތުމުގައި ދެ ޖިންސުގެ ކުދިންގެ ދެމެދުގައި ތަފާތެއް ވޭތޯ ބެލުމަށްޓަކައި ކުރި ދިރާސާއެކެވެ.

އެގޮތުން، ވާހަކަ ދެއްކުމުގައި ލަފުޒު ބޭނުންކުރާ މިންވަރާއި އެކި ލަފުޒުތައް ކިޔުމުގައި ހުރި ތަފާތުތަކާއި ލަފުޒުތައް ޖުމުލައިގައި އަތުރާ ގޮތްތައް ބަލައިގެން އަދި ވާހަކަ ދެއްކުމުގައި ބޭނުންކުރާ ތަފާތު ލަފުޒުތައް ދިރާސާކޮށް އެނަލައިޒް ކޮށްގެން، ބަސް އަށަގަތުމުގައި ދެޖިންސުގެ ކުދިންގެ މެދުގައި ތަފާތެއް ވޭތޯ ބަލާފައިވެ އެވެ.