މޮންޓްރިއަލް، ކެނެޑާ (ފެބްރުއަރީ 7) - ކޮވިޑާ ގުޅިގެން އަޅާފައިވާ ފިޔަވަޅުތަކާ ދެކޮޅަށް ކެނެޑާގައި ޓްރަކް ދުއްވާ މީހުން ކުރަމުންދާ މުޒާހަރާތަކާ ގުޅިގެން ވެރިރަށް އޮޓާވާގައި ކުއްލި ހާލަތު އިއުލާނުކޮށްފި އެވެ.
އޮޓާވާގެ މޭޔަރު ޖިމް ވޮޓްސަން ވިދާޅުވީ އެ ސިޓީ އޮތީ "ކޮންޓްރޯލުން ނެއްޓިފައި" ކަމަށާއި ފުލުހުންނަށް ވުރެ މުޒާހަރާ ކުރާ މީހުންގެ އަދަދުތައް ގިނަ ކަމަށެވެ. މުޒާހަރާގެ ސަބަބުން ރައްޔިތުންގެ ސަލާމަތާއި ރައްކާތެރިކަމަށް ނުރައްކާވެފައިވާ ކަމަށް އޭނާ ވިދާޅުވި އެވެ.
މީގެ ހަފްތާއެއް ކުރިން ޓްރަކް ދުއްވާ މީހުން ފެށި މުޒާހަރާގައި އޮޓާވާގެ މަގުތަކުގެ މެދުގައި އުޅަނދުތައް ޕާކުކޮށް، ޓެންޓު ޖަހައިގެން އުޅެމުންދާ އިރު، އެ ސިޓީ އޮތީ ހުއްޓުމަކަށް އައިސްފަ އެވެ.
"ފްރީޑަމް ކޮންވޯއި"ގެ ނަމުން މުޒާހަރާ ފެށީ ޓްރަކް ދުއްވާ މީހުން ކޮވިޑް ވެކްސިން ޖެހުން މަޖުބޫރު ކުރުމަށް ސަރުކާރުން ނިންމުމުންނެވެ.
ކުއްލި ނުރައްކަލުގެ ހާލަތު އިއުލާނު ކުރުމުން ފުލުހުން ބުނީ އޮފިސަރުންގެ އަދަދު އިތުރުކޮށް، މުޒާހަރާގެ ބައިވެރިންނަށް އެހީވާ މީހުން ހައްޔަރު ކުރުން އެކަށީގެންވާ ކަމަށެވެ.
އޮޓާވާގެ ގިނަ ރައްޔިތުން ތިބީ މުޒާހަރާއާ މެދު ހިތްހަމަނުޖެހިފަ އެވެ. މަގުތައް ބަންދުވުމާއި، ފުރައްސާރަ އާއި ހަމަނުޖެހުން ހިންގަން އުޅޭ ކަމަށް ބުނެ އާއްމުން ދަނީ ޝަކުވާ ކުރަމުންނެވެ.
ފުލުހުން ބުނީ އެންމެ ބޮޑު ކަންބޮޑުވުމަކީ މުޒާހަރާގެ ތެރެއަށް ކަނާއަތު ފިޔައިގެ ހަރުކަށި ފިކުރުގެ މީހުން ވަދެ، ބައިވެރިވަމުން ދިޔުން ކަމަށެވެ.
މުޒާހަރާއާ ގުޅުން ހުރި 60 އަށް ވުރެ ގިނަ ޖިނާއީ މައްސަލަ ތަހުގީގު ކުރަމުން އެބަދެ އެވެ. އޭގެ ތެރޭގައި ގެއްލުން ދިނުމާއި، ވައްކަމާއި، ރުޅިވެރިކަން ފެތުރުން އަދި މަކަރު ހެދުން ފަދަ ކަންކަން ހިމެނެ އެވެ. ބައެއް މީހުން ހައްޔަރުކޮށްފައިވާ އިރު، ގިނަ އަދަދެއްގެ އުޅަނދުތައް ވެސް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
ކޮވިޑް ވެކްސިނާ ދެކޮޅު އެއްވުމެއް އޮޓާވާގައި ކުރިއަށް ދިޔަ ނަމަވެސް، ކެނެޑާގެ ގިނަ ރައްޔިތުން ވެކްސިން ޖެހުމަށް ތާއީދު ކުރެ އެވެ. އާބާދީގެ 83 ޕަސެންޓު ވަނީ ވެކްސިން ފުރިހަމަކޮށްފަ އެވެ.
