ކުރީގެ ރައީސް މައުމޫން އަބްދުލްގައްޔޫމްގެ އެއްބަފާ ކޮއްކޯފުޅު އަބްދުﷲ ޔާމީންގެ ވެރިކަމުގައި އެމަނިކުފާނު ހައްޔަރު ކުރުން އަނިޔާވެރި ހާދިސާއެއްގެ ގޮތުގައި މައުމޫން މިރޭ ސިފަ ކުރައްވައިފި އެވެ.
ކުރީގެ ރައީސް މުހައްމަދު ނަޝީދާއި ބައެއް ސިޔާސީ ލީޑަރުން މިނިވަން ކުރުމަށް ސުޕްްރީމް ކޯޓުން ނެރުނު އަމުރާއެކު ވެރިކަން ވައްޓާލަން އުޅުއްވިކަމުގެ ތުހުމަތުގައި މައުމޫން ހައްޔަރު ކުރީ ފެބްރުއަރީ 6، 2018 ގަ އެވެ.
މައުމޫން ހައްޔަރު ކުރުމާ ގުޅޭ ގޮތުން ސޯޝަލް މީޑިއާ ޕްލެޓްފޯމް ޓުވިޓާގައި މީހަކުު ލިޔުނު ޕޯސްޓަކަށް ޖަވާބު ދެއްވަމުން އެމަނިފާނު ހައްޔަރު ކުރުމަށް ނިސްބަތް ކުރައްވާ، ނުރުހުމުގެ އެމޯޓިކޯންއަކާއެކު މައުމޫން ވިދާޅުވީ، "ކޮން ފަދަ އަނިޔާވެރި ހާދިސާއެއް" އެހެންނެވެ.
ރާއްޖޭގައި 1978 ވަނަ އަހަރުން ފެށިގެން 30 އަހަރުވަންދެން ވެރިކަން ކުރެއްވި މައުމޫން ހައްޔަރު ކުރުމަށްފަހު ދައުލަތުން އެމަނިކުފާނުގެ މައްޗަށް އުފުލީ އަދުލް އިންސާފު ގާއިމް ކުރުމަށް ހުރަސް އެޅިކަމުގެ ދައުވާ އެވެ. އެ ދައުވާ ސާބިތުވެ އެއް އަހަރާއި ހަތް މަހާއި ހަ ދުވަހަށް ޖަލަށްލުމަށް ކްރިމިނަލް ކޯޓުން ހުކުމް ކުރި އެވެ.
މައުމޫން ޖަލަށްލުމުން އެމަނިކުފާނު މިނިވަން ކުރުމަށް އެއިރުގެ އިދިކޮޅު ފަރާތްތަކުން ވަރަށް ބޮޑަށް މަސައްކަތް ކުރެއްވި އެވެ. އަދި އަނބިކަނބަލުން ނަސްރީނާ އިބްރާހިމް ވެސް މައުމޫން ދޫކޮށްލުމަށް ގޮވާލާ ކުރިއަށްގެންދިޔަ މުޒާހަރާތަކުގައި ބައިވެރިވެވަޑައިގެންނެވި އެވެ.
މައުމޫން ޖަލުގައި އޮންނެވި ދުވަސްތަކުގައި އެންމެ ކައިރީގައި ހުންނެވި އެކަކީ ވެސް އަނބިކަނބަލުން ނަސްރީނާ އެވެ. ޖަލުގައި މައުމޫން އާލާސްކަންފުޅާ އުޅުއްވާތީ ހާއްސަ ހުއްދައެއްގެ ދަށުން އެމަނިކުފާނަށް އެހީތެރިވެވަޑައިގަތުމަށް މާފުށީ ޖަލަށް ވެސް ނަސްރީނާ އެތައް ދުވަހަކު ވަޑައިގެންނެވި އެވެ.
ތާރީހީ މާފުށި ޖަލުގައި މައުމޫން ހުންނެވީ ރައީސް ނަޝީދު ބެހެއްޓުމަށް ހާއްސަކޮށް އެތަނުގައި ހެދި ޖަލު ކޮޓަރިއެއްގަ އެވެ. އެތަނުގައި އެއް ރޯދަ މަހާއެކު ޖުމްލަ 236 ދުވަސް މައުމޫން ހުންނެވި އެވެ. އެމަނިކުފާނު މިނިވަންވީ ސެޕްޓެމްބަރު 30، 2018 ގަ އެވެ.
