ތެހްރާން، އިރާން (ފެބްރުއަރީ 5) - ދަތިކުރުމުގެ ފިޔަވަޅުތަކަށް ލުއިދޭން އެމެރިކާއިން އަޅާފައިވާ ފިޔަވަޅުތަކާ މެދު ހިތްހަމަޖެހުނު ނަމަވެސް، އަދިވެސް އިތުރު މަސައްކަތްތައް ކުރަން ޖެހޭ ކަމަށް އިރާނުގެ ފޮރިން މިނިސްޓަރު ވިދާޅުވެއްޖެ އެވެ.
އިރާނުގެ ނިޔުކްލިއާ މަޝްރޫއާ ގުޅިގެން އަޅާފައިވާ ފިޔަވަޅުތައް އުވާލަން އެމެރިކާއިން ހުކުރު ދުވަހު ނިންމީ އެ މަޝްރޫއާ ގުޅޭ ގޮތުން 2015 ވަނަ އަހަރު އެކުލަވާލި އެއްބަސްވުމެއް އަލުން ތަންފީޒު ކުރުމަށް ކުރިއަށްދާ މަޝްވަރާތަކުން ކުރިއެރުން ލިބުމުންނެވެ.
"ބައެއް ފިޔަވަޅުތައް އުވާލުމާ އެކު އެނގިގެން ދަނީ އެމެރިކާގެ ނިޔަތް ރަނގަޅުކަން. އެމެރިކާއިން ދަނީ ކަމެއް ކުރުމުގެ ވާހަކަ ދައްކަމުން. އެކަމަކު ކަރުދާހުގައި ލިޔެލާ އެއްޗަކުން ނުފުދޭނެ،" އިރާނުގެ ފޮރިން މިނިސްޓަރު ހުސެއިން އާމިރް އަބްދުއްލާހިއާން އިސްނާ ނިއުސް އެޖެންސީއަށް ވިދާޅުވި އެވެ.
އޭނާ ވިދާޅުވީ މިހާރު ކުރިއަށްދާ މަޝްވަރާތަކުގައި ހައްލު ނުކުރެވި އޮތް އެންމެ ބޮޑު އެއް މައްސަލައަކީ އެމެރިކާއިން އެއްބަސްވުމަށް ރުޖޫއަވުމަށް ފަހު އަލުން ވަކިނުވާނެކަން ކަށަވަރު ކުރުން ކަމަށެވެ.
"އަޅުގަނޑުމެން ޔަގީންކަމަކަށް މި އެދެނީ ސިޔާސީ، ގާނޫނީ އަދި އިގްތިސާދީ ދާއިރާތަކުން. ބައެއް ދާއިރާތަކުން އެއްބަސްވުމަކަށް އަދި އާދެވިފައެއް ނުވޭ."
އެމެރިކާގެ ސްޓޭޓް ޑިޕާޓްމަންޓުން ހުކުރު ދުވަހު ބުނީ ނިޔުކްލިއާ މަޝްރޫއާ ގުޅިގެން އަޅާފައިވާ ފިޔަވަޅުތައް އުވާލަން ނިންމީ 2015 ވަނަ އަހަރުގެ ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން (ޖޭސީޕީއޯއޭ) އެއްބަސްވުމަށް އަލުން ރުޖޫއަވުމަށް އަޅާ ޓެކްނިކަލް ފިޔަވަޅެއްގެ ގޮތުން ކަމަށެވެ.
އެމެރިކާއިން 2018 ވަނަ އަހަރު އެ އެއްބަސްވުމަށް އަމަލުކުރުން މެދުކަނޑާލީ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގަ އެވެ. އެއާއެކު އަލުން ދަތިކުރުމުގެ ފިޔަވަޅުތައް އަޅަން ފެށި އެވެ. އޭގެ އަހަރެއް ފަހުން އިރާނުން ވެސް އެއްބަސްވުމާ ދުރަށް ޖެހި، ނިޔުކްލިއާ މަޝްރޫއު ކުރިއަށް ޖެއްސި އެވެ.
އެމެރިކާއިން ފިޔަވަޅުތައް އުވާލުމާ އެކު އެހެން ގައުމުތަކާއި ކުންފުނިތަކަށް އިރާނުގެ ނިޔުކްލިއާ މަޝްރޫއުގައި ބައިވެރިވުމުގެ ފުރުސަތު ފަހިވެ އެވެ. އެ މަޝްރޫއުގެ ބައެއްގެ ގޮތުގައި ޔުރޭނިއަމް މުއްސަނދިކޮށް، އިތުރު ކުރުން ހިމެނެ އެވެ.
ވިއެނާގައި ކުރިއަށްދާ މަޝްވަރާގައި ބައިވެރިވަނީ އިރާނާއި އެމެރިކާ، އިނގިރޭސިވިލާތް، ޗައިނާ، ފްރާންސް، ޖަރުމަނުވިލާތް އަދި ރަޝިއާ އެވެ. ގައުމުތަކުން މިދިޔަ ހަފްތާގައި ބުނީ މަޝްވަރާ މިހާރު އޮތް ހިސާބުން ބޭނުންވަނީ މުހިއްމު "ސިޔާސީ ނިންމުންތަކެއް" ކަމަށެވެ.
