މުސާރައިގެ ކަންކަމުގައި ތަފާތުކުރުން ގެންގުޅެ، މުސާރަ ބޮޑުކޮށްދޭނެ ކަމަށް ބުނެ މެނޭޖުމަންޓުން ދޮގު ހަދާ ކަމަށް ތުހުމަތުކޮށް ދާލު އެއާޕޯޓުގައި މަސައްކަތްކުރާ މުވައްޒަފުން މިއަދު މަސައްކަތްތައް ހުއްޓާލާ އިހުތިޖާޖަށް ނުކުމެއްޖެ އެވެ.
މައުލޫމާތު ލިބޭ ގޮތުގައި މިއަދު ހެނދުނުން ފެށިގެން އެއާޕޯޓުގެ ބައެއް މުވައްޒަފުން ވަނީ މުސާރައިގެ ކަންކަމުގައި މެނޭޖުމަންޓާ މުއާމަލާތް ކުރެވެން ދެން މަސައްކަތް ހުއްޓާލާފަ އެވެ. އަދި، މަސައްކަތް ހުއްޓާލި މުވައްޒަފުން ދަނީ އެ މީހުން މެނޭޖްމަންޓުން ބޭނުންވާ ކަންކަން ހިމެނޭ ޕެޓިޝަނެއްގައި ސޮއިކުރަމުންނެވެ.
މިކަމާ ގުޅޭ ގޮތުން ކުޑަހުވަދޫ ހަބަރުތައް ގެނެސްދޭ ޔުނިއިޓެޑް ކުޑަހުވަދޫ ޕޭޖުގައިވާ ގޮތުގައި މުވައްޒަފުން އަލުން މަސައްކަތަށް ނުކުންނާނީ މި ޕެޓިޝަނުގައިވާ ކަންކަމާ ގުޅިގެން މެނޭޖްމަންޓުން މުސާރައާ މެދު ވަކި ގޮތެއް ނިންމީމަ އެވެ. މި ޕޯސްޓުގައިވާ ގޮތުގައި މި އެއާޕޯޓުގައި މަސައްކަތް ކުރާ ބައެއް މުވައްޒަފުންނަށް އެންމެ ކުޑަކޮށް ލިބެން ޖެހޭ އުޖޫރަ (މިނިމަމް ވޭޖު) ވެސް ނުލިބެ އެވެ.
މި އެއާޕޯޓުގައި މަސައްކަތްކުރާ މުވައްޒަފަކު ކޮށްފައިވާ ފޭސްބުކް ޕޯސްޓެއްގައި ބުނީ، މެނޭޖުމަންޓުން އެދޭ ކަންކަމުގެ ތެރޭގައި އެކަށީގެންވާ އުޖޫރައެއް ދިނުމާއި ކުންފުނީގެ ތެރެއިން ކުރިއަރާނެ ފުރުސަތު ހޯދައިދިނުމާއި ކުރާ މަސައްކަތްތައް ބަލައިގަތުމުގެ އިތުރުން މުވައްޒަފުންނާ ގުޅޭ ކަންކަމުގައި އަނގަ ބަހުން ވެފައިވާ އެއްބަސްވުންތަކަށް އިހުތިރާމުކުރުން ހިމެނޭ ކަމަށެވެ.
ދ. ކުޑަހުވަދޫގައި ހުންނަ ދާލު އެއާޕޯޓަކީ ޔުނިވާސަަލް ކުންފުންޏާ ގުޅުން އޮންނަ ދާލު ހޯލްޑިންގްސް ކުންފުނިން ތަރައްގީކޮށްގެން ހިންގާ އެއާޕޯޓެކެވެ. އެއާޕޯޓު ހިންގާ ކުންފުނީގެ ހިއްސާދާރުންނަކީ ރިއޯލޯ އިންވެސްޓްމަންޓާއި ޑީޕް ބްލޫ އިންވެސްޓްމަންޓު ޕްރައިވެޓް ލިމިޓެޑެވެ.
މި ދެ ކުންފުންޏަކީ ވެސް ޔުނިވާސަލްއާ ގުޅުން އޮންނަ ދެ ކުންފުންޏެވެ. އެގޮތުން ރިއޯލޯ ކުންފުނީގެ ހިއްސާދާރުންނަކީ ސަންޖޭ އިބްރާހިމް މަނިކާއި އުމަރު މުހައްމަދު މަނިކާއި މުހައްމަދު ހަލީލެވެ. އަދި ޑީޕް ބްލޫ ޕްރައިވެޓް ލިމިޓެޑުގެ ހިއްސާދާރުންނަކީ ސަންޖޭ އިބްރާހިމް މަނިކާއި އައިޝަތު އަންނިކާ އިބްރާހިމް މަނިކެވެ.
މުސާރަ ބަރާބަރަށް ދެން، މިނިމަމް ވޭޖު ވެސް ލިބޭނެ
މުވައްޒަފުންގެ ހުރި ކަންބޮޑުވުންތަކާ ގުޅިގެން ދާލު ހޯލްޑިންގްސް ކުންފުނީގެ މުހައްމަދު ހަލީލު މި ނޫހަށް ވިދާޅުވީ، ސީދާ ހުރި ކަންބޮޑުވުންތަކެއް ސާފެއް ނޫން ކަމަށެވެ. ނަމަވެސް މުސާރަ އާއި އުޖޫރައިގެ މައްސަލައިގައި މުވައްޒަފުން ދައްކާ ވާހަކަތަކަކީ ރަނގަޅު ވާހަކަތަކެއް ނޫން ކަަމަށް އޭނާ ވިދާޅުވި އެވެ.
"ކޮވިޑު ބަލިމަޑުކަމުގެ ތެރޭގައި ވެސް މުވައްޒަފަކު ވަކިނުކޮށް، ހުރިހާ މުވައްޒަފުންނަށް 5000ރ. އެލަވަންސުގެ ގޮތުގައި ދިން ހަމައެކަނި ކުންފުންޏަކީ މިއީ. އަދި ޖެނުއަރީ މަހާ ހަމައަށް ތިން އަހަރު މަސައްކަތްކޮށްފައިވާ މުވައްޒަފުންނަށް މުސާރަ އިތުރުވެސް ކޮށްދިނިން," ހަލީލް ވިދާޅުވި އެވެ.
މިނިމަމް ވޭޖާ ގުޅިގެން ކުރާ ތުހުމަތުތަކާ ގުޅުވާ ހަލީލް ވިދާޅުވީ، އުސޫލެއްގެ ގޮތުން ޖެނުއަރީ މަހުން ފެށިގެން ހުރިހާ މުވައްޒަފުންނަށް މިނިމަމް ވޭޖު ސިޔާސަތާ އެއްގޮތަށް އާމްދަނީ ލިބޭނެ ކަމަށެވެ.
އަދި، އިދާރީ މައްސަލައެއްގެ ސަބަބުން ބައެއް މުވައްޒަފުންނަށް މުސާރަ އަދި އެވަރަށް ނުލިބި ހުރި ނަމަވެސް، މިނިމަމް ވޭޖު ނުލިބޭ މުވައްޒަފަކު އެ ކުންފުނީގައި ނުހުންނާނެ ކަމަށް އޭނާ ވިދާޅުވި އެވެ. އޭނާ އިތުރަށް ވިދާޅުވީ ބައެއް މުވައްޒަފުން މަސައްކަތަށް ނުނިކުތް ނަމަވެސް، އެއާޕޯޓުގެ އޮޕަރޭޝަނަށް މީގެ ސަބަބުން ބުރޫ ނާރާ ކަމަށެވެ.
ދާލު އެއާޕޯޓަކީ 2013 ވަނަ އަހަރު އޭރުގެ ސަރުކާރުން ރިއޯލޯ އިންވެސްޓްމަންޓާ ހަވާލުކުރި ޕްރޮޖެކްޓެކެވެ. އެ ކުންފުނިން މި އެއާޕޯޓުގެ މަސައްކަތް ނިންމާ އޮޕަރޭޝަންތައް ފެށީ ނޮވެމްބަރު 1، 2017 ގަ އެވެ. މި އެއާޕޯޓަށް މި ވަގުތު ދަތުރުކުރަނީ މަންޓާ އެއާ އެކަންޏެވެ. އެ އެއާލައިނުން ބޭސްއެއްގެ ގޮތުގައި ބޭނުންކުރާ އެއާޕޯޓަކީ ވެސް މިއީ އެވެ.
ކްރޮސް ސަބްސިޑީގެ ގޮތުގައި ރިސޯޓެއް ވެސް ދީގެން ތަރައްގީކުރި މި އެއާޕޯޓަކީ ކުޑަހުވަދޫން 64.81 ހެކްޓަރުގެ ބިން ހިއްކައިގެން 1،800 މީޓަރުގެ ދިގު ރަންވޭއަކާ އެކު ހެދި އެއާޕޯޓެކެވެ. އެއްފަހަރާ 42 ބޯޓަށް ހިދުމަތް ދެވޭ މި އެއާޕޯޓަކީ ޕްރައިވެޓް ޖެޓު ޖެއްސޭ ފެންވަރުގައި އަމިއްލަ ކުންފުންޏަކުން ރާއްޖޭގައި ތަރައްގީ ކުރި ފުރަތަމަ އެއާޕޯޓެވެ.
