ފަތުރުވެރިކަމުގެ ބޭނުންތަކަށް ރަށްތައް ދޫކުރުމުގެ ތިންވަނަ މަރުހަލާގައި ރިސޯޓު ތަރައްގީކުރަން މިދިޔަ އަހަރުގެ ތެރޭގައި ބީލަމަށް ހުޅުވާލި 18 ރަށަކަށް ބިޑް ހުށަހެޅުމުގެ މުއްދަތު ޓޫރިޒަމް މިނިސްޓްރީން އިތުރުކޮށްފި އެވެ.
އެ 18 ރަށުގައި ރިސޯޓު ހަދަން ބީލަން ހުށަހެޅުމުގެ ފުރުސަތު ހުޅުވާފައިވަނީ ދުބާއީ އެކްސްޕޯގައި އެވެ.
އޭގެ ތެރޭގައި ގިނައީ ކުރިން ބީލަމަށް ހުޅުވާލައިގެން ނުވިކުނު ރަށްތަކެވެ.
މިފަހަރު ބީލަމަށް ހުޅުވައިލި ރަށްތަކަކީ ހއ. މެދަފުއްޓާއި ށ. ކުޑަޅައިމެންދޫ އާއި ރ. އެއްތިގިލި ހިމެނޭ ގޮތަށް އަލިފުށި ފަޅުން 10 ހެކްޓަރާއި، ފ. އެނބުލުފުށި އަދި ފ. ޖިންނަތުގައު އެވެ.
ޓޫރިޒަމް މިނިސްޓްރީން މިއަދު ބުނީ، ރިސޯޓު ހަދަން ހުޅުވާލި ރަށްތަކަށް ބީލަން ހުށަހެޅުމުގެ މުއްދަތު އަންނަ މަހުގެ 22 އަދި 23 ވަނަ ދުވަހުގެ ނިޔަލަށް އިތުރުކޮށްފައިވާ ކަމަށެވެ.
އެގޮތުން ލ، ގއ، ގދ، އަތޮޅުގެ ރަށްތައް ފިޔަވައި އެހެން ރަށްތަކަށް ބީލަން ހުށަހެޅުމުގެ ފުރުސަތު އިތުރުކޮށްފައިވަނީ މާޗު މަހުގެ 22 ވަނަ ދުވަހުގެ ނިޔަލަށެވެ. އެ ތިން އަތޮޅުގެ ރަށްރަށަށް ބީލަން ހުށަހެޅުމުގެ މުއްދަތު މާޗު މަހުގެ 23 ވަނަ ދުވަހަށް ހަމަވާނެ ކަމަށް ޓޫރިޒަމް މިނިސްޓްރީން ބުންޏެވެ.
ރިސޯޓު ތަރައްގީކުރަން ހުޅުވާލި ރަށްތައް
- ހއ. މެދަފުށި - 10.90 ހެކްޓަރު
- ހއ. އަލިދުއްފަރުފިނޮޅު - 3 ހެކްޓަރު
- ހދ. ކުޑަފަރުފަސްގަނޑު - 1.20 ހެކްޓަރު
- ށ. ކުޑަޅައިމެންދޫ - 14.70 ހެކްޓަރު
- ރ. އެއްތިގިލި އަދި އަލިފުށި ފަޅުން 10 ހެކްޓަރު - 20 ހެކްޓަރު
- މ. ސީދީހުރާ އަދި ސީދީހުރާ ވެލިގަނޑު - 4.28 ހެކްޓަރު
- މ. މާއުސްފުށި - 10.40 ހެކްޓަރު
- ފ. އެނބުލުފުށި - 1.00 ހެކްޓަރު
- ފ. ޖިންނަތުގައު - 0.89 ހެކްޓަރު
- ތ. ކާއްޑޫ - 3.9 ހެކްޓަރު
- ތ. އޮޅުފުށި އަދި އޮޅުފުށިފިނޮޅު - 3.54 ހެކްޓަރު
- ލ. ކަށިދޫ - 3.1 ހެކްޓަރު
- ލ. ބޮޑުމުންޏަފުށި - 3 ހެކްޓަރު
- ލ. ދޮންބެރެހާ އަދި ހޮޅަރެހާ - 4.44 ހެކްޓަރު
- ގއ. މާރެހާ - 17 ހެކްޓަރު
- ގއ. ފުނަދޫވިލިގިއްލާ - 5 ހެކްޓަރު
- ގދ. ކަނޑަހަލަގަލާ - 7.4 ހެކްޓަރު
- ގދ. ފެރޭތަ ވިލިގިއްލާ އާއި ދެކާނބާ އާއި ކޮޑެރަޓާ އާއި އިތުރު ރަށެއް - 9.26 ހެކްޓަރު
އިއުލާން ކޮށްފައިވާ ރަށްތައް ވިއްކުމުގައި 60 ޕަސެންޓް ޕޮއިންޓް ކަނޑައަޅާފައި ވަނީ އެންމެ ބޮޑު އަގު ހުށަހަޅާ ފަރާތްތަކުގެ އިތުރުން ތިމާވެށީގެ ކަންކަމާއި މުވައްޒަފުން ތަމްރީނު ކުރުމާއި އިޔާދަކުރަނިވި ހަކަތައަށް އިސްކަންދޭ ވަރަށް ޕޮއިންޓް ދޭނެ ކަމަށްވެސް މިނިސްޓްރީން ބުނެފައިވެ އެވެ.
