އިންޑިއާގެ މައިކްރޯ ބްލޮގިން އެޕް ކޫއަށް ޓްވިޓާ ފަހަތަށް ވައްޓާލެވޭނެ ހެއްޔެވެ؟ ޓްވިޓާ ބޭނުން ކުރަނީ 25 މިލިއަން މީހުންނެވެ. ކޫގެ ކޯ ފައުންޑަރު މަޔަންކް ބިދަވަތްކަ ވިދާޅުވީ މި އަހަރުގެ ތެރޭގައި އެއަށްވުރެ ގިނަ މީހުން ކޫ ބޭނުން ކުރާނެ ކަމަށެވެ.
ވިހި އެކާވީސް ވަނަ އަހަރު ނިމުނު އިރު އިންޑިއާގައި 20 މިލިއަން ފަހަރު ކޫ އެޕް ޑައުންލޯޑްކޮށްފައިވެ އެވެ.
"އަޅުގަނޑުމެންގެ އެޕް 10 ބަހަކުން ބޭނުން ކުރެވޭނެ، އޭގެ ތެރޭގައި އިނގިރޭސި ވެސް ހިމެނޭ. މި އަހަރުގެ އަމާޒަކީ އިންޑިއާގެ ރަސްމީ 22 ބަހުރުވައިން ބޭނުންކުރެވޭނެ ގޮތް ހެދުން،" ބެންގެލޫރުގައި ހުންނަ ކުންފުނީގެ މައި އޮފީހުގައި އިނދެ އޭނާ ބީބީސީއަށް ބުންޏެވެ.
އިންޑިއާގައި ކޫ މަގްބޫލް ވާން ފެށީ އިންޑިއާ ސަރުކާރާއި ޓްވިޓާއާ ދެމެދު މިދިޔަ އަހަރު އުފެދުނު މައްސަލައިގެ ތެރޭގަ އެވެ.
ހަމަނުޖެހުން އުފެއްދުމުގެ މަގްސަދުގައި ހިންގާ ޓްވިޓާ އެކައުންޓްތައް ބަންދު ކުރަން ބޮޑު ވަޒީރު ނަރެންދްރަ މޯދީގެ ސަރުކާރުން އެދުމުން އެންމެ ފުރަތަމަ ޓްވިޓާއިން އެކަން ކުރި އެވެ. ނަމަވެސް ފަހުން ބުނީ އެކައުންޓްތައް ބްލޮކްކުރަން އެކަށީގެންވާ ސަބަބެއް ނެތް ކަމަށެވެ. އެއާއެކު ސަރުކާރުން ވަނީ ޓްވިޓާގެ އިންޑިއާ މުވައްޒަފުންނާ މެދު ގާނޫނީ ފިޔަވަޅު އަޅާނެކަމުގެ އިންޒާރު ދީފަ އެވެ.
އެ މައްސަލަ ހޫނުވެ، ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) ގެ ބައެއް އިސް މެމްބަރުން ޓްވިޓާ ބޭނުންކުރުން ހުއްޓާލައި، ކޫއަށް ބަދަލުވި އެވެ. ނަމަވެސް ޓްވިޓާގައި ގިނަ ބަޔަކު ފޮލޯކުރާ މޯދީ އެގޮތަކަށް އަމަލެއް ނުކުރައްވަ އެވެ.
އިންޑިއާގައި 2020 ވަނަ އަހަރުގެ ކުރީކޮޅު ލޯންޗު ކުރި ކޫ 2021 ވަނަ އަހަރު ނައިޖީރިއަށް ފުޅާކުރީ އެ ގައުމުގެ ސަރުކާރުން ޓްވިޓާ ސަސްޕެންޑް ކުރުމުންނެވެ. ކޫގެ މިހާރުގެ އަމާޒަކީ 2022 ނިމުމުގެ ކުރިން އެޕް ބޭނުންކުރާ މީހުންގެ އަދަދު 100 މިލިއަނަށް އިތުރު ކުރުމެވެ.
ބިދްވަތްކާއާ އެކު ކޫ އުފެއްދީ އަޕަރްމެޔާ ރާދަކްރިޝްނަން އެވެ. ރާދަކްރިޝްނަން ކުރިން ހިންގަ ޓެކްސީ ފޯ ޝުއާ ވިޔަފާރި 200 މިލިއަން ޑޮލަރަށް 2015 ވަނަ އަހަރު ވަނީ އޯލާ ކުންފުންޏަށް ވިއްކާލާފަ އެވެ. އޭނާ އާއި ބިދްވަތްކާ އެކުގައި، އިންޑިއާގެ ބަހުރުވަތަކުން މައުލޫމާތު ފޯރުކޮށްދޭ ވޯކަލް އެޕް ވެސް ހިންގަ އެވެ.
މިހާރު ކޫ އެޕް ބޭނުން ކުރެވެނީ 10 ބަހަކުން.
މިދިޔަ އަހަރު ބޮލީވުޑްގެ ތަރިންނާއި ކްރިކެޓް ކުޅުންތެރިން ވެސް ކޫ ބޭނުން ކުރަން ފެށި އެވެ. ގިނަ ބަޔަކަށް ކޫ ކަމުދަނީ އިނގިރޭސި ބަސް ނުދަންނަ ފަރާތްތަކާ ހަމައަށް، ކޫގެ އެހީގައި ވާސިލްވެވޭތީ އެވެ. އެހެންވެ، ކުންފުނިން ވަނީ އެއް ފަހަރާ ގިނަ ބަސްތަކުން ޕޯސްޓުކުރެވޭނެ ގޮތް ވެސް ހަދާފަ އެވެ.
ނައިޖީރިއާގައި ކޫއަށް ލިބުނު ކާމިޔާބާ އެކު ކުންފުނިން ވިސްނަނީ އިނގިރޭސި ބަސް ނޫން ބަސްތައް ގިނައިން ބޭނުން ކުރާ ގައުމުތަކަށް އަމާޒުކޮށް އެޕް ލޯންޗް ކުރަމުން ދިޔުމަށެވެ.
"ދުނިޔޭގެ އާބާދީގެ ތެރެއިން އިނގިރޭސި ބަހުން ވާހަކަ ދައްކަނީ އެންމެ 20 ޕަސެންޓް މީހުން. 80 ޕަސެންޓް މީހުން އިނގިރޭސި ބަސް ބޭނުމެއް ނުކުރޭ. އެހެންވެ، އެ މާކެޓް އޮތީ އަޅުގަނޑުމެންނަށް ހުޅުވިފައި."
