ކޮލޮމްބޯ، ސްރީލަންކާ (ފެބްރުއަރީ 4) - އެހެން ގައުމުތަކުގައި ދިރިއުޅޭ ސްރީލަންކާގެ ރައްޔިތުން ގައުމަށް ބޭރު ފައިސާ ފޮނުވަން ރައީސް ގޮތަބަޔާ ރާޖަޕަކްސަ ގޮވާލައްވައިފި އެވެ.
އިނގިރޭސީންގެ އަތުން މިނިވަންކަން ލިބުނުތާ 74 އަހަރު ފުރުން ފާހަގަކުރަން ހުކުރު ދުވަހު ބޭއްވި ހަފްލާއެއްގައި ގޮތަބަޔާ ގޮވާލެއްވީ ގައުމުން ބޭރުގައި އުޅޭ އެތައް މިލިއަން ރައްޔިތުން އަމިއްލަ ފަސްގަނޑުގައި އިންވެސްޓް ކުރުމަށެވެ.
"ގައުމަށް ބޭރު ފައިސާ ފޯރުކޮށްދޭ، އެގެން ގައުމުތަކުގައި ދިރިއުޅޭ ލަންކާ ރައްޔިތުންނަކީ އަޅުގަނޑުމެންނަށް ވަރަށް ބޮޑު ރައުސުލްމާލެއް،" ގޮތަބަޔާ ވިދާޅުވި އެވެ.
"އެހެން ގައުމުތަކުގައި ދިރިއުޅޭ ލަންކާގެ ހުރިހާ ރައްޔިތުންނަށް ވެސް އަޅުގަނޑު މި ދައުވަތު ދެނީ އަމިއްލަ ފަސްގަނޑުގައި އިންވެސްޓް ކުރަން."
ދެހާސް ނަވާރަ ވަނަ އަހަރު ގޮތަބަޔާ ވެރިކަމަށް ވަޑައިގެންނެވި އިރު ލަންކާގެ ބޭރު ފައިސާގެ ރިޒާވްގައި 7.5 ބިލިއަން ޑޮލަރު ހުއްޓެވެ. ނަމަވެސް, އޭގެ 50 ޕަސެންޓަށް ވުރެ ބޮޑު ބަޔެއް ހުސްވެ، މިހާރު ރިޒާވްގައި ހުރީ 3.1 ބިލިއަން ޑޮލަރެވެ.
ލަންކާއަށް އެންމެ ގިނައިން ބޭރު ފައިސާ ލިބެނީ އެހެން ގައުމުތަކުގައި މަސައްކަތް ކުރާ ލަންކާ ރައްޔިތުން ފޮނުވާ ފައިސާއިންނެވެ. ނަމަވެސް މިދިޔަ ޑިސެމްބަރު މަހު އެ އަދަދު ވަނީ 60 ޕަސެންޓު ދަށްވެފަ އެވެ.
މުޅި 2021 ވަނަ އަހަރަށް ބަލާއިރު، މަސައްކަތްތެރިން ރެމިޓެންސްގެ ގޮތުގައި ލިބުނު އަދަދު ވަނީ 22.7 ޕަސެންޓުން 5.49 ބިލިއަން ޑޮލަރަށް ވެއްޓިފަ އެވެ.
ދެ ވަނަ އަށް އެންމެ ގިނައިން ބޭރު ފައިސާ ލިބޭ ފަތުރުވެރިކަމުގެ ސިނާއަތް ވެސް އޮތީ، ކޮވިޑް ބަލިމަޑުކަމާ ހެދި، ހުއްޓިފަ އެވެ.
ބޭރު ފައިސާގެ ރިޒާވް ދަށްވާން ފެށުމުން، މާޗް 2020 އިން ފެށިގެން މުދާ އިމްޕޯޓް ކުރުމުގައި ވެސް ވަނީ ފިޔަވަޅުތަކެއް އަޅާފަ އެވެ. އޭގެ ސަބަބުން ކާބޯތަކެއްޗާއި ތެލުގެ ދަތިކަން ކުރިމަތިވެ، ތަކެތީގެ އަގު ވަނީ އުފުލިފަ އެވެ.
