އޯކްލޭންޑް، ނިއުޒީލޭންޑް (ފެބްރުއަރީ 3) - ކޮވިޑާ ގުޅިގެން އަޅާފައިވާ ބައެއް ބޯޑަރު ފިޔަވަޅުތަކަށް ލުއިދީ، އަންނަ އޮކްޓޯބަރު މަހު އަލުން ބޯޑަރު އެއްކޮށް ހުޅުވާލަން ނިއުޒީލޭންޑުން ތައްޔާރުވެއްޖެ އެވެ.
ބޮޑު ވަޒީރު ޔެސިންޑާ އާޑޭން ވިދާޅުވީ ބޯޑަރު އަލުން ހުޅުވާލަން ފަސް މަރުހަލާގެ ޕްލޭނެއް ހަދާފައިވާ ކަމަށެވެ. އެގޮތުން ފުރަތަމަ ފިޔަވަޅެއްގެ ގޮތުން ނިއުޒީލޭންޑް ރައްޔިތުން ގައުމަށް އެތެރެވުމަށް ފަހު ހޮޓަލެއްގައި ކަރަންޓީން ވާން ޖެހޭ ގޮތަށް އޮތް އުސޫލު އުވާލާނެ އެވެ.
"ކުރިއަށް ދާން ފަށަންވީ ވަގުތު އައިސް ޖެހިއްޖެ،" ބޯޑަރު ފިޔަވަޅުތަކަށް ލުއިދޭން ޕްރެޝަރާ ކުރިމަތިވެވަޑައިގެންފައިވާ އާޑޭން ވިދާޅުވި އެވެ.
މީގެ ދެ އަހަރު ކުރިން ކޮވިޑް ބަލިމަޑުކަން އައުމާ އެކު ނިއުޒީލޭންޑުން އެޅި ގިނަ ފިޔަވަޅުތަކަށް މިއަދާ ހަމައަށް އެއްވެސް ބަދަލެއް ގެނެސްފައެއް ނުވެ އެވެ.
އާޑޭން ވިދާޅުވީ ފެބްރުއަރީ 27 ވަނަ ދުވަހުން ފެށިގެން އޮސްޓްރޭލިއާގައި ތިބި ނިއުޒީލޭންޑް ރައްޔިތުން އެނބުރި ގައުމަށް ގޮސް، ހޮޓަލެއްގައި ކަރަންޓީންވުމުގެ ބަދަލުގައި އަމިއްލައަށް އައިސޮލޭޓްވެވޭނެ ކަމަށެވެ.
އޭގެ ދެ ހަފްތާ ފަހުން، ދުނިޔޭގެ ކޮންމެ ގައުމަކުން އެނބުރި އަންނަ ނިއުޒީލޭންޑްގެ ރައްޔިތުންނަށް ވެސް ހޮޓަލެއްގައި ކަރަންޓީނު ނުވެ، ދިރިއުޅޭ ތަނުގައި އައިސޮލޭޓްވެވޭނެ އެވެ.
ސަރުކާރުން ރާވާފައިވަނީ ހޮޓަލެއްގައި ކަރަންޓީނު ނުވެ، ދިރިއުޅޭ ތަނުގައި އައިސޮލޭޓްވުމުގެ ފުރުސަތު އެހެން ގްރޫޕްތަކަށް ވެސް ހުޅުވާލަމުން ދިޔުމަށެވެ. އެގޮތުން ސްކިލްޑް މަސައްކަތްތެރިންނާއި، ބައިނަލްއަގްވާމީ ދަރިވަރުންނާއި، އޮސްޓްރޭލިއާ މީހުންނާއި، ވެކްސިން ފުރިހަމަކޮށްފައިވާ އެހެން ގައުމުތަކުގެ މީހުންނަށް ވެސް ފަހުން އެ ފުރުސަތު ހުޅުވާލާނެ އެވެ.
މިހާރު އޮންނަ ގޮތުން ނަމަ ގައުމަށް އެތެރެވާ ހުރިހާ އެންމެން ވެސް 10 ދުވަސް ކަރަންޓީން ފުރިހަމަ ކުރަން ޖެހެނީ ސިފައިންގެ ބެލުމުގެ ދަށުން ހާއްސަ ހޮޓަލްތަކެއްގަ އެވެ. އެކަމަށް ކަނޑައަޅާފައި ވަނީ އެންމެ 800 ކޮޓަރި އެވެ.
އެ އުސޫލަށް ގިނަ ރައްޔިތުންގެ ފާޑުކިޔުން އަމާޒުވި އިރު، ވިޔަފާރިވެރިން ވެސް ބުނީ ފަތުރުވެރިކަން ހުއްޓި، މަސައްކަތްތެރިން ލިބުމުގެ ދަތިކަމާ ކުރިމަތިވެފައިވާ ކަމަށެވެ.
ނިއުޒީލޭންޑުން އެންމެ ފުރަތަމަ ރޭވީ ޖެނުއަރީ މަހު ބޯޑަރާ ގުޅޭ ލުއިތައްދީ، އޭޕްރިލް މަހު އެއްކޮށް ހުޅުވާލާށެވެ. ނަމަވެސް އެ ނިންމުން ފަސްކުރީ އޮމިކްރޯން ވޭރިއެންޓާ ގުޅިގެންނެވެ.
އާޑޭން ވިދާޅުވީ ގައުމުގެ ވެކްސިން ޖަހާ ރޭޓް މަތިވުމާ އެކު، އާއްމު ހާލަތަށް ދިޔުމަށް މަގުފަހިވެފައިވާ ކަމަށެވެ. ނިއުޒީލޭންޑް އާބާދީގެ 95 ޕަސެންޓް ދެ ޑޯޒް ޖަހާފައިވާ އިރު، 30 ޕަސެންޓް މީހުން ވަނީ ތިން ވަނަ ޑޯޒެއް ޖަހާފަ އެވެ.
ފެބްރުއަރީ މަހުގެ ފަހުކޮޅަށް ދާއިރު، 92 ޕަސެންޓް މީހުންނަށް ތިން ވަނަ ޑޯޒް ދެވޭނެ ކަމަށް ސަރުކާރުން ލަފާކުރެ އެވެ.
