ދާކާ، ބަންގްލަދޭޝް (ފެބްރުއަރީ 2) - ބަންގްލަދޭޝްގެ ބާނީ އަދި ބޮޑު ވަޒީރު ޝެއިހް ހަސީނާގެ ބައްޕާފުޅު، ޝެއިހް މުޖީބުއްރަހްމާންގެ 100 ވަނަ އުފަން ދުވަހުގައި ކޭކުގެ ބަދަލުގައި ޕާން ފެޅި ދެ ޓީޗަރަކަށް އަދަބު ދީފި އެވެ.
ކޯޓުން ދެ ޓީޗަރުންނަށް އެންގީ އަދަބެއްގެ ގޮތުން މުޖީބުއްރަހްމާންގެ ފޮތްތަކެއް ކިޔުމަށެވެ. އެ މީހުން ދައުވާ ކުރީ ޑިޖިޓަލް ސެކިއުރިޓީ ގާނޫނުގެ ދަށުންނެވެ.
މިދިޔަ އަހަރު ބަންގްލަދޭޝްގައި މުޖީބުއްރަހްމާންގެ 100 ވަނަ ކުލަގަދަކޮށް ފާހަގަކުރި އެވެ. އެމަނިކުފާނަކީ ބަންގްލަދޭޝަށް މިނިވަންކަން ހޯދައިދެއްވި ގައުމީ ބަތަލެކެވެ.
އެ ދުވަހާ ދިމާކޮށް ބަންގްލަދޭޝްގެ ހުޅަނގު އުތުރުގައި ހުންނަ އިސްލާމީ ސްކޫލެއްގެ ދެ ޓީވަރުން ވަނީ ކުޑަ ޕާޓީއެއް ރާވައި، އެ ޕާޓީ ފޭސްބުކް މެދުވެރުކޮށް ލައިވްކޮށްފަ އެވެ.
ޕާޓީގައި ކޭކުގެ ބަދަލުގައި އެ މީހުން ފަޅާފައިވަނީ 12 ސެންޓަށް ދޭ ޕާނެއް ކަމަށާއި ހަޖޫ ޖެހުމުގެ ގޮތުން އެ ޕާން ކުދިންނަށް ބެހި ކަމަށް ދައުލަތުގެ ޕްރޮސެކިއުޓަރަކު އޭއެފްޕީއަށް ބުންޏެވެ.
ޝެއިހް ހަސީނާގެ އަވާމީ ލީގް ޕާޓީގެ މެމްބަރަކު އެ މައްސަލަ ކޯޓަށް ހުށަހެޅުމުން، ކުށް ސާބިތުވާ ކަމަށް ވަނީ ކަނޑައަޅާފަ އެވެ. އަދަބެއްގެ ގޮތުން މުޖީބުއްރަހްމާން ލިޔުއްވާފައިވާ ތިން ފޮތާއި އެމަނިކުފާނުގެ އޮޓޯބަޔޮގްރަފީ ކިޔުމަށް އެންގި އެވެ.
އޭގެ އިތުރުން ކޮންމެ ޓީޗަރަކު 20 ގަސް އިންދުމަށާއި ބަންގްލަދޭޝް އިން މިނިވަންކަން ހޯދަން 1971 ގައި ކުރި ހަނގުރާމައާ ގުޅޭ ތާރީހް ދަރިވަރުންނަށް ކިޔަވައިދިނުމަށް ވެސް އެންގި އެވެ.
ކުށް ސާބިތުވި ޓީޗަރުންގެ ތެރެއިން އެކަކު، އަބްދުސް ސަލާމް އޭއެފްޕީއަށް ބުނީ ކޭކުގެ ބަދަލުގައި ޕާން ފެޅީ ހަޖޫ ޖެހުމުގެ ގޮތުން ނޫން ކަމަށެވެ.
"މުޖީބުއްރަހްމާން ހަނދާން އާކޮށް އަޅުގަނޑުމެން ދުއާ ވެސް ކުރިން. ދަރިވަރުން ބޭނުންވީ ޕާޓީ ބާއްވަން. އަޅުގަނޑުމެން އުޅެނީ ދުރުގައި ހުންނަ ކުޑަ އަވަށެއްގައި. ޕާން ފަޅަން ޖެހުނީ ފިހާރައިން ކޭކު ލިބެން ނެތީމަ،" އުމުރުން 57 އަހަރުގެ ޓީޗަރު ބުންޏެވެ.
"އަޅުގަނޑުމެންގެ ހާލަތު ހުރި ގޮތުން އެގޮތަށް އެކަން ކުރީމާ ބަޔަކު ހިތްހަމަނުޖެހޭނެ ކަމަކަށް ހިޔެއް ނުކުރަން. އެހެން ހީކުރި ނަމަ، ޕާޓީ ލައިވްކޮށް ފޭސްބުކްއިން ނުދައްކާނެ. އެއީ ގަސްތުގައި ކުރި ކަމެއް ނޫން، އަޅުގަނޑުމެން ވާނީ މައާފަށް ވެސް އެދިފައި."
ބަންގްލަދޭޝް އިން 2018 ވަނަ އަހަރު ފާސްކުރި ޑިޖިޓަލް ސެކިއުރިޓީ ގާނޫނު ބޭނުންކޮށްގެން، ގިނަ ފަރާތްތަކާ މެދު ނުހައްގުން އަމަލުކުރާ ކަމުގެ ތުހުމަތު ކުރެވެ އެވެ.
