ދިވެހި ދެމަފިރިއެެއްގެ އަމިއްލަ ބްރޭންޑެއް ކަމަށްވާ "މުލަ" އަކީ އެސްއެމްއީ ބޭންކުގެ ކާމިޔާބީ އެއްކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައްޔިތުންގެ މަޖިލީސް ހުޅުވުގެ ޖަލްސާގައި ރިޔާސީ ބަޔާން ހުށަހަޅުއްވަމުން ރައީސް ވިދާޅުވީ ދެމަފިރިއެއް، ނުވަތަ ޒުވާން ދަރިއެއް ވިޔަސް، އާމްދަނީއެއް ލިބޭނެ އުފެއްދުންތެރި ކޮންމެވެސް މަސައްކަތެއްގައި އުޅޭ ދިވެހިން މިހާރު ގިނަ ކަމަށާއި އެއީ "ދުޅަހެޔޮ ދިވެހި ކުރިމަގަށް އޮތް ވަރަށް ބޮޑު އުންމީދެއް" ކަމަށެެވެ.
އަލަށް ފަށާ ވިޔަފާރި ކުރު މުއްދަތެއްގެ ތެރޭގައި ބަންދުކުރަން ޖެހެނީ ވިޔަފާރިތައް ހިފަހައްޓައި ދޭނެ މުގުލެެއް ނެތީމަ ކަން ފާހަކުރައްވާ ރައީސް ވިދާޅުވީ އެކަމުގެ ހައްލަކަށް އެސްއެމްއީ ބޭންކު ގާއިމު ކޮށްދެވި އޭގެ ރަނގަޅު ނަތީޖާ ފެންނަން ފަށާފައިވާ ކަމަށެެވެ.
އޭގެ މިސާލަކަށް ރައީސް ނެންގެވީ ޒުވާން ދެމަފިރިން ކަމަށްވާ އައިޝަތު ދީނާ އާއި ހުސައިން ނިމާލްގެ ހުވަފެން އެސްއެމްއީ ބޭންކުން ނެގި ލޯނުން ހަގީގަތަކަށް ވެގެން ދިޔަ ދިއުމެވެ.
އެ ދެމަފިރިންގެ ބްރޭންޑު "މުލަ" ގެ ނަމުގާ އުފައްދާ ތެރަޕިއުޓިކް މިއުފެއްދުން، އޮސްޓްރޭލިއާގެ ރަސްމީ އިދާރާއަކުން ސެޓިފައި ވެގެން ދިއުމަކީ، އެސްއެމްއީ ބޭންކާ ގުޅިފައިވާ ބޮޑު ކާމިޔާބެއްކަން ރައީސް ވަނީ ފާހަގަ ކުރައްވައިފަ އެވެ.
"މިދެންނެވި އެސްއެމްއީ ބޭންކްގެ ލޯނަކުން ފެށި ވިޔަފާރި ކާމިޔާބު ކަމާއެކު ފުޅާވެ ކުރިއަރަމުން އެބަދޭ، ދީނާ އަދި ނިމާލް ފަދައިން ސަރުކާރުގާ ވެސް، ހުވަފެނެއް އެބައޮތް، އެއީ އެފަދަ އެތަކެއް ސަތޭކަ ނުވަތަ ހާސް ކުދި ވިޔަފާރި ރާއްޖޭގާ ފެށި ހިނގަމުން ދިއުން، އެއަށްވުރެ ވަކި ވަރުގަދަ އިގުތިސޯދީ ހަރަކާތެއް ސަރުކާރުން ގައުމަކަށް ގެނެހެއް ނުދެވޭނެ،" ރައީސް ވިދާޅުވި އެވެ.
ދިވެހި ޒުވާނުންނާއި ހުނަރުވެރިންގެ މަސައްކަތާއި ވިޔަފާރި ބައިނަލް އަގުވާމީ ބާޒާރަށް ހުޅުވާލުމުގައި އޮތް ހުރަހަކީ "ޕޭމަންޓް ގޭޓްވޭ" އެއް ނެތުން ކަމަށާއި އެކަން ހައްލުކޮށް ދެއްވާނެ ކަމަށް ރައީސް ވިދާޅުވި އެެވެ.
ރާއްޖޭގެ ހުރިހާ އަތޮޅެއް ހިމެނޭހެން 144 ރަށެއްގާ ކުދި ވިޔަފާރި ހިންގުމަށް މިހާތަނަށް 741 ވިޔަފާރިއަކަށް 739 މިލިއަން ރުފިޔާގެ ލޯނު އެސްއެމްއީ ބޭންކުން މިހާތަނަށް ދޫކޮށްފައިވާކަން ރައީސް ފާހަގަ ކުރެއްވި އެވެ.
