ދަރިމައިވުމަށް ދިމާވާ ތަފާތު މައްސަލަތަކާ ގުޅޭ މައުލޫމާތު ދިނުމަށްޓަކައި ފާޓިލިޓީ ސަޕޯޓް ކޮމިއުނިޓީގެ ފަރާތުން ހާއްސަ ސެޝަންއެއް ބޭއްވުމަށް ހަމަޖެހިއްޖެ އެވެ.
މި ސެޝަންގައި ބައިވެރިންނަށް މައުލޫމާތު ދެއްވާނީ އަމްރިތާ ހޮސްޕިޓަލުގެ އެސޯސިއޭޓް ޕްރޮފެސާ އަދި އަމްރިތާ ފާޓިލިޓީ ސެންޓާގެ ޔުނިޓް ހެޑް ޑރ. އަވްނީ ޕިއްލޭ އެވެ.
ފާޓިލިޓީ ސަޕޯޓް ކޮމިއުނިޓީގެ ފަރާތުން މައުލޫމާތުދޭ ގޮތުގައި މި ސެޝަންއަކީ ދަރިމައިވުމުގެ މައްސަލަތައް ހުރި ފަރާތްތަކަށް އެއްވެސް އަގަކާ ނުލާ ކަމުގެ މާހިރަކާ ބައްދަލުކޮށް, ލިބެން ހުރި ފަރުވާތަކާއި ހައްލުތަކާ ބެހޭ ގޮތުން ވާހަކަ ދައްކާލުމަށް ލިބޭނޭ ރަނުގެ ފުރުސަތެކެވެ.
އަމްރިތާ ހޮސްޕިޓަލުގެ ރިޕްރޮޑަކްޓިވް ހެލްތު ޑިޕާޓްމަންޓުގެ ފައުންޑާ މެންބަރު ކަމުގައިވާ ޑރ. އަވްނީ ޕިއްލޭ ވަނީ އިންފާޓިލިޓީ އާއި ގައިނޮކޮލޮޖީ އެންޑް އޮބްސްޓެޓްރިކްސްއިން 13 އަހަރުގެ ތަޖުރިބާ ހާސިލްކުރައްވާފަ އެވެ. އަދި އޭނާއަކީ 2021 އިން 2024 ގެ ނިޔަލަށް ފެެޑެރޭޝަން އޮފް އޮބްސްޓެޓްރިކް އެންޑް ގައިނޮކޮލޮޖިކަލް ސޮސައިޓީސް އޮފް އިންޑިއާގެ (އެފްއޯޖީއެސްއައި) ނެޝެނަލް އެގްޒެކެޓިވް ކޮމިޓީ މެންބަރެއްވެސް މެއެވެ. ޑރ.އަވްނީގެ ސްޕެޝަލިޓީސްގެ ތެރޭގައި ރިކަރަންޓް އައިވީއެފް ފެއިލިއާ, އޯވޭރިއަން ރިޒާވް ދަށްވުން, އެންޑޯމެޓްރިއޯސިސް, ޕީސީއޯއެސް އަދި ފިރިހެނުންގެ ކިބައިން ފެންނަ ދަރިމައިވުމުގެ މައްސަލަތައްވެސް ހިމެނެ އެވެ.
"ދަރިމައިވުމުގެ މައްސަލަތައް ދިމާވާ އާންމު ސަަބަބުތަކާއި ލިބެން ހުރި ފަރުވާތައް" މި މައުޝޫގެ ދަށުން ކުރިއަށްގެންދާ މި ސެޝަންގައި ޑރ.އަވްނީގެ ހާއްސަ ޕްރެޒެންޓޭޝަނެއްގެ އިތުރުން ބައިވެރިންގެ ސުވާލުތަކަށް ޖަވާބުދިނުންވެސް އޮންނާނެ އެވެ.
މި މަހުގެ ހަތްވަަނަ ދުވަހު ޝީ ބިލްޑިންގައި ބޭއްވުމަށް ހަމަޖެހިފައިވާ މި ސެޝަންގައި ބައިވެރިވުމަށްޓަކައި ރެޖިސްޓާވުމުގެ ފުރުސަތު މިހާރު ވަނީ ހުޅުވާލާފަ އެވެ. ޖަމިއްޔާގެ ހަރަކާތެއްގައި މުޅިން އަލަށް ބައިވެރިވާނަމަ ރެޖިސްޓްރޭޝަން ފޯމާ އެކު މެންބަޝިޕް ފޯމްވެސް ފުރިހަމަ ކުރަންޖެހޭ ކަމަށް ފާޓިލިޓީ ސަޕޯޓް ކޮމިއުނީޓީ އިން ބުނެ އެވެ.
މި މައުލޫމާތު ބައްދަލުވުމަކީ ސޮސައިޓީ ފޯ ހެލްތް އެޑިއުކޭޝަން (ޝީ) އަދި ’އަދަދު‘ އާއި ގުޅިގެން ކުރިއަށްގެންދެވޭ ހަރަކާތެކެވެ.
މިދިޔަ އަހަރުގެ ޖެނުއަރީގައި ރަޖިސްޓްރީވި ފާޓިލިޓީ ސަޕޯޓް ކޮމިއުނިޓީއިންވަނީ މީގެކުރިން ވެސް މިފަދަ މައުލޫމާތު ބައްދަލުވުންތަކާއި ކައުންސިލިން ސެޝަންތަކުގެ އެހީގައި ދަރިމައިވުމުގެ މައްސަލަތައް ހުރި ގިނަ ބަޔަކަށް އެކި ގޮތްގޮތުން އެހީތެރިކަން ފޯރުކޮށްދީފަ އެވެ.
