ކާބުލް، އަފްގާނިސްތާން (ފެބްރުއަރީ 2) - މި ހަފްތާގެ ކުރީކޮޅު "ގެއްލުނު" އަފްގާނިސްތާނުގެ ދެ ނޫސްވެރިން މިނިވަންކޮށްފި އެވެ.
އެރިއާނާ ޓީވީގެ ވާރިސް ހަސްރަތު އާއި އަސްލަމް ހިޖާބް ގެއްލުނީ ހޯމަ ދުވަހު އެވެ. އަފްގާން މީޑިއާ އެސޯސިއޭޝަނުން ބުނީ ތާލިބާނުން އެ މީހުން ހައްޔަރު ކުރީ ކަމަށެވެ.
އެ މީހުންނާ ގުޅޭ މައުލޫމާތެއް ނޭނގޭ ކަމަށް ތާލިބާނުންގެ ތަރުޖަމާނު ބުނި ނަމަވެސް، އދ. އާއި އެމްނެސްޓީ އިންޓަނޭޝަނަލުން ވެސް ބުނީ އެކަމުގެ ފަހަތުގައި ތިބީ ތާލިބާނުން ކަމަށެވެ.
އެރިއާނާ ނިއުސްގެ ނިއުސް އެޑިޓަރު އަލީ އަސްގަރީ އޭއެފްޕީއަށް ބުނީ ތާލިބާނުން ދެ ނޫސްވެރިން މިނިވަންކޮށްފައިވާ ކަމަށެވެ. ސަލާމަތީ ސަބަބުތަކަށްޓަކައި އިތުރު މައުލޫމާތެއް ދެވެން ނެތް ކަމަށް ވެސް ބުންޏެވެ.
ގެއްލުނު ނޫސްވެރިންތައް ދޫކޮށްލާފައިވާ އިރު މީގެ ދެ ހަފްތާ ކުރިން އަންހެނުންގެ ހައްގުތަކަށް ވަކާލާތު ކުރާ ދެ އެކްޓިވިސްޓުން ވެސް ވީނުވީއެއް ނޭނގި ގެއްލުނެވެ.
އދ. ގެ އިންސާނީ ހައްގުތަކާ ގުޅޭ ހައި ކޮމިޝަނުން ބުނީ ދެ އެކްޓިވިސްޓުންނާއި އެ މީހުންނާ އެކު ގެއްލިފައިވާ އާއިލާގެ ހަތަރު މީހުންގެ ހާލަތާ މެދު ކަންބޮޑުވާ ކަމަށެވެ.
އެ މީހުން ވީ ތަނެއް ނޭނގޭ ކަމަށް ތާލިބާނުން ބުނެފައިވާ އިރު، ތަހުގީގެއް ހިންގަމުންދާ ކަމަށް ބުނެފައިވެ އެވެ.
ތާލިބާން ސަރުކާރަށް ފާޑުކިޔާ ޔުނިވާސިޓީ ލެކްޗަރާއެއް ވެސް މިދިޔަ މަހު ހައްޔަރު ކުރި އެވެ. ފިއްތުންތައް ކުރިމަތިވުމުން އޭނާ ފަހުން ދޫކޮށްލި އެވެ.
