ޕެރިސް، ފްރާންސް (ފެބްރުއަރީ 2) - ކޮވިޑާ ގުޅިގެން އަޅާފައިވާ ފިޔަވަޅުތަކަށް ލުއި ދޭން ފަށައި، ބޭރުގައި އުޅޭ އިރު މާސްކް އަޅަން ނުޖެހޭ ގޮތަށް ފްރާންސްއިން ހަމަޖައްސައިފި އެވެ.
ކޮންސެޓް ހޯލްތަކާއި، ކުޅިވަރު މެޗްތަކާއި އެހެން އިވެންޓްތަކުގެ އޯޑިއެންސް ލިމިޓްކޮށްފައި އޮތް އޮތުން ވެސް ބުދަ ދުވަހުން ފެށިގެން ވަނީ އުވާލާފަ އެވެ. ގޭގައި ތިބެގެން މަސައްކަތް ކުރުން މަޖުބޫރު ނަމަވެސް، ސަރުކާރުން އަދިވެސް ހިތްވަރު ދެނީ އެ ގޮތް އިހްތިޔާރް ކުރުމަށެވެ.
ޖެނުއަރީ މަހު ފްރާންސްގައި ރެކޯޑް އަދަދަށް ކޮވިޑް ކޭސްތައް ރިޕޯޓު ކުރި ނަމަވެސް، އެ މަހުގެ ފަހުކޮޅު ސަރުކާރުން ނިންމީ ދެ މަރުހަލާއަކަށް ބަހާލައިގެން ފިޔަވަޅުތަކަށް ލުއިދޭން ފެށުމަށެވެ. ފްރާންސްގެ އިތުރުން އިނގިރޭސިވިލާތާއި ޑެންމާކް އަދި ނޯވޭއިން ވެސް ވަނީ ލުއިދޭން ފަށާފަ އެވެ.
ފްރާންސްއިން "ހެލްތް ޕާސް" ގެ ބަދަލުގައި "ވެކްސިނޭޝަން ޕާސް" ތައާރަފްކޮށްފައި ވާތީ، ކޮވިޑާ ގުޅިގެން އަޅާފައިވާ ގިނަ ފިޔަވަޅުތައް ފެބްރުއަރީ މަހު އުވާލެވޭނެ ކަމަށް ސަރުކާރުން ދެކެ އެވެ.
"ވެކްސިނޭޝަން ޕާސް"ގެ ދަށުން އާއްމު ދިރިއުޅުމުގެ ގިނަ ކަންކަން ކުރެވޭނީ ވެކްސިން ފުރިހަމަކޮށްފައިވާ މީހުންނަށެވެ. އެގޮތުން ބާތަކާއި ރެސްޓޯރެންޓްތަކަށް ވަނުމަށާއި ދުރު ތަންތަނަށް ދަތުރު ކުރަން ވެސް އެ ޕާސް ބޭނުންވެ އެވެ.
މީގެ ކުރިން ބޭނުން ކުރި "ހެލްތު ޕާސް"ގެ ދަށުން ކޮވިޑަށް ނެގެޓިވް ނަތީޖާއެއް އޮތް ނަމަ އާއްމު ދިރިއުޅުމުގެ ކަންކަމަށް ހުރަހެއް ނޯވެ އެވެ. ނަމަވެސް އާބާދީގެ ގިނަ މީހުން ވެކްސިން ޖަހާނެ ގޮތް ހެދުމަށް ސަރުކާރުން ނިންމީ އެ ހުއްދަ އުވާލުމަށެވެ.
