މިހްތަރްލަމް، އަފްގާނިސްތާން (ފެބްރުއަރީ 2) - މިދިޔަ އޯގަސްޓް މަހު ތާލިބާނުން ވެރިކަމަށް އައި ފަހުން އަފްގާނިސްތާނުގެ ޕަބްލިކް ޔުނިވާސިޓީތައް ފުރަތަމަ ފަހަރަށް ހުޅުވާލައިފި އެވެ.
ތާލިބާނުން ވެރިކަމަށް އައި ގޮތަށް އެންމެ ފުރަތަމަ ވެސް ބަންދު ކުރީ ޕަބްލިކް ޔުނިވާސިޓީތަކާއި އަންހެން ދަރިވަރުންގެ ސެކަންޑަރީ ސްކޫލްތަކެވެ. އެހެންވެ، އަންހެނުންނަށް ކިޔެވުމުގެ ހައްގު ގެއްލޭނެކަމުގެ ބިރު ބޮޑުވި އެވެ. މީގެ ކުރިން 1996 އިން 2001 އަށް ތާލިބާނުން ވެރިކަން ކުރިއިރު ވެސް އަންހެނުންނަށް ތައުލީމު އުނގެނުމުގެ ހައްގެއް ނުލިބެ އެވެ.
"ކްލާސްތައް ފެށުމަކީ ވަރަށް އުފާވެރި ކަމެއް،" ނަންގަރްހާރް ޔުނިވާސިޓީގައި ގާނޫނާއި ޕޮލިޓިކަލް ސައިންސް ކިޔަވާ ޒަރްލަޝްތާ ހަގްމަލް އޭއެފްޕީއަށް ބުންޏެވެ.
"އެކަމަކު އަދިވެސް ތާލިބާނުން ކުއްލިއަކަށް ކްލާސްތައް ހުއްޓުވަފާނެތީ ކަންބޮޑުވޭ."
ތާލިބާން އޮފިޝަލުން ބުނީ ލަގްމަން، ނަންގަރްހާރް، ކަންދަހާރް، ނިމްރޯޒް، ފަރާހް އަދި ހެލްމަންދް ޕްރޮވިންސްގެ ޕަބްލިކް ޔުނިވާސިޓީތައް ބުދަ ދުވަހު ހުޅުވާފައިވާ ކަމަށެވެ.
ފެބްރުއަރީ މަހުގެ ފަހުކޮޅު، އިތުރު ސަރަހައްދުތަކުގެ ޕަބްލިކް ޔުނިވާސިޓީތައް ވެސް އަލުން ހުޅުވާލާނެ އެވެ.
ނަމަވެސް ރިޕޯޓުތައް ބުނާ ގޮތުން ޔުނިވާސިޓީތަކަށް އެނބުރި ގޮސްފައިވަނީ މަދު އަދަދެއްގެ އަންހެން ދަރިވަރުންނެވެ. އެގޮތުން މިއަދު ހެނދުނު ލަގްމަން ޔުނިވާސިޓީ ތެރެއަށް ވަނީ އެންމެ ހަ އަންހެން ދަރިވަރުން ކަމަށް އޭއެފްޕީން ބުންޏެވެ. ހުރިހާ ދަރިވަރުން ވެސް ތިބީ މޫނު އެއްކޮށް ނިވާވާ ބުރުގާ އަޅައިގެންނެވެ.
އެ ޔުނިވާސިޓީގެ މައި ދޮރާށި ކައިރީގައި ތާލިބާން ހަނގުރާމަވެރިން ފޯރިމަރަން ތިބީ ބޮޑު މެޝިން ބަޑިއެއް ޓްރައިޕޮޑެއްގައި ހަރުކޮށްގެންނެވެ.
ޔުނިވާސިޓީގެ މުވައްޒަފަކު ބުނީ ކްލާސްތައް ކުރިއަށް ދާނީ އަންހެނުންނާއި ފިރިހެނުން ވަކިކޮށްގެން ކަމަށެވެ. އެގޮތުން އަންހެނުންގެ ކްލާސްތައް ހެނދުނު ގަޑިއަށް ހަމަޖައްސާފައިވާ އިރު، ފިރިހެނުންގެ ކްލާސްތައް ފަށާނީ މެންދުރު ފަހެވެ.
ތާލިބާނުން ބުނެފައި ވަނީ އަންހެނުންނަށް ތައުލީމު އުނގެނުމުގެ ހައްގު ދޭން އެ މީހުން ދެކޮޅު ނޫން ކަމަށެވެ. އެކަމަކު ކަރިކިއުލަމް އޮންނަން ޖެހޭނީ އިސްލާމީ އުސޫލުގެ މައްޗަށް ކަމަށާއި ކްލާސްތައް ބާއްވަން ޖެހޭނީ ދެ ޖިންސުގެ ދަރިވަރުން ވަކިކޮށްގެން ކަމަށް ބުންޏެވެ.
