ނިޔަތަކީ ގދ. ކާޑެއްދޫ އެއާޕޯޓާއި ހަވާލުވެ އެ އެއާޕޯޓު ތަރައްގީކޮށް ހިންގުން ކަމަށް ވިލާ އެއާ އިން ބުނެފި އެވެ.
ވިލާ އެއާ އިން ކާޑެއްދޫ އެއާޕޯޓު އަނބުރާ ހޯދުމަށް ކުރި މަސައްކަތް ސުޕްރީމް ކޯޓުން ކާމިޔާބު ކުރިތާ އަށް މަސް ދުވަސް ފާއިތުވެފައި ވާއިރު، އަދިވެސް އެ އެއާޕޯޓު ހިންގަމުން ގެންދަނީ ރިޖަނަލް އެއާޕޯޓްސް އިންނެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ވިލާ އެއާ އަށް ކާޑެއްދޫ އެއާޕޯޓް 2013 ވަނަ ހަވާލުކޮށްފައިވަނިކޮށް، ސިވިލް އޭވިއޭޝަން މިންގަނޑުތަކަށް ނުފެތޭ ގޮތަށް އެއާޕޯޓް ހިިންގާ ކަމަށް ބުނެ 2017 ވަނަ އަހަރު އެއްބަސްވުން ބާތިލްކުރި އެވެ. ސުޕްރީމް ކޯޓުން ވިލާ އެއާ އާ އެއްކޮޅަށް އެ މައްސަލަ ނިންމީ މިދިޔަ އަހަރުގެ މޭ މަހު އެވެ.
ވިލާ އެއާގެ މެނޭޖިން ޑިރެކްޓަރު އަބްދުﷲ ނާޝިދު ވިދާޅުވީ އެއާޕޯޓާ އެ ކުންފުނިން ހަވާލުވުމާ ގުޅޭ ކަންކަން ޓްރާންސްޕޯޓް މިނިސްޓްރީ އާއެކު މިހާރު ވެސް ކުރިއަށް ދާ ކަމަށެެވެ.
"ދެހާސް ތޭރަ ވަނަ އަހަރުން ފެށިގެން މިއަދާ ހަމައަށް ވެސް ވިލާ އެއާގެ އިންޓެންޝަން އަކީ އެއާޕޯޓާ ހަވާލުވުން، އެކަން ކުރިއަށް އެބަދޭ،" ނާޝިދު ވިދާޅުވި އެެވެ.
ވިލާ އެއާ އިން ކާޑެއްދޫ އެއާޕޯޓާ ހާވާލު ނުވެ އޮތީ އެއާޕޯޓާ އެކު ފަޅު ރަށެއް ނުލިބޭތީ ކަމަކަށް ދެކެވޭ ވާހަކަ އާ ގުޅޭ ގޮތުން ސުވާލު ކުރުމުން ސިދާ ޖަވާބެއް ނުދެއްވާ ނާޝިދު ވިދާޅުވީ "ސުޕްރީމް ކޯޓުގެ ހުކުން ސާފު" ކަމަށެވެ.
ކާޑެއްދޫ އެއާޕޯޓު ވިލާ އެއާ އަށް ހަވާލުކުރުން ލަސްވާ ސަބަބާ ބެހޭގޮތުން ޓްރާންޕޯޓް މިނިސްޓްރީން އެންމެ ފަހުން ބުނެފައިވަނީ އެކަން ހަމަނުޖެހި ލަސްވަނީ އެ އެއްބަސްވުމުގައި ހިމެނޭ ފަޅު ރަށެއް މިހާރު ހިމާޔަތްކޮށްފައި އޮތުމުން ކަމަށެވެ.
މަރާމާތުކޮށް ނުބެލެހެއްޓުމުގެ ސަބަބުން ކާޑެއްދޫ އެއާޕޯޓު މިހާރު ވަނީ ވަރަށް ބޮޑަށް ހަލާކުވެފަ އެވެ.
ކާޑެއްދޫ އެއާޕޯޓަކީ ރާއްޖޭގެ އެތެރޭގެ ވައިގެ ދަތުރުފަތުރުގެ ހިދުމަތްދޭ ކުންފުނިން ހިންގަން ހަވާލުވާ ދެވަނަ އެއާޕޯޓެވެ. ދެން އޮތް މާމިނގިލީ އެއާޕޯޓް ތަރައްގީކޮށް ހިންގަނީ ވިލާ އެއާ އިންނެވެ.
