އޭޝިއާގެ މައި އިދާރާ އޭއެފްސީގެ ބެލުމުގެ ދަށުން ރާއްޖޭން ހޯސްޓްކުރި ބައިނަލްއަގުވާމީ ފުޓްބޯޅަ މުބާރާތަކީ 2014 ވަނަ އަހަރުގެ އޭއެފްސީ ޗެލެންޖް ކަޕް އެވެ. އެ ފަހަރުގެ މުބާާރާތުގައި ރާއްޖޭގެ ގައުމީ ޓީމާ ހަވާލުވެހުރި، ކްރޮއޭޝިއާގެ ކޯޗު ޑްރާގޯ މަމިޗް ވަނީ ތަޖުރިބާ މަދު ނަމަވެސް ޒުވާން ޑިފެންޑަރު އަމްދާން އަލީ (އެންޑީ) އަށް އެ ވަގުތު ގައުމީ ޓީމުން ފުރުސަތު ދީފަ އެވެ.
އެއީ އެންޑީގެ ކެރިއަރުގެ އެންމެ ފޯމުގައި ކުޅެމުން އައި ދުވަސްވަރެވެ. އޭރު ކުޅެމުން އައި ލެވަލާ ގާތަށް ވެސް އެންޑީގެ ފަރާތުން މި ފަހުގެ ތާރީހުގައި ކުޅުމެއް ފެނުނީ ދާދި ފަހުން ނިމުނު ޕްރެޒިޑެންޓްސް ކަޕްގައި ކްލަބް ވެލެންސިއާ ޖޯޒީގަ އެވެ. މިއީ އެންޑީ ދެކޭ ގޮތުގައި ކެރިއަރުގެ އާ ފެށުމެކެވެ.
އެންޑީ އަކީ 2011 ވަނަަ އަހަރުގެ ޔޫތު ޗެމްޕިއަންޝިޕް ކާމިޔާބުކުރި މާޒިޔާ ސްޕޯޓްސް އެންޑް ރެކްރިއޭޝަން ޓީމުން ވިދާލި ކުޅުންތެރިއެކެވެ. ފަހުން މާޒިޔާ ސީނިއާ ޓީމުގައި ހިމެނި 2014 ވަނަ އަހަރުގެ އޭއެފްސީ ޗެލެންޖު ކަޕުގެ ސްކޮޑުގައި ހިމެނި ޓީމުގެ ފުރަތަމަ އެގާރައިން ވެސް ފުރުސަތު ހޯދި އެންޑީ އަކީ ޖެހިގެން އައި އަަހަރުތަކުގައި މާޒިޔާ އާއި ގައުމީ ޓީމުގެ ޑިފެންސްގެ މުހިންމު ތަނބެކެވެ. މާޒިޔާގައި ރާއްޖޭގެ ހުރިހާ މުބާރާތެއް ކާމިޔާބުކުރި އެވެ.
ޕްރެޒިޑެންޓްސް ކަޕްގެ ފައިނަލް މެޗުގެ ތެރެއިން މާޒިޔާގެ ކޯނޭ (ކ) އަތުން ބޯޅަ ހޯދަން ވެލެންސިއާގެ އެންޑީ މަސައްކަތްކުރަނީ.-- ފޮޓޯ: އަބްދުﷲ އަބީދު/ އަދަދު
ރަނގަޅު ފޯމެއްގައި އިތުބާރާ އެކު ކުޅެމުން އައި އެންޑީގެ ކެރިއަރު ބުރަކި ޖެހުނު ހިސާބަކީ 2017 ވަނަ އަހަރުގެ ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅުނު މެޗުގައި ކަނާތު ކަކުލަށް ލިބުނު ސީރިއަސް އަނިޔާއާ ހެދި އެވެ.
އެ އަނިޔާއިން ރިކަވާވެގެން އަށް މަހަށް ވުރެ ގިނަ ދުވަސް ފަހުން އެންޑީ އެނބުރި ދަނޑަށް އަ އެވެ. އެކަމަކު، މިދިޔަ ހަތަރު ވަރަކަށް އަހަރު އެންޑީ އަށް ދިޔައީ އެއް ފެންވަރެއްގައި ކުޅުން ދެމެހެއްޓުމުގައި ހައްލެއް ނުހޯދި އެވެ. މާޒިޔާ ފުރަތަމަ އެގާރައިން މަގާމު ދެމެހެެއްޓުން ވެސް ވީ އުނދަގޫ ކަމަކަށެވެ. ގިނަ މެޗުތަކުގައި އިނީ ބެންޗުގަ އެވެ.
މިދިޔަ ސީޒަނަށް ފަހު މާޒިޔާ ދޫކޮށްލަން ނިންމައި، ހދ. ނޮޅިވަރަމް އަށް އުފަން އެންޑީ ދިޔައީ އާ ކްލަބެއް ހޯދަމުންނެވެ.
"މާޒިޔާ ދޫކޮށްލާކަން އެނގިގެން، ކީޕަރު ފައިސަލް، ކްލަބް ވެލެންސިއާގެ މެނޭޖްމަންޓާ ވާހަކަ ދައްކައިގެން ލިބުނު ފުރުސަތެއް މިއީ. ކެރިއަރުގެ މި ހިސާބަށް ބަލާއިރު ވަރަށް ރަނގަޅު މޫވްއެއް މިއީ. ވަރަށް ސަޅިކޮށް ވެލެންސިއާގެ ކަންކަން މި ދަނީ،" އެންޑީ މިހާރު ކުޅެމުން އަންނަ ވެލެންސިއާއާ ބެހޭގޮތުން "އަދަދު" އަށް ބުންޏެވެ.
ވެލެންސިއާ އިން މި ސީޒަން ފަށަން ޖެހުނީ ޗެރިޓީ ޝީލްޑް މެޗުގައި މާޒިޔާ އަތުން 5-0 އިން ބަލިވެގެންނެވެ. އެކަމަކު، އޭގެ ފަހުން ފެށި، ސީޒަންގެ ފުރަތަމަ މުބާރާތް ކަމަށްވާ، ޕްރެޒިޑެންޓްސް ކަޕްގެ ޗެމްޕިއަންކަން ވެލެންސިއާ އިން މެޗަކުން ބަލިނުވެ ހޯދީ ފައިނަލު ހިމެނޭ ގޮތަށް ދެ މެޗުން މާޒިޔާ ބަލިކޮށްގެންނެވެ. ލީގު ބުރުގައި 1-0 އިން ބަލިކުރިއިރު، ރ. އަލިފުށީ ޓާފް ދަނޑުގައި ކުޅުނު ފައިނަލުގައި ވެލެންސިއާ މޮޅުވީ 2-1 އިންނެވެ.
މެޗަކުން ބަލިނުވެ، ވެލެންސިއާ އިން ޕްރެޒިޑެންޓްސް ކަޕް ކާމިޔާބުކުރިއިރު، ޓީމުގެ އެންމެ މުހިންމު ޑިޕާޓްމަންޓެއްގެ ގޮތުގައި ވެލެންސިއާގެ އެސިސްޓަންޓް ކޯޗު އިސްމާއިލް އާސިފް (ކުޑަހީނާ) ފާހަގަކުރީ ޑިފެންސްލައިނެވެ. ކުޑަހީނާ ބުނީ "ޑިފެންސް މޮޅަށް ކުޅެގެން ނޫނީ ތަށްޓެއް ނުހޯދޭނެ" ކަމަށެެވެ.
ގައުމީ ޕްރެކްޓިހުގެ ތެރެއިން އެންޑީ.-- ފޮޓޯ: އިބްރާހިމް ފާއިދު/ އެފްއޭއެމް
ވެލެންސިއާގެ ޑިފެންސްތެރޭގައި ޓެކްޓިކަލް ޑިސިޕްލިން ހިފަހައްޓައިގެން އެންޑީ ކުޅުނު ކުޅުން ކުޑަހީނާ ވެސް ފާހަގަކުރި އެވެ.
"ކޮންފިޑެންސް އޮތް އަސްލު ފުރަތަމަ މެޗު (ޗެރިޓީ ޝީލްޑް މެޗު) އެހެން ވިޔަސް ޓީމު އެއްކޮށް މަސައްކަތް ކުރަން ފަށައިފިއްޔާ ކަންކަން ރަނގަޅުކުރެވޭނެ ކަން. ޕްރެޒިޑެންޓްސް ކަޕް މެޗަކަށް ފަހު މެޗެއް ދިޔައީ ރަނގަޅަށް. ލީގު ބުރުގައި މާޒިޔާއާ ކުޅުނު ގޮތަށް ފައިނަލްގައި ވެސް ކުޅުނީ އެ ކޮންފިޑެންސާ އެކު މޮޅުވެވޭނެ ކަމުގެ ޔަގީންކަމާ އެކު،" އެންޑީ ބުންޏެވެ.
ވެލެންސިއާގައި ދެއްކި މޮޅު ކުޅުމާ އެކު އެންޑީ އަށް ވަނީ ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯ، މި ފަހަރު ޕްރެކްޓިސް ކުރަން ނެގި ގައުމީ ސްކޮޑުން ޖާގަ ލިބިފަ އެވެ. މިއީ 2017 ވަނަ އަހަރު އޭޝިއަން ކަޕް ކޮލިފައިންގައި ފަލަސްތީނާ ދެކޮޅަށް ކުޅުނު މެޗަށް ފަހު އެންޑީ އަށް ގައުމީ ޓީމުގައި ހިމެނުނު ފުރަތަމަ ފަހަރެވެ.
އުމުރުން 29 އަހަރުގެ އެންޑީ ބުނީ ކެރިއަރުގެ މުހިންމު ހިސާބެއްގައި ގައުމީ ޖޯޒީގައި ޓްރެއިން ކޮށްލަން ފުރުސަތު ލިބުން ދެކެނީ "އާ ފެށުމެއް"ގެ ގޮތުގައި ކަމަށެވެ. އަދި އުއްމީދަކީ މީގެ ބޭނުން ހިފައިގެން ރަނގަޅު ކުޅުން ދެމެހެއްޓުން ކަމަށް އެންޑީ ބުނެފައިވެ އެވެ.
އަންނަ ހަފްތާގައި ފަށާ ދިވެހި ޕްރިމިއާ ލީގުގައި ވެލެންސިއާ ކުޅޭ ފުރަތަމަ މެޗުގައި އަންނަ އާދިއްތަ ދުވަހުގެރޭ ކުޅޭނީ ޔުނައިޓެޑް ވިކްޓްރީ (ޔޫވީ)އާ އެވެެ. މި ސީޒަނަކީ ވެލެންސިއާ އަށް އިންޓަނޭޝަނަލް ލެވަލަށް ބަލާއިރު ވެސް މުހިންމު އަހަރެކެވެ. އޭއެފްސީ ކަޕްގެ ކޮލިފައިންގައި ރާއްޖޭން ވާދަކުރަނީ ވެލެންސިއާ އެވެ. ވެލެންސިއާ އިން އޭއެފްސީ ކަޕްގެ ކޮލިފައިން ފުރަތަމަ ބުރުގައި ކުޅޭނީ ބޫޓާންގެ ޗެމްޕިއަން ޕާރޯ އެފްސީއާ އެވެ.
