ވެލިންގްޓަން، ނިއުޒީލޭންޑް (ފެބްރުއަރީ 1) - ނިއުޒީލޭންޑްގެ މާބަނޑު ނޫސްވެރިޔަކު ވިހަން ގައުމަށް އެތެރެވާން މަސައްކަތްކޮށް ކާމިޔާބު ނުވުމުން އަފްގާނިސްތާނުގެ ތާލިބާނުން އޭނާއަށް ހިމާޔަތް ދީފައި ވަނިކޮށް، ނިއުޒީލޭންޑަށް އެތެރެވުމުގެ ހުއްދަ ދީފި އެވެ.
ޗާލޮޓް މަސައްކަތް ކުރަމުން ދިޔައީ އަފްގާނިސްތާނުގަ އެވެ. އޭނާގެ ލޯބިވެރިޔާ އަދި ފޮޓޯގްރާފަރު ޖިމް ހައިލެބްރޮއެކް ވެސް ހުންނަނީ އޭނާއާ އެކު އެ ގައުމުގަ އެވެ.
އޭނާ މާބަނޑުކަން އެނގުނީ އަފްގާނިސްތާން ދޫކޮށް، ގަތަރުގެ ދޯހާގައި ހުންނަ އަލްޖަޒީރާގެ މައި އޮފީހުގައި މަސައްކަތް ކުރަން ފެށި ފަހުންނެވެ.
ކައިވެނީގެ ބޭރުން މާބަނޑުވުމަކީ ގަތަރުގައި ގާނޫނީ ކުށަކަށް ވާތީ، އޭނާ އެކަން ސިއްރު ކުރުމަށް ފަހު، ވިހަން ދާން ނިންމީ އުފަން ގައުމު ނިއުޒީލޭންޑަށެވެ.
ނަމަވެސް ނިއުޒީލޭންޑުން ކޮވިޑާ ގުޅިގެން އަޅާފައިވާ ހަރުކަށި ބޯޑަރު ފިޔަވަޅުތަކުގެ ދަށުން އޭނާއަށް ވިހަން ގައުމަށް އެތެރެ ނުވެވޭނެ ކަމަށް އެންގި އެވެ. ޗާލޮޓް އާއި ހައިލެބްރޮއެކްގެ ވިސާ ދެން އޮތީ ގަތަރުގެ އިތުރުން އަފްގާނިސްތާނަށެވެ.
އެހެންވެ، އޭނާ ނިންމީ ތާލިބާނުންގެ އިސް ވެރިންނަށް ގުޅުމަށެވެ. ތާލިބާނުން ޗާލޮޓްއަށް އެންގީ އަފްގާނިސްތާނުގައި ވިހެއުމުގެ ކަންކަމަށް އެއްވެސް ހުރަހެއް ނެތް ކަމަށެވެ.
އޭނާއަށް ދިމާވެފައިވާ ހާލަތުގެ ވާހަކަ އާއްމު ކުރުމާ އެކު ކުރިމަތިވި ފިއްތުންތަކަށް ފަހު ނިއުޒީލޭންޑުން މިހާރު ނިންމާފައި ވަނީ ގައުމަށް އެތެރެވުމުގެ ހުއްދަ ދިނުމަށެވެ.
އަންގާރަ ދުވަހު ޗާލޮޓް ބުނީ އަންނަ މަހު ވިހެއުމަށް އޭނާ އެނބުރި ނިއުޒީލޭންޑަށް ދާނެ ކަމަށެވެ. ގައުމަށް އެތެރެވުމަށް ފަހު އޭނާ ހުންނާނީ ދައުލަތުގެ މެނޭޖްކުރާ ހާއްސަ ކަރަންޓީން ފެސިލިޓީއެއްގަ އެވެ.
ކޮވިޑާ ގުޅިގެން ފާއިތުވި ދެ އަހަރު ނިއުޒީލޭންޑްގެ ބޯޑަރު ހުރީ ބަންދުކޮށްފަ އެވެ. އެނބުރި ގައުމަށް ދާން ޖެހޭ މީހުން ކަރަންޓީން ވާން ހާއްސަކޮށްފައި ވަނީ 800 ކޮޓަރި އެވެ. އެ ތަންތަން ހާއްސަ ވަނީ ނިއުޒީލޭންޑްގެ ރައްޔިތުންނާއި ވިސާ އޮތް މީހުންގެ ތެރެއިން އެމެޖެންސީކޮށް އެތެރެވާން ޖެހޭ މީހުންނަށެވެ.
ޑެޕިއުޓީ ބޮޑު ވަޒީރު ގްރާންޓް ރޮބަޓްސަން ވިދާޅުވީ ޗާލޮޓް ގައުމަށް އެތެރެ ވާން ހުއްދަ ދިނީ ފިއްތުންތައް އައިސްގެން ނޫން ކަމަށާއި އެއީ އޭނާގެ ހާލަތު ސާފުވުމުން ދިން ހުއްދައެއް ކަމަށެވެ.
ރޮބަޓްސަން ވިދާޅުވީ ނިއުޒީލޭންޑްގެ ބޯޑަރު ހުޅުވާލުމާ ގުޅޭ ހާއްސަ އިއުލާނެއް ބުރާސްފަތި ދުވަހު އާއްމު ކުރާނެ ކަމަށެވެ. މި ބަލިމަޑުކަމުގައި ނިޒުއީލޭންޑްގެ ފަސް މިލިއަން މީހުންގެ ތެރެއިން މަރުވެފައި ވަނީ 53 މީހުންނެވެ.
