ކާބުލް، އަފްގާނިސްތާން (ފެބްރުއަރީ 1) - އަފްގާނިސްތާނުގެ ޗެނަލްއަކަށް މަސައްކަތް ކުރާ ދެ ނޫސްވެރިން ގެއްލިފައި ވަނީ ތާލިބާނުން އެ މީހުން ހައްޔަރުކޮށްފައި ވާތީ ކަމަށް އދ. އާއި އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ތުހުމަތުކޮށްފި އެވެ.
މިދިޔަ އޯގަސްޓް މަހު ވެރިކަމަށް އައި ތާލިބާނުން ވަނީ ހިޔާލު ފާޅުކުރުމުގެ މިނިވަންކަން އެއްކޮށް ހިފަހައްޓައި، ހުއްދަ ނެތި މުޒާހަރާ ކުރުން މަނާކޮށްފަ އެވެ. މުޒާހަރާ ކުރާ މީހުންނާއި މުޒާހަރާ ރިޕޯޓު ކުރަން އުޅޭ ނޫސްވެރިންނަށް ވެސް ތާލިބާނުން އަނިޔާކުރެ އެވެ.
އަފްގާން މީޑިއާ އެސޯސިއޭޝަނުން ބުނީ އެރިއާނާ ޓީވީގެ ދެ ނޫސްވެރިން ކަމަށްވާ، ވާރިސް ހަސްރަތް އާއި އަސްލަމް ހިޖާބް ގެންދިޔައީ ހޯމަ ދުވަހު ތާލިބާނުން ކަމަށެވެ. އެ މީހުން ގެންދިޔަ ތަނެއް ސާފު ނުވާ ކަމަށް އެ ޖަމިއްޔާއިން ބުންޏެވެ.
އެރިއާނާ ޓީވީގެ އޮފިޝަލަކު އޭއެފްޕީއަށް ބުނީ އެ މީހުން ގެންދިޔައީ އޮފީސް ދޮރުމަތީގައި ތިއްބާ، މޫނު ނިވާކޮށްގެން އައި ހަތިޔާރު އެޅި ބަޔެއް ކަމަށެވެ. އޮފިޝަލް ބުނީ "ފުރިހަމަ ތަހުގީގެއް" ހިންގާނެ ކަމުގެ ޔަގީންކަން ތާލިބާނުން ދީފައިވާ ކަމަށެވެ.
އަފްގާނިސްތާނުގައި ހުންނަ އދ. މިޝަނުން އެކަމާ މެދު ކަންބޮޑުވުން ފާޅުކޮށް ބުނީ، ނޫސްވެރިން ހައްޔަރުކޮށްގެން ގެންދިޔަ ސަބަބު ސާފުކޮށްދޭން ތާލިބާނަށް ގޮވާލާ ކަމަށެވެ.
އެމްނެސްޓީ އިންޓަނޭޝަނަލުން ތާލިބާނަށް ގޮވާލީ ނޫސްވެރިން ވަގުތުން މިނިވަން ކުރުމަށެވެ. ތާލިބާނުންގެ ތަރުޖަމާނަކު ބުނީ ގެއްލިގެން އުޅޭ ނޫސްވެރިންނާ ގުޅޭ މައުލޫމާތު އޭނާއަށް ނޭނގޭ ކަމަށެވެ.
ނޫސްވެރިންތަކެއް ގެއްލުނު މައްސަލަ ފެންމަތިވެފައިވާ އިރު މީގެ ދެ ހަފްތާ ކުރިން އަންހެނުންގެ ހައްގުތަކަށް ވަކާލާތު ކުރާ ދެ އެކްޓިވިސްޓުން ވެސް ވީނުވީއެއް ނޭނގި ގެއްލުނެވެ.
އދ. ގެ އިންސާނީ ހައްގުތަކާ ގުޅޭ ހައި ކޮމިޝަނުން ބުނީ ދެ އެކްޓިވިސްޓުންނާއި އެ މީހުންނާ އެކު ގެއްލިފައިވާ އާއިލާގެ ހަތަރު މީހުންގެ ހާލަތާ މެދު ކަންބޮޑުވާ ކަމަށެވެ.
އެ މީހުން ވީ ތަނެއް ނޭނގޭ ކަމަށް ތާލިބާނުން ބުނެފައިވާ އިރު، ތަހުގީގެއް ހިންގަމުންދާ ކަމަށް ބުނެފައިވެ އެވެ.
