މެޑްރިޑް (ޖެނުއަރީ 31) - ރެއާލް މެޑްރިޑްގެ ކޯޗު ކާލޯ އަންޗެލޮޓީގެ ކޯޗިން ލައިސަންސްގެ މުއްދަތު ހަަމަވެއްޖެ އެވެ.
ޔުއެފާ ޕްރޯ ލައިސަންސް ހާސިލްކޮށްފައިވާ އުމުރުން 62 އަހަރުގެ އަންޗެލޮޓީގެ ކޯޗިން ލައިސަންސް މުއްދަތު ހަމަވީ ޑިސެމްބަރު 31 ވަނަ ދުވަހު އެވެ.
ޔޫރަޕްގެ މައި ފުޓްބޯޅަ އިދާރާ ޔުއެފާއިން އިޓަލީ އަށް އުފަން ކޯޗު އަންޗެލޮޓީ އަށް އަންގާފައިވަނީ ކޯޗިން ލައިސަންސް އާ ނުކޮށް ރެއާލަށް ކޯޗުކޮށްދޭން ބެންޗަށް ނުދެވޭނެ ކަމަށެވެ. އަންޗެލޮޓީގެ ކޯޗިން ލައިސަންސް މައްސަލައިގައި ޔުއެފާ އިން ވަނީ ސްޕެއިނުގެ ފުޓްބޯޅަ ފެޑެރޭޝަނަށް ވެސް މައުލޫމާތު ފޮނުވައިފަ އެވެ.
ސްޕެއިނުގެ ފުޓްބޯޅަ ފެޑެރޭޝަނުން ވަނީ ވީ އެންމެ އަވަހަށް އަންޗެލޮޓީގެ ކޯޗިން ލައިސަންސް އާ ކުރަން ޖެހޭނެކަން ރެއާލަށް އަންގައިފަ އެވެ. އެކަމަކު، ޔުއެފާގެ ކޯޗިން ލައިސަންސް އާ ކުރުމުގައި ހަރުދަނާ އުސޫލެއް ގެންގުޅެން ޖެހޭނެ ކަމަށް ސްޕެއިނުގެ ފުޓްބޯޅަ ފެޑެރޭޝަން އޮފިޝަލަކު ވަނީ އެ ގައުމުގެ ނޫހަކަށް ދިން އިންޓަވިއުއެއްގައި ބުނެފަ އެވެ.
"ފުޓްބޯޅައިގެ އެންމެ ކާމިޔާބު އެއް ކޯޗު (އަންޗެލޮޓީ) ވެސް މި ޖެހެނީ ލައިސަންސް އާ ކުރަން ކޯހެއް ހަދަން. މިއީ އެންމެ ރަނގަޅު އުސޫލުތޯ ސުވާލު އުފެދޭ. މެދުނުކެނޑި މަތީ ފަންތީގައި މަސައްކަތްކުރާ ކޯޗުންގެ ލައިސަންސް އާ ކުރުމުގެ ހަރުދަނާ އުސޫލެއް އޮންނަން ޖެހޭ،" ރެއާލްގެ އޮފިޝަލް ބުންޏެވެ.
ކުރިން އޭސީ މިލާނާއި ޕީއެސްޖީ، ބަޔާން މިއުނިކް އަދި ޗެލްސީ ފަދަ ބޮޑެތި ކްލަބްތަކަށް ކޯޗުކޮށްދިން އަންޗެލޮޓީ އަށް އާ ކޯޗިން ލައިސަންސް ލިބޭނީ 15 ގަޑިއިރުގެ އޮންލައިން ތިއަރީ ކޯހެއް ފުރިހަމަކުރުމަށް ފަހު ޓެސްޓެއްގައި ބައިވެރިވެގެންނެވެ.
އިޓަލީގެ ގައުމީ ޓީމުގެ އެސިސްޓަންޓް ކޯޗުގެ މަގާމުން 1992 ވަނަ އަހަރު ކޯޗިން ކެރިއަރު ފެށި އަންޗެލޮޓީ ވަނީ ހެޑް ކޯޗެއްގެ ގޮތުގައި ގިނަ ޓީމުތަކެއްގައި މަސައްކަތްކޮށްފަ އެވެ. ކޯޗިން ކެރިއަރުގައި އެކި ޓީމުތަކާ އެކީ 21 ޓްރޮފީ ހޯދާފައިވާއިރު، އެންމެ ފަހުން ހާސިލްކުރި ތަށްޓަކީ މި މަހު ސައުދީ އަރަބިއްޔާގައި ކުރިއަށް ދިޔަ ސްޕެއިނުގެ ސުޕަ ކަޕް އެވެ.
ސްޕެނިޝް ލީގުގެ އެއް ވަނައިގައި ރެއާލް އޮތީ ހަތަރު ޕޮއިންޓުގެ ލީޑަކާ އެކު އެވެ. ރެއާލުން ޗެމްޕިއަންސް ލީގުގެ ދެ ވަނަ ބުރުގައި ކުޅެން ޖެހޭނީ ޕީއެސްޖީއާ އެވެ.
ތިރީހަކަށް އަހަރު ކޯޗިން ކެރިއަރުގައި ހޭދަކުރި އަންޗެލޮޓީ ވަނީ 1200 އަށް ވުރެ ގިނަ މެޗުގައި ކޯޗެއްގެ ގޮތުގައި މަސައްކަތް ކޮށްފަ އެވެ. އަންޗެލޮޓީގެ ކޯޗިން ލައިސަންސް އާ ކުރަން ޔުއެފާ އިން އެންގުމަކީ ކޯޗުންގެ ލައިސަންސް އާ ކުރުމުގައި ޔުއެފާގައި ހަރުދަނާ ސިސްޓަމެއް ނެތްކަން ދޭހަވާ ކަމެއް ކަމަށް އިޓަލީގެ މީޑިއާތަކުން ސިފަ ކުރެ އެވެ.
