ޑުބާއީ، ޔޫއޭއީ (ޖެނުއަރީ 31) - ޔުނައިޓެޑް އަރަބް އެމިރޭޓްސް (ޔޫއޭއީ) ގައި 2023 ވަނަ އަހަރުގެ މެދު ތެރެއިން ފެށިގެން ކޯޕޮރޭޓް ޓެކްސް ތައާރަފް ކުރާނެކަން އެ ގައުމުގެ ފިނޭންސް މިނިސްޓްރީން އިއުލާންކޮށްފި އެވެ.
ގަލްފް ސަރަހައްދުގެ މާލީ ސެންޓަރުގެ ގޮތުގައި އޮންނަ ޔޫއޭއީ މަގްބޫލްވެފައި ވަނީ ޓެކްސްގެ ލުއިތައް އެންމެ ބޮޑަށް ލިބޭ އެއް ގައުމުގެ ގޮތުގަ އެވެ. އެހެންވެ، ބޮޑެތި ބައިނަލްއަގްވާމީ ކުންފުނިތަކުގެ ސަރަހައްދީ މައި އޮފީސް ހުންނަނީ ޔޫއޭއީގަ އެވެ.
ފިނޭންސް މިނިސްޓްރީން ހޯމަ ދުވަހު ނެރުނު ބަޔާނުގައި ބުނީ އަންނަ އަހަރުގެ ޖޫން މަހުން ފެށިގެން 102،000 ޑޮލަރަށް (375،000 އޭއީޑީ) ވުރެ މަތިން ލިބޭ ވިޔަފާރި ފައިދާއިން 9.0 ޕަސެންޓުގައި ޓެކްސް ނަގަން ފަށާނެ ކަމަށެވެ.
މި ދުވަސްވަރު ޔޫއޭއީގެ އެކި ކަންކަމަށް ބޮޑު ބަދަލުތައް ގެންނަމުންދާ އިރު، މި އަހަރުން ފެށިގެން ހަފްތާ ބަންދުގެ ގޮތުގައި އޮންނާނީ ހުކުރާއި ހޮނިހިރުގެ ބަދަލުގެ ހޮނިހިރާއި އާދީއްތައިގެ ގޮތުގައި ވެސް ކަނޑައަޅާފައިވެ އެވެ. އެއީ ބައިނަލްއަގްވާމީ މާކެޓުތަކަށް ވިސްނައިގެން ވިޔަފާރިތައް ކުރިއަށް ގެންދިޔުމުގެ ބޭނުމުގައި ގެނައި ބަދަލެކެވެ.
"ޔޫއޭއީގެ ކޯޕޮރޭޓް ޓެކްސް ރެޖީމް ވާނީ މުޅި ދުނިޔެއިން ވެސް އެންމެ ވާދަވެރި ރެޖީމަށް،" ޔޫއޭއީގެ ރަސްމީ ވޭމް ނިއުސް އެޖެންސީން ބުންޏެވެ. ނުވަ ޕަސެންޓަކީ ދުނިޔޭގެ ނިސްބަތުން ބަލާއިރު ކޯޕޮރޭޓް ޓެކްސް ނަގާ އެންމެ ދަށް އެއް ޕަސެންޓޭޖެވެ.
ފިނޭންސް މިނިސްޓްރީން ބުނީ ފަރުދުންގެ އާމްދަނީއިން ޓެކްސް ނެގުމާއި ރިއެލް އެސްޓޭޓް އަދި އެހެން އިންވެސްޓްމެންޓްތަކުގެ ކެޕިޓަލް އިތުރުވުމުން ޓެކްސެއް ނަގަން ރާވާފައި ނެތް ކަމަށެވެ.
ތެލުގެ އެކްސްޕޯޓްގެ އިތުރުން ވިޔަފާރި އާއި ދަތުރުފަތުރު އަދި ފަތުރުވެރިކަމުގެ ވަރުގަދަ ސިނާއަތެއް އޮންނަ ޔޫއޭއީގެ އަމާޒަކީ އިގްތިސާދު އިތުރަށް ފުޅާކޮށް، ތެލުގެ އެކްސްޕޯޓަށް ބަރޯސާވުން ކުޑަ ކުރުމެވެ.
ތެލުގެ ވިޔަފާރީގައި ޔޫއޭއީއާ އެންމެ ވާދަވެރި ގައުމަކީ އަވައްޓެރި ސައުދީ އަރަބިއްޔާ އެވެ. އެންމެ ގިނައިން ތެޔޮ އެކްސްޕޯޓް ކުރާ ގައުމަކީ ސައުދީ އަރަބިއްޔާ އެވެ. ނަމަވެސް އެ ގައުމުން ވެސް މިހާރު އަމާޒު ހިފާފައި ވަނީ އިގްތިސާދު ފުޅާކޮށް، ބޭރުގެ އިންވެސްޓްމަންޓް ގެނައުމަށެވެ.
"ކޯޕޮރޭޓް ޓެކްސް ތައާރަފް ކުރުމާ އެކު، ޓެކްސްއާ ގުޅުން ހުރި ނުރަނގަޅު ޕްރެކްޓިސްތައް ހުއްޓުވައި، ޓެކްސްގެ ދެފުށް ފެންނަ ނިޒާމެއް ދަމަހައްޓަން ބައިނަލްއަގްވާމީ ހަމަތަކާ އެއް ގޮތަށް ޔޫއޭއީއިން އަމަލު ކުރާނެ،" ފިނޭންސް މިނިސްޓްރީގެ ބަޔާނުގައި އަންޑާ ސެކެޓްރީ ޔޫނިސް ހާޖީ އަލް ހޫރީ ވިދާޅުވި އެވެ.
ޔޫއޭއީގެ ފްރީ ޓްރޭޑް ޒޯންތަކުގައި ޓެކްސްއަށް ދީފައި ހުރި ލުއިތަކަށް ބަދަލެއް ނައިސް ހަމަ އެ ގޮތުގައި ދެމިއޮންނާނެ ކަމަށް ބަޔާނުގައި ފާހަގަކޮށްފައިވެ އެވެ.
