މީގެ 24 އަހަރު ކުރިން އެފްރިކާއިން އިންޑިއާއަށް ގެންގޮސް، ދިއްލީގެ ޒުލެއްގައި ބަންދުކޮށްގެން ގެންގުޅޭ އެތެއް އަނބުރާ ގައުމަށް ފޮނުވާލަން ހައި ކޯޓަށް މައްސަލަ ހުށަހަޅައިފި އެވެ.
އެކަމަށް އެދި ކޯޓަށް ޕެޓިޝަން ހުށަހެޅީ އުމުރުން 16 އަހަރުގެ ނިކީތާ ދަވަން އެވެ. އޭނާއަކީ ޔޫތް ފޯ އެނިމަލްސްގެ ނަމުގައި އަމިއްލަ ޖަމިއްޔާއެއް ހިންގާ ކުއްޖެކެވެ.
ނިކީތާ ތުހުމަތު ކުރާ ގޮތުގައި ޝަންކަރްގެ ނަން ދީފައިވާ އެތް، ދިއްލީގެ ޒުލުގައި އެކަހެރިކޮށްގެން ގެންގުޅޭ އެތައް އަހަރެއް ވެއްޖެ އެވެ. ޕެޓިޝަނުގައި އެދުނީ އެފްރިކާގައި އެހެން އެތްތައް ވެސް ރައްކާތެރިކަމާ އެކު ދިރިއުޅެމުންދާ ޖަންގަލީގެ ހިސާބަކަށް ޝަންކަރް ބަދަލުކުރުމަށެވެ.
އޭގެ އިތުރުން ޒުލުގެ މީހުން އެ އެތަށް އަނިޔާކުރާ ކަމަށް ވެސް ތުހުމަތުކޮށްފައިވެ އެވެ. ނަމަވެސް އެކަމާ ގުޅޭ ގޮތުން ވަކި އެއްޗެއް ބުނަން ޒުލުގެ އޮފިޝަލުން ބޭނުމެއް ނުވެ އެވެ.
ޝަންކަރާ އެކު ޒުލުގައި އުޅުނު އެތް މަރުވީ 2005 ވަނަ އަހަރު. -- ފޮޓޯ: ނިކީތާ ދަވަން
އިންޑިއާގެ ޒޫތަކުގައިވާ އެތްތަކުގެ ތެރޭގައި ހިމެނެނީ އެފްރިކަން އެލިފަންޓް ބާވަތުގެ ދެ އެތެވެ. އޭގެ ތެރެއިން އެއް އެތަކީ ޝަންކަރެވެ. އަނެއް އެތަކީ ކަރްނާޓަކާ ސްޓޭޓްގެ މައިސުރޫ ޒުލުގައި ގެންގުޅޭ އެއްޗެކެވެ.
ނަވާރަ ސަތޭކަ ނުވަދިހަ އަށް ވަނަ އަހަރު ޝަންކަރް އިންޑިއާއަށް ފޮނުވީ ބޮމްބެއި ނަމަކަށް ކިޔާ އެހެން އެތަކާ ވެސް އެކު އެވެ. ނަމަވެސް 2005 ވަނަ އަހަރު ކުއްލި ގޮތަކަށް ބޮމްބެއި މަރުވި އެވެ.
ދިއްލީ ޒުލުގައި ޝަންކަރްގެ އިތުރުން، އޭޝިއަން އެލިފަންޓް ބާވަތުގެ ދެ އެތް ވެސް އޮވެ އެވެ. ނަމަވެސް، ލަކްސްމީ އަދި ހިރާގެ ނަން ދީފައިވާ އެ ދެ އެތް އޮންނަނީ ޝަންކަރާ މުޅިން ވަކިންނެވެ.
އެ ތިން އެކުގައި ގެންގުޅެވޭތޯ ބެލި ނަމަވެސް، ޝަންކަރްގެ އުޅުން ތަފާތުވުމުން، އެކުގައި ގެންގުޅެވޭ ގޮތް ނުވާ ކަމަށް ޒުލުގެ ކުރީގެ ޑައިރެކްޓަރި ރަމޭޝް ޕާންޑޭ ވިދާޅުވެފައިވެ އެވެ.
އެކްޓިވިސްޓުން ބުނާ ގޮތުގައި ޝަންކަރްގެ އުޅުނު ތަފާތުވެ، ބުނާ ގޮތް ނުހަދަނީ އޭތި ބަންދުކޮށްގެން ގެންގުޅޭ މާހައުލުގެ ސަބަބުންނެވެ.
ޒުލުގެ ޑިރެކްޓަރު ސޮނާލީ ގޯޝް އިންޑިއަން އެކްސްޕްރެސް ނޫހަށް ވިދާޅުވީ ޝަންކަރްގެ އެކަނިވެރިކަން ފިލުވައިލެވޭނެ ގޮތެއް ހޯދަން މަސައްކަތް ކުރާ ކަމަށެވެ.
ލަކްސްމީ އަދި ހިރާގެ ނަން ދީފައިވާ ދެ އެތް ޒުލުގައި އޮންނަނީ ޝަންކަރާ މުޅިން ވަކިން. -- ފޮޓޯ: ގެޓީ އިމޭޖަޒް
އެގޮތުން އިތުރު އެތެއް ލިބޭތޯ ބަލަމުންދާ ކަމަށާއި އެހެން ނުވާ ނަމަ އަނބުރާ އެފްރިކާއަށް ގެންދަން އެދޭ ކަމަށް އެ ބައްރުގެ ބައެއް ގައުމުތަކަށް އަންގާފައިވާނެ ކަމަށް އޭނާ ވިދާޅުވި އެވެ.
ސައިންޓިސްޓުން ބުނެފައިވާ ގޮތުގައި ކުދި ތަންތަނުގައި އެތް ބަންދުކޮށްގެން ގެންގުޅުމަކީ، އެއަށް ނަފްސާނީ އަސަރުކޮށް، އާދަޔާ ހިލާފު "ނިޔުރޯޓިކް" ގޮތްގޮތަށް އުޅެން މަގުފަހިވާ ސަބަބެކެވެ.
ޒޫތަކުގައި އެތް ޑިސްޕްލޭ ކުރުމާއި ހަ މަހަށް ވުރެ ގިނަ ދުވަހު އެތެއް އެކަހެރިކޮށް ގެންގުޅުން އިންޑިއާގައި މަނާކުރީ 2009 ވަނަ އަހަރު ސެންޓްރަލް ޒޫ އޮތޯރިޓީއިންނެވެ.
ނަމަވެސް ގަވާއިދުތައް ތަންފީޒުކުރަން އެކަށީގެންވާ މަސައްކަތް ނުކުރާ ކަމަށް އެކްޓިވިސްޓުން ބުނެ އެވެ. އެހެންކަމުން، ޝަންކަރް ދޫކޮށްލަން ކޯޓުން އަންގައިފި ނަމަ، އެއީ ހާލަތު ބަދަލުކުރަން ކުރިއަށް އެޅޭ ފިޔަވަޅަކަށް ވާނެ ކަމަށް އެ މީހުން ބުނެ އެވެ.
