އުތުރު ކޮރެއާއިން ފަސް އަހަރުގެ ތެރޭގައި ޓެސްޓު ކުރި އެންމެ ބާރުގަދަ މިސައިލުން ނެގި ފޮޓޯތަކެއް އެ ގައުމުން އާއްމުކޮށްފި އެވެ.
ޖައްވުން ނަގާފައިވާ ފޮޓޯތަކުން ފެންނަނީ ދެ ކޮރެއާގެ ބައެއް ހިސާބުތަކާއި ވަށައިގެންވާ ސަރަހައްދުތަކެވެ.
އުތުރު ކޮރެއާއިން ހޯމަ ދުވަހު ބުނީ އެންމެ ފަހުން ޓެސްޓު ކުރީ ހްވާސޯންގް-12 އިންޓަމީޑިއޭޓް ރޭންޖް ބެލިސްޓިކް މިސައިލް (އައިއާރްބީއެމް) އެއް ކަމަށެވެ.
އުތުރު ކޮރެއާއިން އާއްމު ކުރި ފޮޓޯތައް. -- ފޮޓޯ: ރޮއިޓާޒް
އެ މިސައިލަކީ އެންމެ ބާރު މިނުގައި ދަތުރު ކުރާ ނަމަ އެތައް ހާސް މޭލެއް ކުޑަ ވަގުތުކޮޅެއްގެ ތެރޭގައި ކަޑައްތުކޮށް، އެމެރިކާގެ ގުއާމް ފަދަ ރަށްތަކަށް ހަމަލާދިނުމުގެ ގާބިލްކަން ލިބިފައިވާ މިސައިލެކެވެ.
އެ މިސައިލް ޓެސްޓު ކުރުމާ އެކު ބައިނަލްއަގްވާމީ މުޖުތަމައުގެ ކަންބޮޑުވުން ވަނީ އިތުރުވެފަ އެވެ.
ފާއިތުވި މަހުގެ ތެރޭގައި އުތުރު ކޮރެއާއިން ވަނީ ރެކޯޑް އަދަދަކަށް ހަތް މިސައިލް ޓެސްޓުކޮށްފަ އެވެ. އެމެރިކާ އާއި ދެކުނު ކޮރެއާ އަދި ޖަޕާނާއި އެހެން ގައުމުތަކުން އެކަން ކުށްވެރި ކުރެ އެވެ.
ބެލިސްޓިކް މިސައިލާއި ނިޔުކްލިއާ ހަތިޔާރު ޓެސްޓު ކުރުން އދ. އިން ވަނީ އުތުރު ކޮރެއާއަށް މަނާކޮށްފަ އެވެ. އެހެން ނަމަވެސް، އެ އެންގުމާ ހިލާފަށް ގަވާއިދުން އަމަލު ކުރާތީ، އދ. އިން ވަނީ ގިނަ ދަތިކުރުމުގެ ފިޔަވަޅު ވެސް އެ ގައުމާ ދެކޮޅަށް އަޅާފަ އެވެ.
