ވެލިންގްޓަން، ނިއުޒީލޭންޑް (ޖެނުއަރީ 30) - ނިއުޒީލޭންޑްގެ މާބަނޑު ނޫސްވެރިޔަކު ވިހަން ގައުމަށް އެތެރެވާން މަސައްކަތްކޮށް ކާމިޔާބު ނުވުމުން އަފްގާނިސްތާނުގެ ތާލިބާނުން އޭނާއަށް ހިމާޔަތް ދީފި އެވެ.
"މިކަން އިހުސާސް ކުރެވޭނީ އިތުބާރު ގެއްލުވާލުން ކަހަލަ ގޮތަކަށް،" ރޭޑިއޯ ނިއުޒީލޭންޑަށް އާދީއްތަ ދުވަހު ދިން އިންޓަވިއުގައި އަލްޖަޒީރާގެ ނޫސްވެރިން ޗާލޮޓް ބެލިސް ބުންޏެވެ.
ޗާލޮޓް މަސައްކަތް ކުރަމުން ދިޔައީ އަފްގާނިސްތާނުގަ އެވެ. އޭނާގެ ލޯބިވެރިޔާ އަދި ފޮޓޯގްރާފަރު ޖިމް ހައިލެބްރޮއެކް ވެސް ހުންނަނީ އޭނާއާ އެކު އެ ގައުމުގަ އެވެ.
އޭނާ މާބަނޑުކަން އެނގުނީ އަފްގާނިސްތާން ދޫކޮށް، ގަތަރުގެ ދޯހާގައި ހުންނަ އަލްޖަޒީރާގެ މައި އޮފީހުގައި މަސައްކަތް ކުރަން ފެށި ފަހުންނެވެ.
ކައިވެނީގެ ބޭރުން މާބަނޑުވުމަކީ ގަތަރުގައި ގާނޫނީ ކުށަކަށް ވާތީ، އޭނާ އެކަން ސިއްރު ކުރުމަށް ފަހު، ވިހަން ދާން ނިންމީ އުފަން ގައުމު ނިއުޒީލޭންޑަށެވެ.
ނަމަވެސް ނިއުޒީލޭންޑުން ކޮވިޑާ ގުޅިގެން އަޅާފައިވާ ހަރުކަށި ބޯޑަރު ފިޔަވަޅުތަކުގެ ދަށުން އޭނާއަށް ވިހަން ގައުމަށް އެތެރެ ނުވެވޭނެ ކަމަށް އެންގި އެވެ. ޗާލޮޓް އާއި ހައިލެބްރޮއެކްގެ ވިސާ ދެން އޮތީ ގަތަރުގެ އިތުރުން އަފްގާނިސްތާނަށެވެ.
އެހެންވެ، އޭނާ ނިންމީ ތާލިބާނުންގެ އިސް ވެރިންނަށް ގުޅުމަށެވެ. ތާލިބާނުން ޗާލޮޓްއަށް އެންގީ އަފްގާނިސްތާނުގައި ވިހެއުމުގެ ކަންކަމަށް އެއްވެސް ހުރަހެއް ނެތް ކަމަށެވެ.
"އަޅުގަނޑުމެން ވަރަށް އުފާވެއްޖެ. މި ގައުމަށް އައިސް ވިހަން އެއްވެސް މައްސަލައެއް ދިމައެއް ނުވާނެ،" ނިއުޒީލޭންޑް ހެރަލްޑް ނޫހަށް ދިން އިންޓަވިއުގައި ޗާލޮޓް ބުނީ ތާލިބާނުން އޭނާއަށް މަރުހަބާ ކީ ކަމަށެވެ.
"ހާސް ނުވޭ. ހުރިހާ ކަމެއް ވެސް ރަނގަޅުވާނެ،" ތާލިބާނުން އިތުރަށް އޭނާ ކައިރީގައި ބުންޏެވެ.
"އަޅުގަނޑު ހާލުގައި ޖެހުނު ވަގުތު، ނިޒުއީލޭންޑްގެ ސަރުކާރުން ބުނީ މި ގައުމުން މަރުހަބާ ނުކިޔާނަމޭ."
"ކައިވެންޏެއް ނުކޮށް، ވިހަން ގާތްވެފައި އިން އަންހެނަކަށް ތާލިބާނުން ހިމާޔަތް ދިނީމާ، މި ހާލަތުން ދައްކުވައިދެނީ ކަންކަން ގޯސްވެފައިވާ މިންވަރު."
އެ ހާލަތް ދިމާވުމުން މައްސަލަ ފެންމަތިކޮށް، ގާނޫނީ ވަކީލުންގެ އެހީ ހޯދަން ފަށާފައިވާ އިރު ޗާލޮޓް ބުނީ އޭނާ ނިއުޒީލޭންޑަށް އެތެރެވާން ހުށަހެޅި ހުށަހެޅުން މިހާރު އެ ގައުމުން މުރާޖައާ ކުރަމުންދާ ކަމަށެވެ.
ނިއުޒީލޭންޑް ސަރުކާރުގެ ކޮވިޑް-19 ރެސްޕޯންސް މިނިސްޓަރު ކްރިސް ކިޕްކިންސް ވިދާޅުވީ ޗާލޮޓްގެ މައްސަލައިގައި އިޖުރާއަތުތައް ފުރިހަމަ ކުރިތޯ ބަލަން އަންގާފައި ވާނެ ކަމަށެވެ.
