އިދިކޮޅު ޕީޕީއެމްއަށް 2023 ގައި ބާއްވާ ރިޔާސީ އިންތިހާބު ކާމިޔާބުކުރެވިއްޖެ ނަމަ، ސަރުކާރު ވަޒީފާތައް ދޭނީ ހަމައެކަނި އެ ޕާޓީއަށް ނިސްބަތްވާ މެމްބަރުންނަށް ކަމަށް ކުރީގެ ރައީސް އަބްދުﷲ ޔާމީން ވިދާޅުނުވާކަމަށް އެ ޕާޓީން މިއަދު ބުނެފި އެވެ.
އަންނަ މަހުގެ ފަސްވަނަ ދުވަހު އޮންނަ ބައި އިލެކްޝަންގައި ޕީޕީއެމްގެ ޓިކެޓުގައި ރަައްޔިތުން މަޖިލީހުގެ ކޮމަންޑޫ ދާއިރާއަށް ވާދަކުރާ މޫސާ ފަތުހީއަށް ތާއީދު ހޯދުމަށްޓަކައި، މާލޭގައި ދިރިއުޅޭ އެ ދާއިރާއަށް ނިސްބަތްވާ ރައްޔިތުންނާއެކު ބޭއްވި ހަރަކާތެއްގައި ވާހަކަ ދައްކަވަމުން ޔާމީން ވިދާޅުވީ 2023 ގައި އެމަނިކުފާނު ވެރިކަމަށް އިންތިހާބުވެއްޖެ ނަމަ އެހެން ޕާޓީތަކުގެ މެމްބަރުންނަށް ސަރުކާރު ވަޒީފާތަކުގެ ފުރުސަތު ނުދޭނެ ކަމަށެވެ.
"2023 ގައި އަޅުގަނޑުމެންގެ ސަރުކާރެއް، ރައްޔިތުންގެ ކަންތައްތައް ކުރުމަށް ފަހިވެގެން ހިނގައްޖެ ކަމަށް ވަންޏާ، ހިންގާ ސަރުކާރުގެ ކުންފުނިތަކުގެ ވަޒީފާތައް ކަމަށްވިޔަސް އަދި މުއައްސަސާތަކުގެ ވަޒީފާތައް ކަމަށް ވިޔަސް، މި ތަންތަނަށް (ސަރުކާރު ވަޒީފާތަކަށް) އަޅުގަނޑުމެން ނަގާނީ ޕީޕީއެމްގެ ކުދިން. އެހެން ބަޔަކަށް ޖާގައެއް ނޯންނާނެ. އަދި އޭގެން ޖާގަ ދޭނަން މިހާރު އަޅުގަނޑުމެންނާ އެކު މަސައްކަތްކުރާ މީހުނަށް،" ޔާމިން ވިދާޅުވި އެވެ.
އެކަމާ ގުޅިގެން ގިނަ ބައެއްގެ ފާޑުކިޔުން އަމާޒުވެފައިވަނިކޮށް، ޕީޕީއެމްއިން މިއަދު ނެރުނު ބަޔާނެއްގައި ބުނީ ޔާމީން އެ ރޭ ދެއްކެވި ވާހަކަ މީޑިއާތަކުން ގެނެސްދީފައިވަނީ މަފްހޫމް އޮޅޭގޮތަށް ކަމަށާއި، ހަމައެކަނި ޕީޕީއެމްގެ މެމްބަރުންނަށް ވަޒީފާ ދޭނެކަމަށް ވިދާޅުނުވާ ކަމަށެވެ.
"އަދި ވަޒީފާ ދެއްވުމުގައި އަތޮޅުތެރޭގެ ރަށްރަށުގައި ތިއްބެވި ޕީޕީއެމް މެމްބަރުން ބާކީނުވާނެކަމަށް ވިދާޅުވި ނަމަވެސް، އެހެން ޕާޓީތަކާއި ޕާޓީތަކުގައި ނޫޅޭ ފަރާތްތަކަށް ވަޒީފާ ނުދެއްވާނެކަމަށް ވިދާޅުވެފައިނުވާއިރު، އެ ހުރިހާ ފަރާތްތަކަށްވެސް ވަޒީފާގެ ފުރުސަތުތައް ތަނަވަސްކޮށްދެއްވާނެ އެވެ،" އެ ބަޔާނުގައި ބުންޏެވެ.
ޕީޕީއެމުން އިތުރަށް ބުނީ ޔާމީނަކީ ރެކޯޑް އަދަދަކަށް ރާއްޖޭގައި ވަޒީފާތައް އުފައްދައި، ވަކި ޕާޓީއަކަށް ބެލުމެއްނެތި ވަޒީފާ ދެއްވުމުގައި ނަމޫނާ ދައްކަވާފައިވާ ލީޑަރެއް ކަމަށެވެ.
މީގެ އިތުރުން، ރައްޔިތުންނަށް ބޯހިޔަވަހިކަން ކަށަވަރުކޮށް ދިނުމާއި ތަރައްގީ ގެނެސްދިނުމުގައި ވެސް ޔާމީން އެތަކެއް މަސައްކަތްތަކެއް ކޮށްދެއްވާފައިވާކަން ޕީޕީއެމްގެ ބަޔާނުގައި ފާހަގަކޮށްފައި ވެއެވެ.
ޔާމީން ދެއްކެވި ވާހަކައިގެ މަފްހޫމް އޮޅޭގޮތަށް މީޑިއާތަކުން ހަބަރު ގެނެސްދީފައިވާތީ އެކަމާ ކަންބޮޑުވުންފާޅުކޮށް ޕީޕީއެމްއިން ވަނީ ވަޒީފާ ދިނުމުގައި ރައްޔިތުންގެ މެދުގައި ތަފާތުނުކުރާނެކަމުގެ ޔަގީންކަން ދީފަ އެވެ.
