ރަސްމީ ދަތުރުފުޅެއްގައި ތުރުކީގެ ފޮރިން މިނިސްޓަރު، މެވްލުތު ޗަވްޝޯލު މިއަދު ރާއްޖެ ވަޑައިގެންފި އެވެ.
ތުރުކީގެ ފޮރިން މިނިސްޓާ ރާއްޖެ ވަޑައިގެންފައި ވަނީ ރާއްޖޭގެ ފޮރިން މިނިސްޓާ، އަބްދުﷲ ޝާހިދުގެ ދައުވަތަކަށެވެ. މިއީ ތުރުކީގެ ފޮރިން މިނިސްޓަރަކު ރާއްޖެއަށް ޒިޔާރަތް ކުރެއްވި ފުރަތަމަ ފަހަރެވެ.
މެވްލުތު ޗަވްޝޯލު ރާއްޖެ ވަޑައިގަތުމާއެކު މިނިސްޓާ ޝާހިދު އާއި ފޮރިން މިނިސްޓްރީގެ އިސް އޮފޮޝަލުންގެ ވަފުދަކުން ވަނީ އޭނާއަށް މަރުހަބާ ކިޔާފަ އެވެ.
މި ދަތުރުފުޅަކީ ތިން ދުވަހުގެ ދަތުރުފުޅެއް ކަމަށް ފޮރިން މިނިސްޓްރީން މައުލޫމާތު ދިނެވެ. އަދި މި ދަތުރުފުޅުގައި ދެ ގައުމުގެ ދެމެދުގައި ގުޅުން ބަދަހި ކުރުމާއި ތަފާތު ދާއިރާތަކުން އެއްބާރުލުމާއި އެހީތެރިކަން ދިނުމުގެ އެއްބަސްވުންތަކެއްގައި ސޮއިކުރައްވާނެ ކަމަށް ފޮރިން މިނިސްޓްރީން ހާމަކުރި އެވެ.
ތުރުކީގެ ފޮރިން މިނިސްޓަރު މާދަމާ ރައީސް އިބްރާހިމް މުހަންމަދު ސޯލިހުއާ ބައްދަލު ކުރައްވަވާނެ އެވެ.
ރައްޔިތުންގެ މަޖިލީހުގެ ރައީސް މުހަންމަދު ނަޝީދުއާ ވެސް ތުރުކީގެ ފޮރިން މިނިސްޓަރު މި ރަސްމީ ދަތުރުފުޅުގައި ބައްދަލު ކުރައްވާނެ ކަމަށް ފޮރިން މިނިސްޓްރީން މައުލޫމާތު ދިނެވެ.
ޗަވްޝޯލުގެ މި ދަތުރުފުޅު ނިންމަވާލެއްވުމަށް ފަހު ފުރާވަޑައިގަންނަވާނީ ޖެނުއަރީ މަހުގެ 30 ވަނަ ދުވަހު އެވެ.
މެވްލުތު ޗަވްޝޯލް ތުރުކީގެ ފޮރިން މިނިސްޓަރުގެ މަގާމުގެ ދެވަނަ ދައުރަކަށް އައްޔަނު ކުރެވިފައި ވަނީ 2018 ވަނަ އަހަރުގެ ޖުލައި މަހުގެ ތެރޭގަ އެވެ.
