ނިއު ދިއްލީ، އިންޑިއާ (ޖެނުއަރީ 28) - އިންޑިއާގެ ނިއު ދިއްލީގައި ޒުވާން މަންމައަކު ރަހީނުކޮށް، ގޭންގަކުން ރޭޕް ކުރުމަށް ފަހު، މަގުމަތީގައި ގަން ހިންގުވި މައްސަލައެއްގައި ތުހުމަތު ކުރެވޭ 11 މީހުން ހައްޔަރުކޮށްފި އެވެ.
ދިއްލީ ކޮމިޝަން ފޯ ވިމެން އަދި ދިއްލީގެ ޗީފް މިނިސްޓަރު ވަނީ އެ އަމަލު ކުށްވެރިކޮށް، އެއީ "ލަދުވެތި" ކަމެއްގެ ގޮތުގައި ސިފަކޮށްފަ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ އަންހެނެއްގެ އިސްތަށިގަނޑު ކުރުކޮށް ކޮށައި، މޫނުގައި ކަޅު ދެލި އުނގުޅައިގެން ގަން ހިންގުވާ މަންޒަރެވެ. އޭނާ ގަން ހިންގުވުމުގައި ގިނަ އަންހެނުން ބައިވެރިވި އިރު، ވަށައިގެން މަންޒަރު ބަލަން ތިބި މީހުން ދިޔައީ ހިތްވަރުދީ، އެ މަންޒަރު ފޯނުން ރިކޯޑް ކުރަމުންނެވެ.
އިރުމަތީ ދިއްލީގައި އޮންނަ ޝާހްދަރާ ޑިސްޓްރިކްޓްގެ ޑެޕިއުޓީ ޕޮލިސް ކޮމިޝަނަރު އާރް ސަތިޔަސުންދަރަމް ވިދާޅުވީ މިދިޔަ ބުދަ ދުވަހު ހިނގި އެ ހާދިސާއަކީ އަވައްޓެރިންގެ މެދުގައި "ކުރިން އުފެދުނު އަދާވާތްތެރިކަމެއްގެ" ނަތީޖާ ކަމަށެވެ.
ނަމަވެސް އެކަމާ ގުޅޭ ތަފްސީލެއް އޭނާ ނުދެއްވަ އެވެ. މީޑިއާ ރިޕޯޓުތައް ބުނި ގޮތުގައި އުމުރުން 21 އަންހެން މީހާއަށް ހަމަލާދިން މީހުންގެ އާއިލާއަށް ނިސްބަތްވާ އުމުރުން 16 އަހަރުގެ ފިރިހެން ކުއްޖަކު ވަނީ ދާދި ފަހުން ރޭލެއްގެ ކުރި މައްޗަށް ފުންމާލައި، އަމިއްލައަށް މަރުވެފަ އެވެ. އޭނާ މަރުވީ ކައިވެންޏެއް ކޮށްގެން އުޅޭ އަންހެން މީހާއަށް ލޯބި ހުށަހެޅުމުން، އަންހެން މީހާ އެކަން ބަލައިނުގަތުމުން ކަމަށްވެ އެވެ.
"ހައްޔަރު ކުރި 11 މީހުންގެ ތެރޭގައި ދެ ކުޑަކުދިން ވެސް ހިމެނޭ. އެ ކުދިންނާ ދެކޮޅަށް ބޮޑެތި މީހުންނާ އެއް ފަދަ ޝަރީއަތެއް ނުހިންގޭނެ. އެ އެންމެންނަކީ ވެސް އެއް އާއިލާއެއްގެ މީހުން. ވީޑިއޯއިން ސާފުކޮށް ފެންނަ ގޮތުގައި ގަން ހިންގުވުމުގައި އެންމެ އިސްކޮށް އުޅުނީ އަންހެނުން،" ސަތިޔަސުންދަރަމް އޭއެފްޕީއަށް ވިދާޅުވި އެވެ.
އަންހެން މީހާ ފުލުހުންނަށް ކިޔައިދިން ގޮތުގައި އެ އާއިލާއިން އޭނާ ރަހީނުކުރުމަށް ފަހު، ގިނަ ފިރިހެނުންނަތަކާއި ފިރިހެން ކުދިންތަކެއް ވަނީ އޭނާ ރޭޕްކޮށްފަ އެވެ. އޭގެ ފަހުން އަންހެނުންތައް އޭނާގެ ގަޔަށް ބިސް ޖަހައި، އަނިޔާކޮށް، މަގުމަތީގައި ގަން ހިންގުވީ އެވެ.
"މިކަމުގައި ބައިވެރިވާ އެހެން މީހުން ދެނެގަންނަން ވީޑިއޯ އެނެލައިޒް ކުރުމުގެ މަސައްކަތް ދަނީ ކުރިއަށް. އިތުރު ބަޔަކު ހައްޔަރު ކުރާނަން،" ދިއްލީ ފުލުހުންގެ އެޑިޝަނަލް ކޮމިޝަނަރު ޗިންމޭ ބިސްވާލް އޭއެފްޕީއަށް ވިދާޅުވި އެވެ.
ދެ އަހަރުގެ ކުޑަ ކުއްޖަކު ހުންނަ އަންހެން މީހާއަށް މިހާރު ދަނީ ކައުންސެލިން ފޯރުކޮށްދެމުންނެވެ. ރިޕޯޓުތައް ބުނާ ގޮތުން އޭނާއަށް ހަމަލާދިނީ ފުލުހުންގެ ބޫތަކާ 50 މީޓަރު ކައިރީގަ އެވެ. ނަމަވެސް އެ ވަގުތު އެ ބޫތުގައި ފުލުހަކު ނެތެވެ.
އިންޑިއާގައި ރޭޕްގެ ގާނޫނުތަކަށް ބޮޑެތި ބަދަލު ގެނެސް، އަދަބުތައް ހަރުކަށު ކުރީ 2012 ވަނަ އަހަރު ނިއު ދިއްލީގައި ގޭންގަކުން އަންހެނަކު ރޭޕްކުރި މައްސަލައަށް ފަހު އެވެ. ނަމަވެސް އޭގެ ފަހުން ވެސް ރޭޕްގެ މައްސަލަތައް މަދެއް ނުވެ އެވެ. ވިހި ވިހި ވަނަ އަހަރު އެކަނިވެސް 28،000 އަށް ވުރެ ގިނަ ރޭޕް ރިޕޯޓުކުރި އެވެ.
