މުމްބާއީ، އިންޑިއާ (ޖެނުއަރީ 27) - އިންޑިއާގެ ގައުމީ އެއާލައިން، އެއާ އިންޑިއާ އުފެއްދި ޓާޓާ ކުންފުންޏަށް، 69 އަހަރު ފަހުން އަލުން ވިއްކާލައިފި އެވެ.
ޓާޓާއަކީ ސައިފަތުން ފެށިގެން ގޮސް ސޮފްޓްވެއާގެ ވިޔަފާރީގައި ބޮޑު އާއިލީ ކުންފުންޏެކެވެ. އެ ކުންފުންޏަށް އެއާ އިންޑިއާ ވިއްކާލީ 2.4 ބިލިއަން ޑޮލަރު (180 ބިލިއަން ރުޕީޒް) އަށެވެ.
އެއާ އިންޑިއާ ބަނގުރޫޓުވިޔަ ނުދިނުމަށް 2009 ވަނަ އަހަރުން ފެށިގެން އިންޑިއާ ސަރުކާރުން 15 ބިލިއަން ޑޮލަރު ހޭދަކުރި އެވެ. ނަމަވެސް އެކަން ހާސިލްނުވެ، އެންމެ ފަހުން ވިއްކާލަން ޖެހުނީ އެވެ. އެއާލައިން ގަންނާނެ ކުންފުންޏެއް ހަމަޖެހުނީ ވެސް ގިނަ ދުވަސްތަކެއްގެ މަސައްކަތުންނެވެ.
"މި މަސައްކަތް ނިމި، އަލުން އެއާ އިންޑިއާ ލިބުމާ އެކު އަޅުގަނޑުމެން މި ތިބީ ވަރަށް އުފާވެފައި،" ބޮޑު ވަޒީރު ނަރެންދްރަ މޯދީއާ ބައްދަލުކުރެއްވުމަށް ފަހު ޓާޓާ ސަންސްގެ ޗެއާމަން އެން. ޗަންދްރަސޭކަރަން ނޫސްވެރިންނަށް ވިދާޅުވި އެވެ.
"ދުނިޔޭގެ ފެންވަރު އެއާލައިނެއް ބިނާކުރަން ހުރިހާ އެންމެންނާ އެކު ގުޅިގެން މަސައްކަތް ކުރަން އަޅުގަނޑުމެން މި ތިބީ ތައްޔާރަށް."
އެއާ އިންޑިއާ އުފެދުނީ 1932 ވަނަ އަހަރު އެވެ. އެއާލައިންގެ އެންމެ ފުރަތަމަ ފްލައިޓް ދަތުރުގައި ޕައިލެޓްކަން ކުރެއްވީ ޓާޓާގެ އޭރުގެ ޗެއާމަން ޖޭއާރްޑީ ޓާޓާ އެވެ.
މުއްސަނދިންނަށް އަމާޒުކޮށްގެން މާކެޓް ކުރަން ފެށި އެއާލައިންގެ އިޝްތިހާރްތަކުގައި ބޮލީވުޑްގެ ތަރިން ފެނުނެވެ. އަދި އެއާލައިންގެ ހާއްސަ އަޅިކެނޑި ޑިޒައިން ކުރަން ހަވާލުކުރީ ސްޕެއިންގެ މަގްބޫލް އާޓިސްޓް ސެލްވޭޑޯ ޑާލީއާ އެވެ.
އިނގިރޭސިންގެ އަތުން މިނިވަންކަން ލިބުމަށް ފަހު އިންޑިއާ ސަރުކާރުން އެއާ އިންޑިއާގެ މެޖޯރިޓީ ހިއްސާ ގަތީ 1953 ވަނަ އަހަރު އެވެ. ނަމަވެސް 20 ވަނަ ގަރުނު ނިމެން ގާތްވި އިރު، އެއާ އިންޑިއާއަށް އޮތީ ގަލްފްގެ ބޮޑެތި އެއާލައިންތަކާއި ބަޖެޓް އެއާލައިންތަކާ ވާދަކުރަން ޖެހި، އެކަން ކާމިޔާބު ނުވެފަ އެވެ.
އިންޑިއާގައި ސަރުކާރު ބަދަލުވި ކޮންމެ ފަހަރަކު ވެސް އެއާލައިން ޕްރައިވެޓައިޒް ކުރެވޭތޯ ބެލި އެވެ. ނަމަވެސް ސަރުކާރުން ހިއްސާ ދަމަހައްޓަން ބޭނުންވުމާއި، އެއާލައިންގެ ދަރަނިތަކާ ހެދި ކުންފުނިތަކުން އެކަމަށް ޝައުގެއް ނުވި އެވެ. އިންޑިއާ ސަރުކާރުން މިހާރު ވަނީ އެއާލައިންގެ ހިއްސާ ދޫކޮށްލާފަ އެވެ.
އެއާ އިންޑިއާގެ 615 ބިލިއަން ރުޕީޒްގެ ދަރަނީގެ އެއް ބައި ދައްކާނީ ޓާޓާ އިންނެވެ. ބާކީ ބައި ބަދަލު ކުރާނީ ސްޕެޝަލް ޕާޕަސް ވެހިކަލް ނުވަތަ އެކަމަށް ވަކިން އުފައްދާ ކުންފުންޏެއްގެ ދަށަށެވެ.
ބަދަލުގައި ޓާޓާއަށް ލިބޭނީ އެއާލައިންގެ 120 ވައިގެ އުޅަނދާއި، އިންޑިއާގައި 6،200 އެއާޕޯޓް ގޭޓް ސްލޮޓާއި، އެކި ގައުމުތަކުން 900 އެއާޕޯޓް ގޭޓް ސްލޮޓެވެ. އިންޑިއާއިން ކުރާ އިންޓަނޭޝަނަލް ދަތުރުތަކުގެ ގާތްގަނޑަކަށް 50 ޕަސެންޓް ކުރަނީ އެއާ އިންޑިއާ އިންނެވެ.
އެނެލިސްޓުން ދެކޭ ގޮތުގައި ޓާޓާއިން އެއާލައިން ގަތުމުން ބޮޑެތި ކުރިއެރުންތަކެއް ފެންނާނެ އެވެ.
ޓާޓާ ގްރޫޕަކީ އިންޑިއާއެ އެންމެ ދުވަސްވީ އަދި އެންމެ ބޮޑު އެއް ކުންފުންޏެވެ. ދަގަނޑު އުފެއްދުމާއި، އެއްގަމު އުޅަނދު އުފެއްދުމާއި ޓެކްނޮލޮޖީގެ އިތުރުން ވެސް ގިނަ ސިނާއަތްތަކެއްގައި އިންވެސްޓްކޮށްފައިވާ އެ ކުންފުނީގެ މުވައްޒަފުންގެ ގޮތުގައި 800،000 އަށް ވުރެ ގިނަ މީހުން އުޅެ އެވެ.
އެއާ އިންޑިއާއާ ވާދަވެރި ވިސްޓާރާ އެއާލައިންގެ 51 ޕަސެންޓް ހިއްސާ މިހާރު ވެސް އޮންނަނީ ޓާޓާ އަށެވެ. އޭގެ އިތުރުން އެއާއޭޝިއާގެ އިންޑިއާ އޮޕަރޭޝަންތަކުގެ މެޖޯރިޓީ ހިއްސާ ވެސް އޮންނަނީ ޓާޓާ އަށެވެ.
އިންޑިއާ ސަރުކާރުން ރާވާފައި ވަނީ ސަރުކާރުގެ މުދަލުގެ ގޮތުގައިވާ އިތުރު ބައެއް ތަންތަން ވެސް ވިއްކުމަށެވެ. އޭގެ ތެރޭގައި ތެލާއި ގޭސް އުފައްދާ ކުންފުނި ބާރަތް ޕެޓްރޯލިއަމް އާއި އިންޝުއަރެންސް އެޖެންސީ އެލްއައިސީ ހިމެނެ އެވެ.
