ހދ. ކުޅުދުއްފުށީ ރީޖަނަލް ޕޯޓު ރީޑިވެލޮޕްމެންޓް ޕްރޮޖެކްޓާއި ގދ. ތިނަދޫ ރީޖަނަލް ޕޯޓު ޑިވެލޮޕްމެންޓް ޕްރޮޖެކްޓުގެ ދެ ވަނަ ފިޔަވަހީގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު ހަވާލުކޮށްފި އެވެ.
އެމްޓީސީސީގެ ހެޑް އޮފީހުގައި ބޭއްވި ރަސްމިއްޔާތެއްގައި، އެމްޕީއެލްގެ ފަރާތުން އެއްބަސްވުމުގައި ސޮއިކުރެއްވީ ސީއީއޯ ޝާހިދު އަލީ އަދި ޗީފް އިންޖީނިއާ އާދަމް މުހައްމަދެވެ. އެމްޓީސީސީގެ ފަރާތުން އެ އެއްބަސްވުމުގައި ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމް އާއި ސީއޯއޯ ޝާހިދު ހުސައިން މޫސާ އެވެ.
ކުޅުދުއްފުށީ ބަނދަރު ތަރައްގީ ކުރުމަަށް 138.9 މިލިއަން ރުފިޔާ
ކުޅުދުއްފުށީ ޕޯޓުގެ މަސައްކަތް 495 ދުވަސް (ގާތްގަނޑަކަށް އެއް އަހަރާ ހަތަރު މަސް ދުވަސް) ތެރޭގައި ނިންމާ ގޮތަށް އެމްޓީސީސީ އާ ހަވާލު ކުރީ 138.9 މިލިއަން ރުފިޔާ އަށެެވެ. އެ މަސައްކަތުގެ ތެރޭގައި ހިމެނެނީ ކުޅުދުއްފުށީ ސަރަހައްދީ ބަނދަރުގެ ފަޅު ފުން ކުރުމާއި އައު މަގަތު ފާލަމެއް ހެދުމުގެ އިތުރުން ރިވެޓްމަންޓް ޖެހުމާއި ނެރު ބައްތި ޖެހުމެވެ. އޭގެ އިތުރުން، އެޑްމިނިސްޓްރޭޓިވް އިމާރާތެއް ގާއިމުކުރުމާއި ވޯކްޝޮޕް އިމާރާތެއް ގާއިމުކުރުމާއި އެންވަރަމެންޓަލް އިމްޕެކްޓް އެސަސްމެންޓެއް ހެދުން ވެސް މި އަގުގެ ތެރޭގައި ހިމެނެ އެވެ.
ތިނަދޫ ބަނދަރު ތަރައްގީ ކުރުމަށް 17.8 މިލިއަން ރުފިޔާ
ތިނަދޫ ސަރަހައްދީ ބަނދަރުގެ މަސައްކަތް 11 މަސް ދުވަހުގެ ތެރޭގައި ނިންމާ ގޮތަށް އެމްޓީސީސީ އާ ހަވާލުކޮށްފައި ވަނީ 17.8 މިލިއަން ރުފިޔާ އަށެެވެ. މި މަސައްކަތުގެ ތެރެގައި ހިމެނެނީ ޕޯޓް އެޑްމިނިސްޓްރޭޓިވް އިމާރާތެއް ގާއިމު ކުރުމާއި، ގާޑް ހައުސް އިމާރާތަކާއި، ވެއާ ހައުސް އަދި ވޯކްޝޮޕް އިމާރާތެއްގެ އިތުރުން ނެރު ބައްތި ހަރުކުރުމާއި ފެންޑަރު ހަރުކުރުމެވެ.
