ވ. އާރަށް ވިއްކާލައިގެން ރިޝްވަތުގެ ގޮތުގައި ފައިސާ ހޯއްދަވައި، އެ ފައިސާ ލޯންޑާ ކުރެއްވި ކަމަށް ތުހުމަތު ކުރެވޭ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ވަސީލަތްތައް ނެތުމުން މިވަގުތަށް ލައިވް ނުކުރަން ނިންމައިފި އެވެ.
ޔާމީންގެ ޝަރީއަތް ވަގުތުން ޓީވީން ދުރަށް ދެއްކުމަށް ދިފާއުން އެދިފައިވާއިރު، އެކަމަށް ދައުލަތުން ވެސް އިއުތިރާޒެއް ނުކުރެ އެވެ. ނަމަވެސް ޝަރީއަތް ޓީވީން ދެއްލުމަށް ޔާމީންއާއެކު އެ މައްސަލައިގައި ދައުވާ ލިބޭ ވ. ފެލިދޫ، ހަނދުވަރީގޭ، ޔޫސުފް ނައީމް އިންކާރު ކުރެ އެވެ.
އެ މައްސަލައިގައި މިއަދު ބޭއްވި އަޑުއެހުމުގައި މައްސަލަ ބައްލަވާ ކްރިމިނަލް ކޯޓުގެ އިސް ގާޒީ އަހްމަދު ޝަކީލް ވިދާޅުވީ ޝަރީއަތްތައް ލައިވް ކުރެވޭނެ އިންތިޒާމް މިވަގުތު އެ ކޯޓުގައި ހަމަޖެހިފައި ނެތް ކަމަށެވެ.
ޝަރީއަތް ބްރޯޑްކާސްޓު ކުރުމަށް ބޭނުންވާ ވަސީލަތްތައް ކޯޓުގައި ނެތްކަން ފާހަގަކުރައްވާ ގާޒީ ވިދާޅުވީ އެ ވަސީލަތްތައް ލިބުމާއެކު އަޑުއެހުންތައް ލައިވް ކުރާނެ ކަމަށެވެ. އަދި އިދާރީ ބައެއް ދަތިތަކުގެ ސަބަބުން މިވަގުތު ޔާމީންގެ ޝަރީއަތް ވަގުތުން ޓީވީން ދުރަށް ދެއްކުމަށް ހުރަސްތަކެއް ހުރި ކަމަށް ވެސް ގާޒީ ވިދާޅުވި އެވެ.
ގާޒީގެ ނިންމެވުމާއެކު ޔާމީންގެ ގާނޫނީ ވަކީލު އަދި އެމަނިކުފާނުގެ ކުރީގެ ނައިބު ޑރ. މުހައްމަދު ޖަމީލް އަހުމަދު އެދިވަޑައިގެންނެވީ ކޮވިޑް-19ގެ ހާލަތު ގޯސްވެފައިވުމުން، އާންމު ހާލަތަކަށް ރުޖޫއަވަންދެން ޝަރީއަތުގެ އަޑުއެހުންތައް ފަސް ކުރުމަށެވެ. އޭނާ އެގޮތަށް އެދުނީ ޔޫތު މިނިސްޓަރު އަހްމަދު މަހްލޫފްގެ މައްޗަށް ދައުލަތުން ކުރާ ދައުވާތަކުގެ އަޑުއެހުންތައް ކޮވިޑަށް ފަހު ބާއްވާން ލަސްކޮށްފައިވާކަން ފާހަގަ ކުރައްވަމުންނެވެ.
"އަޅުގަނޑުމެންގެ ވަކީލުންގެ ޓީމުގައި ހިމެނިވަޑައިގަންނަވާ ބައެއް ވަކީލުން ކޮވިޑްގެ ހާލަތު ހުރިގޮތުން އާލާސްކަންފުޅުގައި އުޅުއްވާތީ މަޝްވަރާ ކުރުމަށް ވެސް މިދިޔަ ދުވަސްތަކުގައި ދިމާ ނުވެ ދިޔައީ. މިއަދުގެ އަޑުއެހުމަށާއި އެންމެ ފަހުން ބޭއްވުނު އަޑުއެހުމަށް ވެސް އެބޭފުޅުންނަށް ހާޒިރުވަޑައިގެންނެވޭ ގޮތް ނުވި،" މިއަދުގެ އަޑުއެހުމުގައި ޖަމީލް ވިދާޅުވި އެވެ.
އެހެން ނަމަވެސް ދައުލަތުގެ ވަކީލާ މަރިޔަމް ޝާމާ ނަސީރު ވިދާޅުވީ މައްސަލަ ދިރާސާ ކުރަން އެކަށީީގެންވާ މުއްދަތެއް ދިފާއުއަށް ޝަރީއަތުން މިހާރު ވެސް ދީފައިވާ ކަމަށެވެ. އަދި ދައުލަތުގެ ބައެއް ވަކީލުން ވެސް ޗުއްޓީގަ އާއި، ބަލިވެ އުޅޭ ކަމަށް ވެސް ޝާމާ ވިދާޅުވި އެވެ. ނަމަވެސް އެއީ މައްސަލަ ލަސް ކުރުމަށް އޮތް އުޒުރެއް ނޫން ކަމަށް އޭނާ ވިދާޅުވި އެވެ.
ދައުލަތުގެ ވާހަކައަށް ބާރު ދެއްވަމުން ގާޒީ ޝަކީލު ވެސް ވިދާޅުވީ މިއަދުގެ އަޑުއެހުން ދެ ހަފްތާ ކުރިން ތާވަލްކުރެވިފައިވާ ކަމަށާއި ބަލިކޮށް އުޅޭ ދިފާއީ ވަކީލުންނަށް އޮންލައިންކޮށް ބައިވެރިވުމުގެ ފުރުސަތު ދިން ނަމަވެސް އެބޭފުޅުންގެ އިންޓަނެޓް ރަނގަޅު ނޫން ކަމަށް ބުނެ އެ ފުރުސަތު ދޫކޮށްލާފައިވާ ކަމަށެވެ.
މިއަދުގެ އަޑުއެހުމަށް އެ މައްސަލައިގައި ދައުވާ ލިބޭ ޔޫސުފް ނައީމް ހާޒިރެއް ނުވެ އެވެ. ގާޒީ ޝަކީލް ވިދާޅުވި ނައީމް ހާޒިރުނުވީ ކޮވިޑަށް ޕޮޒިޓިވްވެފައި ހުރުމުން ކަމަށެވެ. އެހެންވެ ފެބްރުއަރީ 2، ގައި އޭނާގެ މައްސަލަ ބޭއްވުމަށް އަޑުއެހުމަށް ބާއްވާނެ ކަމަށް ވެސް ގާޒީ ވިދާޅުވި އެވެ.
ޔާމީންގެ މައްޗަށް ކުރާ ދައުވާތައް މިއަދުގެ ޝަރީއަތުގައި އިއްވަމުން ދައުލަތުން ބުނީ އެމަނިކުފާނު ވެރިކަމުގައި ހުންނެވިއިރު އެމްއެމްޕީއާރުސީ މެދުވެރިކޮށް ޓޫރިސްޓް ރިސޯޓެއް ތަރައްގީ ކުރުމަށްޓަކައި ސެޕްޓެމްބަރު 9، 2015 ގައި އާރަށ ޓޫޖީ ޕްރައިވެޓް ލިމިޓެޑަށް ކުއްޔަށް ދިނުމަށް އެކުންފުނީގެ ހިއްސާދާރު، ޔޫސުފް ނައީމުއާ މުއާމަލާތުކޮށްފައިވާ ކަމަށެވެ.
އެގޮތުން ޔޫސުފް ނައީމް، ރައީސް ޔާމީންގެ އެކައުންޓަށް އެއް މިލިއަން އެމެރިކާ ޑޮލަރު ސެޕްޓެމްބަރު 15، 2015 ގއި ޖަމާކޮށްފައިވާ ކަމަށް ދައުލަތުން ބުނެ އެވެ. އަދި އޭގެ ދެ ދުވަސް ފަހުން ޔާމީން ވަނީ އެ ފައިސާ ބޭނުން ކުރައްވައި، އެޗްއެސްބީސީގައި ޔާމީންގެ ނަން މަތީގައި ހުޅުވާފައިވާ އެހެން އެކައުންޓަކަށް އެ ފައިސާ ޖަމާކޮށްފައިވާ ކަމަށް ވެސް ދައުވާގައި ބުނެ އެވެ.
titledesc
