މޯލްޑިވްސް މީޑިއާ ކައުންސިލްގެ ގާނޫނު އިސްލާހުކޮށް މޯލްޑިވްސް މީޑިއާ ކޮމިޝަން އުފެއްދުމަށް މަސައްކަތް ކުރަމުން އަންނަ ކަމަށް އެ ކައުންސިލުން ބުނެފި އެވެ.
އެމްއެމްސީގެ ރައީސް ޝަހުބާން ފަހުމީ ވިދާޅުވީ ކައުންސިލްގެ ގާނޫނު އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް ހުށަހެޅުމަށްޓަކައި ކޮންސަލްޓަންޓެއްގެ އެހީތެރިކަމާއެކު ދެލިކޮޕީ ތައްޔާރުކުރުމުގެ މަސައްކަތް އެ ކައުންސިލުން ކުރަމުން އަންނަ ކަމަށެވެ.
"ބިލަށް އިސްލާހު ގެނައުމުގެ މައިގަނޑު މަގްސަދަކީ ނޫސްވެރިންނާއި މީޑިއާތަކުގެ ހައްގުތައް ހިމާޔަތްކުރުން. މައުލޫމާތެއް ދޭން އެދިގެން މުއައްސަސާއަކުން ނުދީފިނަމަ ކުރެވޭނެ ކަންކަން ބިލުގައި ބަޔާންކުރާނެ،" ޝަހުބާން ވިދާޅުވި އެވެ.
މި ބިލު ފާސްވެ ގާނޫނަކަށް ބަދަލުވެއްޖެ ނަމަ އެމްއެމްސީގެ ބަދަލުގައި ނޫސް، މަޖައްލާތައް ރެގިއުލޭޓްކުރާ މިނިވަން މުއައްސަސާއަކަށް ވެގެން ދާނީ އަލަށް އުފެދޭ މީޑިއާ ކޮމިޝަން ކަމަށް ޝަހުބާން ވިދާޅުވި އެވެ.
އެ ކޮމިޝަނުގައި ރަޖިސްޓްރީވާ ނޫސްވެރިންގެ ތެރެއިން ކޮމިޝަންގެ އެންގުންތަކަށް ތަބާނުވާ މީހުންނަށް ފިޔަވަޅު އެޅުމުގެ ބާރާއި މީޑިއާތަކާއި އެ މީޑިއާތަކުގެ ވެރިފައިކޮށްފައިވާ ސޯޝަލް މީޑިއާ އެކައުުންޓްތައް މޮނިޓަ ކުރެވޭނެ ކަމަށް އޭނާ ވިދާޅުވި އެވެ.
އެމްއެމްސީން ގާނޫނަށް އިސްލާހު ގެނައުމުގެ ބިލްގެ ދެލިކޮޕީއެއް އެމްއެމްސީން ތައްޔާރު ކުރަމުން އަންނައިރު ސަރުކާރުގެ ފަރާތުން މީޑިއާ ކޮމިޝަން އުފެއްދުމަށް ބިލެއް ހުށަހެޅުމަށް ވެސް ވަނީ ނިންމާފަ އެވެ. މިދިޔަ އަހަރުގެ ތިންވަނަ ދައުރަށް މިފަދަ ބިލް ހުށަހެޅުމަށް ސަރުކާރުން ނިންމި ނަމަވެސް އެ ބިލުގެ މަސައްކަތެއް ކުރިޔަށް ގޮސްފައެއް ނުވެ އެވެ.
"ސަރުކާރުގެ ފަރާތުން ހުށަހަޅާ މީޑިއާ ކޮމިޝަންގެ ބިލުގެ މަސައްކަތް ކުރިޔަށް ދާ ތަނެއް ނުފެނޭ. މީޑިއާ ކޮމިޝަނާއި ގުޅޭގޮތުން ހުރިހާ ސްޓޭކްހޯލްޑަރުން ހިމެނޭހެން ރައީސް އޮފީހުން ބޭއްވީ އެންމެ ބައްދަލުވުމެއް. މިއީ ސަރުކާރުން ހުށަހަޅާ ބިލާ ވަކިން ހުށަހަޅަން މަސައްކަތްކުރާ ބިލެއް،" ޝަހުބާން ވިދާޅުވި އެވެ.
އެމްއެމްސީން ތައްޔާރުކުރާ ބިލުގައިވާ ގޮތުން އޮންނާނީ ހަތް މެމްބަރުންގެ ކޮމިޝަނަކެވެ. އެ މެމްބަރުން އިންތިހާބު ކުރާނީ ކޮމިޝަނުގައި ރަޖިސްޓްރީވާ ނޫސްވެރިންގެ މެދުގައި ނެގޭ ވޯޓަކުން ކަމަށް ޝަހުބާން ވިދާޅުވި އެވެ.
"ފުރަތަމަ އިންތިހާބު ބާއްވާނީ އިލެކްޝަންސް ކޮމިޝަންގެ ބެލުމުގެ ދަށުން. އަދި މެމްބަރުން ވަކިކުރުމުގެ ކަންކަން ވެސް ކުރިޔަށްދާނީ އިލެކްޝަންސްގެ ބެލުމުގެ ދަށުން. ކައުންސިލްގައި މިހާރު ތިބި ސިވިލް ސާވިސް މުވައްޒަފުން ވެސް މިނިވަން މުއައްސަސާގެ ދަށަށް އޭރުން ބަދަލުވާނެ،" އެ ކޮމިޝަންގެ އިންތިހާބުގެ ކަންކަން ތަފްސީލް ކޮށްދެއްވަމުން ޝަހުބާން ވިދާޅުވި އެވެ.
މިހާރު ރާއްޖޭގައި މީޑިއާތައް ރެގިއުލޭޓް ކުރުމަށް ދެ މުއައްސަސާއެއް އޮވެ އެވެ. އެއީ، އެމްއެމްސީ އާއި ބްރޯޑްކާސްޓް މީޑިއާތައް ބަލަހައްޓާ މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އެވެ. ސަރުކާރުން ބިލު ހުށަހަޅަން ނިންމީ މި ދެ ތަން ވެސް އެއްކޮށްލުމަށެވެ. އެހެން ނަމަވެސް، އެމްއެމްސީގެ ހިޔާލު މި ކަމުގައި ތަފާތެވެ.
"އަޅުގަނޑުމެން ދެކެނީ ދެ ތަން ވެސް އޮންނަން ޖެހޭނެ ކަމަށް. ދުނިޔޭގެ ގިނަ ގައުމުތަކުގައި ކަން އޮންނަނީ އެހެން،" ޝަހުބާން ވިދާޅުވި އެވެ.
މި ހަފްތާގެ ތެރޭގައި އެމްއެމްސީއިން ތައްޔާރުކުރާ ދެލިކޮޕީ ފާސްކުރާނެ ކަމަށް ސަހުބާން ވިދާޅުވި އެވެ. އަދި އެއަށްފަހު ޕާޓީތަކުގެ ޕާލިމެންޓްރީ ގްރޫޕްތަކާއި މަޝްވަރާކުރާނެ ކަމަށާއި، މިހާރު ވެސް ވަކިވަކިން ބައެއް މަޖިލިސް މެމްބަރުންނާ މި ބިލު ސްޕޮންސާ ކުރުމާ ގުޅޭ ގޮތުން މަޝްވަރާ ކުރެވިފައިވާ ކަމަށް އޭނާ ވިދާޅުވި އެވެ.
