ކާބުލް، އަފްގާނިސްތާން (ޖެނުއަރީ 26) - އަފްގާނިސްތާނުގެ ތާލިބާން ސަރުކާރު ދިފާއުކޮށް، އެ ގައުމާ ދެކޮޅަށް އަޅާފައިވާ ފިޔަވަޅުތައް އުވާލަން ގޮވާލައި ގިނަ އަދަދެއްގެ އަންހެނުން މުޒާހަރާކޮށްފި އެވެ.
މިދިޔަ އޯގަސްޓް މަހު ވެރިކަމަށް އައި ތާލިބާނުން ވަނީ ހުއްދަ ނެތި މުޒާހަރާ ކުރުން މަނާކޮށްފަ އެވެ. އެހެންވެ، މީގެ ކުރިން ބޭއްވި މުޒާހަރާތައް ރޫޅާލާފައި ވަނީ އަނިޔާވެރިކޮށެވެ.
ނަމަވެސް ބުދަ ދުވަހުގެ މުޒާހަރާއަށް ހުއްދަ ދިނުމުން، ގާތްގަނޑަކަށް 100 އަންހެނުން އެއްވީ ކާބުލްގައި ކުރިން އެމެރިކާ އެމްބަސީ ހިންގި އިމާރާތުގެ ކުރި މައްޗަށެވެ.
އެ މީހުން ތިބީ ތާލިބާން ސަރުކާރަށް ތާއީދު ކުރާކަން އަންގައިދޭ ޕޯސްޓަރުތައް ހިފައިގެންނެވެ. އެ މީހުން ގޮވާލީ އެމެރިކާއިން ހިފަހައްޓައިގެން އުޅޭ އަފްގާނިސްތާނުގެ 9.5 ބިލިއަން ޑޮލަރު ދޫކޮށްލުމަށެވެ.
ތާލިބާނުން ވެރިކަމަށް އައުމާ އެކު އެ ފައިސާ ހިފެހެއްޓުމުގެ އިތުރުން ބައިނަލްއަގްވާމީ އެހީ މެދުކަނޑާލާފައި ވާތީ އަފްގާނިސްތާނުގައި ވަނީ އިންސާނީ ކާރިސާއެއް އުފެދިފަ އެވެ.
ތާލިބާނަށް ތާއީދު ކުރާ އަންހެނުންގެ މުޒާހަރާ ބާއްވާފައިވާ އިރު، އަފްގާނިސްތާނުގެ އިންސާނީ ހައްގުތަކުގެ ހާލަތާ ގުޅޭ ބައްދަލުވުމެއް ވަނީ ނޯވޭގައި ނިންމާލާފަ އެވެ.
ތާލިބާން ވަފުދެއް ފުރަތަމަ ފަހަރަށް ޔޫރަޕަށް ދަތުރުކޮށް ބައްދަލުކުރީ އަފްގާން އެކްޓިވިސްޓުންނާއި ޔޫރަޕްގެ ޑިޕްލޮމެޓުންނާ އެވެ. މަޝްވަރާތައް ބޭއްވި އިންސާނީ ހައްގުތަކާ ގުޅޭ ގޮތުންނެވެ.
މަޝްވަރާގައި ހުޅަނގުގެ ޑިޕްލޮމެޓުން ބުނީ އެހީތައް އަލުން ފޯރުކޮށްދޭން ފަށާނީ އަންހެނުންނާ މެދު އަމަލު ކުރާ ގޮތަށް ބަލައިގެން ކަމަށެވެ.
މީގެ ކުރިން 1996 ވަނަ އަހަރުން 2001 ވަނަ އަހަރަށް ތާލިބާނުން ވެރިކަން ކުރިއިރު އަންހެނުންގެ ހައްގުތައް އޮތީ ހިފަހައްޓާފަ އެވެ.
މި ފަހަރު ވެރިކަން ކުރާނީ ތަފާތުކޮށް ކަމަށް ބުނި ނަމަވެސް، އަންހެނުން އެކަނި ދަތުރު ކުރުމާއި، ވަޒީފާއަށް ދިޔުމާއި، ތައުލީމް ހާސިލްކުރުމަށް އުނދަގޫވާ ފިޔަވަޅުތައް މިހާރު ވެސް ދަނީ ތަންފީޒު ކުރަމުންނެވެ.
ހަމަހަމަ ހައްގުތައް ދިނުމަށް ގޮވާލައި ތާލިބާނުންނާ ދެކޮޅަށް އަޑު އުފުލަމުން ދިޔަ ދެ އަންހެނުން މިދިޔަ ހަފްތާގައި ވަނީ ވީނުވީއެއް ނޭނގި ގެއްލިފަ އެވެ. ތާލިބާނުން ބުނީ އެ މީހުން ހައްޔަރު ނުކުރާ ކަމަށެވެ.
