ލަންޑަން (ޖެނުއަރީ 26) - އިނގިރޭސި ޕްރިމިއާ ލީގުގެ ރެލިގޭޝަން ޒޯނުގައި އޮތް ވަޓްފޯޑްގެ ކޯޗަކަށް ތަޖުރިބާކާރު ކޯޗު ރޯއީ ހޮޖްސަން ހަމަޖައްސައިފި އެވެ.
އުމުރުން 74 އަހަރުގެ ހޮޖްސަން އަކީ މި ސީޒަނުގައި ވަޓްފޯޑަށް ކޯޗުކޮށްދޭނެ ތިން ވަނަ ކޯޗެވެ. ދެ ވަނަ ޑިިވިޝަނުން ޕްރޮމޯޓްވެ، ވަޓްފޯޑަށް މި ސީޒަންގެ ފުރަތަމަ މެޗުތަކުގައި ކޯޗުކޮށްދިނީ ސްޕެއިނުގެ ޒިސްކޯ މުނޯޒް އެވެ. އޭނާ މަގާމުން ވަކިކޮށް ވަޓްފޯޑުން ދެން ގެނައީ ކުރިން ލެސްޓާ ސިޓީ އާއި ޗެލްސީ އަށް ކޯޗުކޮށްދިން ކްލައުޑިއޯ ރަނިއޭރީ އެވެ.
ރަނިއޭރީގެ ކޯޗުކަމުގައި ވަޓްފޯޑުން ކުޅުނު 14 މެޗުގެ ތެރެއިން މޮޅުވީ އެންމެ ދެ މެޗުންނެވެ. އޭގެ ތެރޭގައި މެންޗެސްޓާ ޔުނައިޓެޑް ބަލިކުރި މެޗު ހިމެނެ އެވެ. ރަނިއޭރީ ވަކިކުރަން ނިންމީ ދާދި ފަހުން ލީގުގައި ވަޓްފޯޑް އަމިއްލަ ދަނޑުގައި ކުޅުނު މެޗުން ރެލިގޭޝަނުގައި އޮތް ނޮރިޗް ސިޓީ އަތުން 3-0 އިން ބަލިވުމުންނެވެ. އެ ނަތީޖާގެ ސަބަބުން ރަނިއޭރީގެ އިތުބާރު ގެއްލި އޭނާ ވަޓްފޯޑްގެ ކޯޗުގެ މަގާމުން ވަކިކުރިތާ 24 ގަޑިއިރު ތެރޭ މި ވަނީ ހޮޖްސަންއާ ޓީމު ހަވާލުކޮށްފަ އެވެ.
ހޮޖްސަން އަކީ އިޓަލީގެ ޕޯޒޯ ފެމިލީން 2012 ވަނަ އަހަރު ވަޓްފޯޑް ގަތް ފަހުން އެ ޓީމަށް ގެނައި 15 ވަނަ ކޯޗެވެ. ޕޯޒޯ ފެމިލީން ހިންގާ އިޓަލީގެ ކްލަބް އުދިނޭޒީގައި ވެސް ހޮޖްސަން ކޯޗުކޮށްދިންއިރު، އޭނާ ވަޓްފޯޑަށް ގެންނަން ނިންމީ އެ ފަހަރު އުދިނޭޒީގައި ކުރި މަސައްކަތް ރަނގަޅު ވުމުންނެވެ.
މިދިޔަ ސީޒަނަށް ފަހު ކްރިސްޓަލް ޕެލަސްގެ ކޯޗުކަން އަމިއްލަ އަކަށް ދޫކޮށްލި ހޮޖްސަން ވަޓްފޯޑަށް ކޯޗުކޮށްދޭން އެއްބަސްވި ކޮންޓްރެކްޓްގެ މުއްދަތެއް އިއުލާނެއް ނުކުރެ އެވެ. އެކަމަކު، އޭނާ އަށް ޓާގެޓަކަށް ދީފައި އޮތީ ވަޓްފޯޑް ޕްރިމިއާ ލީގުގައި ބޭއްވުމެވެ. ވަޓްފޯޑް މި ވަގުތު އޮތީ ލީގުގެ 19 ވަނައިގަ އެވެ.
ވަޓްފޯޑަކީ ހޮޖްސަން ޕްރިމިއާ ލީގުގައި ކޯޗުކޮށްދޭނެ ހަ ވަނަ ކްލަބެވެ. މީގެ ކުރިން އޭނާ ފެނުނީ ކްރިސްޓަލް ޕެލަސްގެ އިތުރުން ބްލެކްބާން ރޯވާސް، ފުލަމް، ލިވަޕޫލް، ވެސްޓް ބްރޮމްވިޗް އަލްބިއަން އިންނެވެ.
ބައިގަރުނުވީ ކޯޗިން ކެރިއަރުގައި ހޮޖްސަން ވަނީ އަށް ގައުމެއްގައި 17 ޓީމަކަށް ކޯޗުކޮށްދީފަ އެވެ. ގައުމީ ޓީމުތަކަށް ބަލާއިރު ހޮޖްސަން ވަނީ އިންގްލެންޑާއި ސްވިޒަލެންޑާއި ޔޫއޭއީ އަދި ފިންލެންޑްގެ ކޯޗަކަށް މަސައްކަތްކޮށްފަ އެެވެ.
