ކޮޅުނބުން އައްޑޫ ސިޓީ ގަމަށް ދަތުރުކުރާ ސްރީލަންކަން އެއާލައިންސްގެ ފްލައިޓުން ދަތުރުކުރާ ފަސިންޖަރުންނަށް މަންޓާ އެއާ މެދުވެރިކޮށް ހުވަދޫ އަށް ދަތުރުކުރެވެ ގޮތަށް ހަދަން ނިންމައިފި އެވެ.
މިއީ ސްރީލަންކަން އެއާލައިންސް އިން ބޭނުންވެގެން މީގެން ކުރިން ވެސް ހަމަޖެހޭތޯ މަސައްކަތް ކުރި ކަނެކްޝަނެކެވެ. ކުރިން މިކަމަށް ގައުމީ އެއާލައިން، މޯލްޑިވިއަނާ އެކު އެއްބަސްވުމަކަށް އާދެވުނު ނަމަވެސް އެކި ސަބަބުތަކާ ހުރެ އެ ދަތުރުތައް ފެށޭ ގޮތް ވަނީ ނުވެފަ އެވެ.
މައުލޫމާތު ލިބިފައިވާ ގޮތުގައި ސްރީލަންކަން އެއާލައިންސްއާ މަންޓާ އެއާއާ ދެމެދު ވެފައިވާ އެއްބަސްވުމުގެ ދަށުން، ކޮންމެ ހޮނިހިރު ދުވަހަކު ގަމަށް ދަތުރުކުރާ ސްރީލަންކަން އެއާލައިންސްގެ ފްލައިޓަށް މަންޓާ އެއާއިން ކޫއްޑޫ ކަނެކްޝަން ދޭނެ އެވެ.
މަންޓާގެ ފްލައިޓު ދަތުރުކުރާނީ މާލެ-ކޫއްޑޫ-ގަން-ކޫއްޑޫ-މާލެ އަށެވެ. މިއާ އެކު އައްޑޫއިން ހުވަދޫއަށް ދަތުރުކުރަން ބޭނުންވާ ފަސިންޖަރުންގެ އިތުރުން އައްޑޫ މަގުން ލަންކާއަށް ދަތުރުކުރަން ބޭނުންވާ ހުވަދޫ މީހުންނަށް ވެސް އެ ފުރުސަތު ހުޅުވިގެން ދާނެ އެވެ.
މި ދަތުރުތައް ފެށުމާ ގުޅޭގޮތުން މައުލޫމާތު ދެމުން ސްރީލަންކަން އެއާލައިންސްގެ ރާއްޖޭގެ އެޖެންޓު އޭސް ޓްރެވަލްސްގެ މެނޭޖިން ޑިރެކްޓަރު މުހައްމަދު ފިރާގު "އަދަދު" ނޫހަށް ވިދާޅުވީ އުއްމީދަކީ މި ދަތުރުތަކާ އެކު ލަންކާ ފްލައިޓުން ދަތުރުކުރާ ފަސިންޖަރުން އިތުރުވުން ކަމަށެވެ.
"ހޮނިހިރު ދުވަހު ސީދާ ކޮޅުނބުން ގަމަށް އަޅާ އިރު، މި ފްލައިޓުން ބޭނުންވާ ވަރަށް ފަސިންޖަރުން ނުލިބޭ. އުއްމީދަކީ ހުވަދޫ ގުޅާލެވުމުން މި ފްލައިޓުން ދަތުރުކުރާ ފަސިންޖަރުންގެ އަދަދު އިތުރުވުން" އޭނާ ވިދާޅުވި އެވެ.
ފިރާގު ވިދާޅުވި ގޮތުގައި މިއީ ޓޫރިޒަމަށާއި އެ ސަރަހައްދުގެ ވިޔަފާރިވެރިންނަށް ވެސް ފަހި ފުރުސަތުތަކެއް ހުޅުވިގެން ދާނެ ކަމެކެވެ. އަދި، މިއާ އެކީ އައްޑޫ އަތޮޅުގެ ޓޫރިޒަމަށް ހާއްސަ ޕެކޭޖުތަކެއް ފަރުމާ ކުރެވިގެން ދާނެ ކަމަށާއި ކާގޯ ފޮނުވުމުުގެ ހިދުމަތް ވެސް ފުޅާވެގެން ދާނެ ކަމަށް އޭނާ ވިދާޅުވި އެވެ.
މީގެ ކުރިން ސްރީލަންކަން އެއާލައިންސް އިން ވަނީ ގެއްލުންވާތީ މި ދަތުރުތައް ހުއްޓާލާފާ އެވެ. އެކަމަކު ހުވަދޫ ކަނެކްޝަން ލިބުމުން ފަސިންޖަރުންގެ އަދަދުތައް އިތުރުވެ ފައިދާ ވާނެ ކަމުގެ އުއްމީދު އެބައޮތް ކަމަށް ފިރާގު ވިދާޅުވި އެވެ.
ސްރީލަންކަންއާ އެކު މި ދަތުރުތައް ފަށާ މަންޓާ އެއާ އިން މާދަމައިން ފެށިގެން އައްޑޫ ސިޓީއަށް ޝެޑިއުލް ދަތުރުތައް ވެސް ފަށާނެ އެވެ.
