ތެހްރާން، އިރާން (ޖެނުއަރީ 24) - އެމެރިކާގެ ގައިދީން މިނިވަންކޮށް، 2015 ވަނަ އަހަރު އެކުލަވާލި ނިޔުކްލިއާ ޑީލް އިއާދަކުރުމާ ގުޅޭ މަޝްވަރާގައި އެއްބަސްވުމަކަށް އާދެވިދާނެ ކަމަށް އިރާނުން ބުނެފި އެވެ.
"މިއީ ވަރަށް ތަފާތު ދެ ކަންތައް. އެކަމަކު އަނެއް ފަރާތުން [އެމެރިކާއިން] ބޭނުންވާ ނަމަ، މި ދެ ކަންތަކުގައި ބަރޯސާވެވޭ، ދިގުދެމިގެންދާ އެއްބަސްވުމަކަށް ކުރު މުއްދަތެއްގެ ތެރޭގައި އާދެވިދާނެ،" އިރާން ފޮރިން މިނިސްޓްރީގެ ތަރުޖަމާން ސައީދް ހާތިބްޒާދެހް ދެއްވާ ހަފްތާ ޕްރެސް ކޮންފެރެންސްގައި ވިދާޅުވި އެވެ.
ހާތިބްޒާދެހް އެހެން ވިދާޅުވެފައިވާ އިރު، އެމެރިކާއިން އިރާނަށް ކަނޑައަޅާފައި ހުންނަ މަންދޫބު ރޮބަޓް މެލީ އާދީއްތަ ދުވަހު ވިދާޅުވީ އެމެރިކާގެ ހަތަރު ގައިދީން މިނިވަން ނުކުރާ ނަމަ، އެމެރިކާއިން އެއްބަސްވުމަކަށް ދިޔުން ނާދިރު ކަމަށެވެ.
"މަޝްވަރާގެ ފުރަތަމަ ދުވަހުން ފެށިގެން ވެސް އިރާނުން އެއްވެސް ޝަރުތެއް ބަލައިގެންފައެއް ނުވާނެ. މަޝްވަރާ ވަރަށް އުނދަގޫ. އެހެންވީމާ އުނދަގޫ ވާހަކަތައް ދައްކައިގެން އިތުރަށް އުނދަގޫ ކުރުމުގެ ބޭނުމެއް ނެތް،" ހާތިބްޒާދެހް ވިދާޅުވި އެވެ.
އިރާނުގައި ބަންދުކޮށްފައި ތިބި މީހުންނަކީ އިރާނާއި އެމެރިކާގެ ރައްޔިތެއް ކަމަށްވާ އުމުރުން 50 އަހަރުގެ ވިޔަފާރިވެރިޔާ ސިއަމަކް ނަމަޒީ އާއި އޭނާގެ 85 އަހަރުގެ ބައްޕަ ބަކެރް އާއި ތިމާވެށީގެ އެކްޓިވިސްޓް އުމުރުން 66 އަހަރުގެ މުރާދް ތަހްބާޒް އާއި 57 އަހަރުގެ ވިޔަފާރިވެރިޔާ އިމާދް ޝަރްގީ އެވެ.
"މިއީ އިންސާނީ މައްސަލައެއް އެހެންވީމަ މިކަން އަޅުގަނޑުމެންގެ އެޖެންޑާގައި ހިމެނިން. މަޝްވަރާގެ ކުރިން ވެސް އަދި މަޝްވަރާގެ ތެރޭގައި ވެސް،" ގައިދީން މިނިވަން ކުރުމާ ގުޅޭ ގޮތުން ހާތިބްޒާދެހް ވިދާޅުވި އެވެ.
ވިއެނާގައި ކުރިއަށްދާ މަޝްވަރާއާ ގުޅޭ ގޮތުން އޭނާ ވިދާޅުވީ "ކުރިއެރުންތަކުގެ މިސްރާބު ހުރީ ރަނގަޅު ދިމާލަށް" ކަމަށާއި އެކަމަކު "ވަރަށް މުހިއްމު މައްސަލަތައް ހައްލުނުވެ" ވަނީ އެމެރިކާގެ ސިޔާސީ ނިންމުންތައް ނައިސްގެން ކަމަށެވެ.
ދެހާސް ފަނަރަ ވަނަ އަހަރު ސޮއިކުރި ނިޔުކްލިއާ އެއްބަސްވުން އިއާދަކުރުމުގެ މަޝްވަރާތައް އަލުން ފެށީ މިދިޔަ ނޮވެމްބަރު މަހުގެ ފަހުކޮޅު އެވެ. އޭގެ ކުރިން މަޝްވަރާތައް ކުރިއަށް ގެންގޮސް، މިދިޔަ ޖޫން މަހު މެދުކެނޑުމަކަށް އައީ އިރާނުގެ ރައީސް ކަމަށް އިބްރާހިމް ރައިސީ އިންތިހާބުވެ، ސަރުކާރު ބަދަލުވުމުންނެވެ.
ނިޔުކްލިއާ އެއްބަސްވުމުގައި ސޮއިކޮށްފައިވާ ގައުމުތަކަކީ އިރާން، އެމެރިކާ، ޗައިނާ، ރަޝިއާ، އިނގިރޭސިވިލާތް، ފްރާންސް އަދި ޖަރުމަނުވިލާތެވެ. އޭގެ ދަށުން އިރާނުގެ ނިޔުކްލިއާ މަޝްރޫއާ ގުޅޭ ބައެއް ހަރަކާތްތައް މަޑުޖައްސާލުމުން، އެ ގައުމާ ދެކޮޅަށް އަޅާފައިވާ ބައެއް ދަތިކުރުމުގެ ފިޔަވަޅުތައް އުވާލި އެވެ.
ނަމަވެސް 2018 ވަނަ އަހަރު އެމެރިކާގެ ރައީސް ޑޮނަލްޑް ޓްރަމްޕް ނިންމެވީ އެއްބަސްވުމުން ވަކިވެ، އަލުން ދަތިކުރުމުގެ ފިޔަވަޅު އެޅުމަށެވެ. އޭގެ އަހަރެއް ފަހުން އިރާނުން ވެސް އެއްބަސްވުމަކަށް އަމަލު ކުރުން ހުއްޓާލައި، ނިޔުކްލިއާ މަޝްރޫއުގެ މަސައްކަތްތައް ކުރިއަށް ގެންދަން ފެށި އެވެ.
