ސުޕަ ޔުނައިޓެޑް ސްޕޯޓްސް (ސަސް) 1-0 އިން ބަލިކޮށް އެފްއޭއެމް ޔޫތް ޗެމްޕިއަންޝިޕްގެ ފެށުން ކުލަބް އީގަލްސް އިން ރަނގަޅުކޮށްފި އެވެ.
ނަވާރަ އަހަރުން ދަށުގެ ކުޅުންތެރިންނަށް އަަމާޒުކޮށްގެން މި ފަހަރު ކުރިއަށްދާ މި ޔޫތު މުބާރާތުގައި މި އަހަރު ނުވަ ޓީމެއް ވާދަކުރެ އެވެ. އެއީ ފުރަތަމަ ޑިވިޝަންގެ އަށް ޓީމުގެ އިތުރުން މަހިބަދޫ ސްޕޯޓްސް ކުލަބެވެ.
ނުވަ ޓީމު ދެ ގްރޫޕަކަށް ބަހާލާފައިވާއިރު، ފަސް ޓީމު ހިމެނޭ ގްރޫޕް އޭގައި އީގަލްސް އާއި މާޒިޔާ އަދި ގްރީން ސްޓްރީޓްސްގެ އިތުރުން ދެން ހިމެނެނީ ސުޕަ ޔުނައިޓެޑް ސްޕޯޓްސް (ސަސް) އާއި ދަ ގްރާންޑޭ ސްޕޯޓްސް ކްލަބް އެވެ. އަދި ގްރޫޕް ބީގައި ހިމެނެނީ ޓީސީ ސްޕޯޓްސް ކްލަބާއި ކުލަބް ވެލެންސިއާ އަދި މަހިބަދޫގެ އިތުރުން ޔުނައިޓެޑް ވިކްޓްރީ (ޔޫވީ) އެވެ.
މެޗުގައި ފުރަތަމަ ގޯލާ އަމާޒުކޮށް ހަމަލާއެއް ފޮނުވާލީ ސަސް އިންނެވެ. އޭރިއާ ބޭރުން ސަސްގެ އަހުމަދު ޖުމާން ފޮނުވާލި ބޯޅަ އީގަލްސްގެ ކީޕަރު ޝައިހާން އަލީ ވަނީ ދިފާއުކޮށް، ހުރަސް ދަނޑި މަތިން ބޭރުކޮށްލާފަ އެވެ.
އީގަލްސް އިން ކުުޅުން ރަނގަޅުކޮށް މެޗުގެ ހަތްވަނަ މިނެޓުގައި ފުރަތަމަ ހަމަލާ އުފެއްދި އެވެ. އޭރިއާގެ އަރިމަތިން ލިބުނު ހިލޭ ޖެހުމުން މިޑްފިލްޑަރު އިބްރާހިމް ޝަރީފް ނަގައިދިން ބޯޅަ ބޮލުން ކެޕްޓަން ހުމައިދު ހުސައިން ފޮނުވާލި ނަމަވެސް އެ ހަމަލާ ގޯލާ އަމާޒުކޮށްލެވޭ ގޮތެއް ނުވި އެވެ. އޭގެ ދެ މިނެޓު ފަހުން މުޙައްމަދު ރިޝާން އޭރިއާ ބޭރުން ފޮނުވާލި ހަމަލާ އަމާޒުވީ ގޯލްގެ އަރިމަތީ ދާގަނޑަަށެވެ.
ފުރަތަމަ ހާފުގެ އެންމެ ނުރައްކާތެރި ހަމަލާ އުފެއްދީ ސަސް އިންނެވެ. އޭރިއާ ބޭރުން އަލީ ޝާޒް ހަބީބު ފޮނުވާލި ބާރު ހަމަލާ ކީޕަރު ޝައިހާން ވަނީ ދިފާއުކޮށްފަ އެވެ.
މެޗުގެ ފުރަތަމަ ގޯލް އީގަލްސް އިން ޖެހީ 32 ވަނަ މިނެޓުގަ އެވެ. މި ގޯލް ޖަހައިދިނީ މުޙައްމަދު ސަމާހު މޫސާ އެވެ. ހާފްގެ މެދުތެރެއިން އިސްމާއިލް ސާއިފް ދިން ޕާސް ކޮންޓްރޯލް ކުރުމަށްފަހު ސަމާހު އޭރިއާ ތެރެއަށް ވަދެ ގޯލްގެ މަތީ ކަނަށް ބޯޅަ ފޮނުވާލީ ސަސްގެ ކީޕަރު ޔޫސުފް މީސަމް އަށް އެއްވެސް ފުރުސަތެއް ނުދީ އެވެ.
ފުރަތަމަ ހާފް ނިމުމުގެ ކުރިން ނަތީޖާ ހަމަހަމަ ކުރުމަށް ސަސް އަށް ރަނގަޅު ފުރުސަތެއް ލިބުނެވެ. މެޗުގެ 43 ވަނަ މިނިޓުގައި އޭރިއާ ތެރެއިން ހުސްކޮށް ހުރެ ފޯވާޑް ޝާޒް ފޮނުވާލި ބޯޅަ ކީޕަރު ޝައިހާން ދިފާއުކުރީ އެވެ.
ދެ ވަނަ ހާފުގައި ވެސް ހުސް ފުރުސަތުތައް ތަނަވަސް ކުރީ އީގަލްސް އިންނެވެ. އެ ގޮތުން މެޗުގެ 58 ވަނަ މިނިޓުގައި ސަމާހު އަށް ހުސް ފުރުސަތެއް ލިބުނެވެ. އީގަލްސްގެ މުޙައްމަދު ރިޝާން ނަގައިދިން ހުރަސް ސަސްގެ ޑިފެންޑަރު އަހުމަދު ރީހާން ދިފާއުކުރަން އުޅުމުގެ ތެރޭގައި ލިބުނީ ސާމާހު އަށެވެ. އޭނާ ފޮނުވާލި ބާރު ހަމަލާ ކީޕަރު މީސަމް ހުށިހާރުކަމާ އެކު ދިފާއުކުރި ކުރިއެވެ.
އޭގެ ދެ މިނެޓު ފަހުން އީގަލްސް އަށް ލީޑް ފުޅާ ކުރަން ވަރަށް ހުސް ފުރުސަތެއް ލިބުނެވެ. ރިޝާން މުޅިން ހުސްކޮށް ހުރެ އޭރިއާ ތެރެއަށް ވަދެ ފޮނުވާލި ބޯޅަ ކީޕަރު މީސަމް މިފަހަރު ވެސް ދިފާއު ކުރިއެވެ. ރިޝާން އެ ބޯޅަ ގޯލަށް ފޮނުވާލުމުގެ ބަދަލުގައި އަރިމަތީގައި މުޅިން ހުސްކޮށް ހުރި ސަމާހު އަށް ބޯޅަ ދިންނަމަ ގޯލެއް ޖަހަން މާ ފުރުސަތު ބޮޑުވީހެވެ.
މެޗުގެ ފަހު ފަންސަވީސް މިނެޓުގައި ސަސް އިން ގޯލެއް ޖެހުމަށް ކުރިއަށް ޖެހިލައިގެން ކުޅުނެވެ. ނަމަވެސް އީގަލްސްގެ ކީޕަރު ޝައިހާން ދިފާއުކުރަންޖެހޭ ވަރުގެ ނުރައްކާ ހަމަލާއެއް ފޮނުވައެއް ނުލެވުނެވެ. ސަސްގެ ހަމަލާތައް ހުއްޓުވުމަށް އީގަލްސްގެ ޑިފެންސް ލައިން ލީޑްކުރި ކެޕްޓަން ހުމެއިދު ހުސައިން މޮޅު ކުޅުމެއް ދެއްކި އެވެ. މެޗުގެ މޮޅު ކުޅުންތެރިޔާގެ މަގާމްވެސް ހޯދީ ހުމެއިދު އެވެ. މި ސީޒަނުގައި އީގަލްސް ސީނިއާ ޓީމުގައި ވެސް ހުމެއިދު ވަނީ ކުޅެފަ އެވެ.
މި މުބާރާތުގައި މިރޭ ކުޅޭނީ ގްރޫޕް ބީގެ މެޗެކެވެ. މި މެޗުގައި ވާދަކުރާނީ މަހިބަދޫ ސްޕޯޓްސް ކުލަބާއި ޔުނައިޓެޑް ވިކްޓްރީ އެވެ.
