ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ ނުވަ ސްކޫލެއްގައި ހިންގާ ސްޕެޝަލް އެޑިއުކޭޝަން ނީޑްސް (ސެން) ކްލާސްތަކުގައި ކުދިންނަށް ކިޔަވައި ދިނުމަށް ބޭނުންވާ ތަކެތި ހަދިޔާކޮށްފި އެވެ.
ބީއެމްއެލްއިން ބުނީ ސީއެސްއާރު ސްޓްރެޓެޖީގެ ދަށުން ހާއްސަ އިސްކަމެއް ދީގެން ނުކުޅެދުންތެރިކަން ހުންނަ ފަރާތްތަކަށް އެހީވުމަށް ހަދިޔާކުރި އާލާތްތަކަކީ ކުދިންގެ ގާބިލުކަމާއި، އެހެން މިހުންނާއި ގުޅިގެން މުޖުތަމައުގައި ހަރަކާތްތެރި ވުމަށް ބޭނުންވާ ހުނަރު ތަރައްގީ ކުރުމާއި އެކުދިންގެ ތައުލީމީ ބޭނުންތައް ބަލައިގެން ހޯދާފައިވާ ވަސީލަތްތަކެއް ކަމަށެވެ.
ބޭންކުން ފޯރުކޮށްދިން އެހީތެރިކަމާއި އެކު އެ ސްކޫލުތަކުގެ ސެން ކްލާސްތަކުގައި ކިޔަވަމުންދާ 330 އަށްވުރެ ގިނަ ދަރިވަރުންނަށް ކިޔަވައިދިނުމަށް އިތުރު ލުއިފަސޭހަތަކެއް ލިބިގެންދާނެ އެވެ.
ބީއެމްއެލްއިން ހަދިޔާކުރި ތަކެތި ބޭނުންކޮށްގެން ސްކޫލެއްގެ ސެން ކްލާހެއްގައި ދަރިވަރަކަށް ކިޔަވައިދެނީ / ފޮޓޯ: ބީއެމްއެލް
ކޮންމެ އަހަރެއްގެ ވެސް ޖެނުއަރީ 24، އަކީ "އިންޓަނޭޝަނަލް ޑޭ އޮފް އެޑިއުކޭޝަން" ކަމަށްވާއިރު ބީއެމްއެލްއިން މި އެހީ ދީފައި މިވަނީ އެ ދުވަހާ ދިމާކޮށެވެ.
ތަކެތި ހަދިޔާ ކުރި ސްކޫލްތަކަކީ
1- ށ. ފުނަދޫ ސްކޫލު
2- މޭނާ ސްކޫލް، ނ. ހޮޅުދޫ
3- މަދަރުސަތުލް އިފްތިތާޙް، ޅ. ނައިފަރު
4- ކ. ގުރައިދޫ ސްކޫލް
5- އއ. އުކުޅަސް ސްކޫލް
6- އދ. އަތޮޅު ތައުލީމީ މަރުކަޒު، އދ. މަހިބަދޫ
7- އިހައްދޫ ސްކޫލް، ލ.ގަން
8- ގއ. އަތޮޅު ސްކޫލް، ގއ. ކޮލަމާފުށި
9- ގދ. މަޑަވެލި ސްކޫލް
މިދިޔަ ދެ އަހަރު ތެރޭ ބީއެމްއެލުން ވަނީ ރާއްޖޭގެ 29 ސްކޫލެއްގައި ހިންގާ ސެން ކްލާސްތަކަށް ބޭނުންވާ ތަކެތި ހަދިޔާކޮށްފަ އެވެ.
