ޕެރިސް، ފްރާންސް (ޖެނުއަރީ 24) - ފްރާންސްގެ ޕީއެސްޖީ އަށް ބަދަލުވި ފަހުން ޑިފެންޑަރު ސާޖިއޯ ރާމޯސް ޖެހި ފުރަތަމަ ގޯލާ އެކު 4-0 އިން ރެއިމްސް ބަލިކޮށް ލީގު ތާވަލްގެ އެއް ވަނައިގައި ޕީއެސްޖީން ލީޑު ދަމަހައްޓައިފި އެވެ.
ޕީއެސްޖީ އެއް ވަނައިގައި އޮތީ 22 މެޗުން 53 ޕޮއިންޓާ އެކު އެވެ. ދެ ވަނައިގައި އޮތީ ރޭ މެޓްޒް ދަނޑުގައި 2-1 އިން މޮޅުވި ނީސް އެވެ. ނީސް އަށް ވަނީ 22 މެޗުން 42 ޕޮއިންޓް ލިބިފަ އެވެ.
ހިލޭ ޓްރާންސްފާއެއްގައި ރެއާލް މެޑްރިޑް ދޫކޮށް މި ސީޒަނުގައި ޕީއެސްޖީ އަށް ބަދަލުވި ރާމޯސް އަށް އަނިޔާގެ ސަބަބުން ގިނަ މެޗުތަކެއް ގެއްލުނެވެ. އޭނާ ޕީއެސްޖީ އަށް ފުރަތަމަ މެޗު ކުޅުނީ ނޮވެމްބަރު 28 ވަނަ ދުވަހު ފްރެންޗް ލީގުގައި ސެއިން އެޓިއެންއާ ދެކޮޅަށެވެ. ރޭ ރާމޯސް ގޯލު ޖެހީ މެޗުގެ ދެ ވަނަ ގޯލެވެ. ފުރަތަމަ ގޯލު ޖެހީ ޕީއެސްޖީ އަށް ކުޅޭ އިޓަލީގެ މިޑްފީލްޑަރު މާކޯ ވެރާޓީ އެވެ. މިއީ 2017 ވަނަ އަހަރުގެ މެއި މަހުގެ ފަހުން ލީގުގައި ވެރާޓީ ކާމިޔާބުކުރި ފުރަތަމަ ގޯލެވެ.
ފިނި މޫސުމުގެ ބްރޭކްގައި ޗުއްޓީގައި ހުއްޓައި ކޮވިޑަށް ޕޮޒިޓިވްވި މެސީ ވަނީ ރޭ ބަދަލު ކުޅުންތެރިއެއްގެ ގޮތުގައި ފަހު 30 ވަރަކަށް މިނިޓަށް ކުޅެން އަރައިފަ އެވެ. އޭގެ އިރުކޮޅެއް ފަހުން ޕީއެސްޖީން ޖެހި ތިން ވަނަ ގޯލަކީ ރެއިމްސްގެ ވޫޓް ފައޭސް އަތުން ބައިކޮޅަށް ވަން ގޯލެކެވެ. މެޗު ނިމެން 15 މިނިޓަށް ވެފައި ހުއްޓައި ކީލިއަން އެމްބާޕޭ ދިން ބޯޅަ އަކުން ޕީއެސްޖީގެ ފަހު ގޯލު ޖެހީ ޕޯޗުގީސް މިޑްފީލްޑަރު ޑަނީލޯ ޕެރޭރާ އެވެ.
