މެޑްރިޑް (ޖެނުއަރީ 24) - ސްޕެނިޝް ލީގުގެ އެއް ވަނައިގައި އޮތް ރެއާލް މެޑްރިޑުން ފަހަތުން އަރައި 2-2 އިން އެލްޗޭއާ އެއްވަރުކޮށް ބަލިނުވެ ކިރިޔާ ސަލާމަތްވިއިރު، ފަހު ވަގުތު ފްރެންކީ ޑި ޔޯން ޖެހި ގޯލުން ބާސެލޯނާ އިން އަލަވޭސް އަތުން 1-0 އިން މޮޅުވެއްޖެ އެވެ.
ރެއާލް އެއް ވަނައިގައި އޮތީ 22 މެޗުން 50 ޕޮއިންޓާ އެކު އެވެ. ދެ ވަނައިގައި އޮތް ސެވިއްޔާ އަށް ވަނީ 22 މެޗުން 46 ޕޮއިންޓް ލިބިފަ އެވެ. ރެއާލް ބެޓިސް ތިން ވަނައިގައި 22 މެޗުން 40 ޕޮއިންޓާ އެކު އޮތްއިރު، ހަތަރެއްގައި އޮތް އެންމެ ފަހުގެ ޗެމްޕިއަން އެތުލެޓިކޯ މެޑްރިޑަށް ލިބިފައިވަނީ 21 މެޗުން 36 ޕޮއިންޓެވެ. އަދި ބާސެލޯނާ ރޭގެ މޮޅާ އެކު ފަސް ވަނައިގައި އޮތީ 21 މެޗުން 35 ޕޮއިންޓް ހޯދައިގެންނެވެ.
ލީގުގެ 15. ވަނައިގައި އޮތް އެލްޗޭ އިން ވަނީ ރޭ ރެއާލް ދަނޑުގައި ކުޅުނު މެޗުގެ 82 ވަނަ މިނިޓާ ހަމައަށް 2-0 އިން ލީޑެއްގައި އޮވެފަ އެވެ. މި މެޗުގައި ރެއާލަށް ލީޑުނަގައިދޭން ކެޕްޓަން ކަރިމް ބެންޒެމާ ފޮނުވާލި ޕެނަލްޓީ ކާމިޔާބެއްނުވި އެވެ.
އެލްޗޭ އަށް މެޗުގެ ފުރަތަމަ ގޯލު ޖަހައިދިނީ 42 ވަނަ މިނިޓްގައި ލޫކަސް ބޯޔޭ އެވެ. އަދި މެޗުގެ 76 ވަނަ މިނިޓްގައި އެލްޗޭގެ ޕެރޭ މީއާ އިތުރު ގޯލެއް ޖަހައި ރެއާލް ހާސްކޮށްލި އެވެ.
މެޗުގެ ތެރެއަށް ވަންނަން ރެއާލުން ކުރަމުން އައި މަސައްކަތަށް އުއްމީދެއް ލިބުނީ 82 ވަނަ މިނިޓްގައި ޕެނަލްޓީ އަކުން ލޫކަ މޮޑްރިޗް ޖެހި ގޯލުންނެވެ. ރެއާލަށް އެއްވަރުކޮށްދިނީ އިތުރު ވަގުތުގެ ދެ ވަނަ މިނިޓްގައި ބްރެޒިލްގެ ދެ ކުޅުންތެރިންގެ ކޮމްބިނޭޝަނަކުން ޖެހި ގޯލަކުންނެވެ. ވިނީޝިއުސް ޖޫނިއާ ދިން ބޯޅައަކުން މި ގޯލު ޖެހީ މި ސީޒަނުގައި ރަނގަޅު ކުޅުމެއް ދައްކަމުން އަންނަ ޑިފެންޑަރު އެޑާ މިލިޓާއޯ އެވެ.
މި މެޗުގައި އަނިޔާވެގެން ބެންޒެމާ ވަނީ ބަދަލުކުރަން ޖެހިފަ އެވެ.
އެންމެ ފަހުން ބާސެލޯނާ ކުޅުނު ދެ މެޗުން ވެސް އިތުރު ވަގުތުގެ ދެ ހާފް ކުޅެގެން ވަނީ ބަލިވެފަ އެވެ. އެއީ ސްޕެނިޝް ސުޕަ ކަޕް ސެމީގައި ރެއާލް މެޑްރިޑް އަތުންނާއި ކޮޕަ ޑެލް ރޭގެ ގަދަ 16 ބުރުގައި އެތުލެޓިކް ބިލްބާއޯ އަތުންނެވެ. އެ ނަތީޖާ ތަކަށް ފަހު ޕޮޒިޓިވްކޮށް ކުރިއަށްދިއުމުގެ އަމާޒުގައި ރޭގެ މެޗަށް ނުކުމެ ލީގުގެ 19 ވަނައިގައި އޮތް އަލަވޭސް ކޮޅަށް ގޯޅެއް ޖަހަން ބާސެލޯނާ އިން ކުރި މަސައްކަތް ކާމިޔާބުވީ މެޗު ނިމެން ތިން މިނިޓަށް ވެފައި ހުއްޓަ އެވެ.
މެޗުގެ 87 ވަނަ މިނިޓްގައި ބާސެލޯނާ މޮޅުވި ގޯލު ޖަހައިދިނީ ޑި ޔޯން އެވެ. ރަނގަޅު ވަގުތުގައި ފެރާން ޓޮރޭޒް ދިން ބޯޅަ ޑި ޔޯން ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ.
