އޮސްލޯ، ނޯވޭ (ޖެނުއަރީ 23) - މިދިޔަ އޯގަސްޓް މަހު ވެރިކަމަށް އައި ފަހުން ތާލިބާނުންގެ ވަފުދެއް ފުރަތަމަ ފަހަރަށް ޔޫރަޕަށް ގޮސް، އަފްގާނިސްތާނުގެ އަމިއްލަ ޖަމިއްޔާތަކާ އެކު މަޝްވަރާ ފަށައިފި އެވެ.
ނޯވޭގެ ފޮރިން މިނިސްޓްރީން ބުނީ އެ ގައުމުގައި ކުރިއަށްދާ މަޝްވަރާގައި ފޯކަސް ކުރާނީ އިންސާނީ ހައްގުތަކަށް ކަމަށެވެ. ތާލިބާން ވަފްދުގެ ވެރިޔަކީ ފޮރިން މިނިސްޓަރު އާމިރް ހާން މުއްތަގީ އެވެ.
ތިން ދުވަހުގެ ދަތުރުގައި ފުރަތަމަ ދުވަހުގެ މަޝްވަރާ ހާއްސަ ކުރާނީ އަންހެން އެކްޓިވިސްޓުންނާއި ނޫސްވެރިންނަށެވެ. ހޯމަ އަދި އަންގާރަ ދުވަހު އޮންނާނީ ހުޅަނގުގެ ޑިޕްލޮމެޓުންނާ ބައްދަލުކުރުމެވެ.
ނޯވޭ މެދުވެރިވެގެން އިންތިޒާމް ކުރި މަޝްވަރާތައް ކުރިއަށް ދަނީ އޮސްލޯގެ ސޮރިއާ މޮރިއާ ހޮޓަލުގައި އެއްވެސް މީޑިއާއަކަށް ދައުވަތު ދިނުމެއް ނެތި އެވެ.
ތާލިބާނުން ވެރިކަމަށް އައުމާ އެކު އަފްގާނިސްތާންގެ އިންސާނީ ހާލަތު ވަނީ ވަރަށް ބޮޑަށް ގޯސްވެފަ އެވެ. އެގޮތަށް ދިމާވީ ކުއްލިއަކަށް ބައިނަލްއަގްވާމީ އެހީތައް މެދުކަނޑާލައި، އެ ގައުމުގެ ފައިސާ ހިފެހެއްޓުމުންނެވެ.
މިހާތަނަށް އެއްވެސް ގައުމަކުން ތާލިބާން ސަރުކާރު ބަލައިގެންފައެއް ނުވެ އެވެ. ނަމަވެސް ތާލިބާނުން ވަނީ އެ ސަރުކާރު ބަލައިގަތުމަށް އިސްލާމީ ގައުމުތަކަށް ބާރު އަޅާފަ އެވެ.
