ޑުއާލާ، ކެމަރޫން (ޖެނުއަރީ 23) - ގަތަރު ވޯލްޑް ކަޕްގެ ޖާގައެއް ހޯދަން މިސްރުގެ ކެޕްޓަން މުހައްމަދު ސަލާހު، އޭނާއާ އެ ކްލަބް، ލިވަޕޫލަށް ކުޅޭ ސަޑިއޯ މާނޭ ކުޅެމުން އަންނަ ސެނެގާލާ ދެކޮޅަށް ކުޅެން ޖެހިއްޖެ އެވެ.
މި އަހަރު ނޮވެމްބަރު/ޑިސެމްބަރުގައި ގަތަރުގައި. ބާއްވާ ފީފާ ވޯލްޑް ކަޕަށް ކޮލިފައިވާން އެފްރިކާގެ ޕްލޭއޮފް ބުރުގައި ސެނެގޯލާއި މިސްރު ކުޅެން ޖެހުނުއިރު، އިނގިރޭސި އަދި އެފްރިކާގެ މީޑިއާތަކުން ސިފަކުރަނީ މިއީ ސަލާހާއި މާނޭގެ ކުރިމަތިލުމެއްގެ ގޮތުގަ އެވެ. ސަލާހު މިސްރު ލީޑުކުރުމުގެ ޒިންމާއާ ހަވާލުވެހުރިއިރު، ސެނެގާލްގެ ކެޕްޓަން ކަލީދޫ ކުލިބާލީ ނެތް ހާލަތެއްގައި އެ ޓީމުގެ ކެޕްޓަން ބޭންޑް އަޅަނީ މާނޭ އެވެ.
ޕްލޭއޮފް މެޗުތައް އޮތީ އަންނަ މާޗް މަހުގެ ފީފާ ކަލަންޑަރު ދުވަސްތަކުގަ އެވެ. ގަތަރު ވޯލްޑް ކަޕުން ސަލާހާއި މާނޭ ތެެރެއިން އެއް ކުޅުންތެރިއަކަށް ފުރުސަތު ލިބޭއިރު، މިއީ އެ ދެ ކުޅުންތެރިން ވެސް ކެރިއަރުގައި އެންމެ ޕީކުގައި ތިބި ދުވަސްވަރެވެ. އެހެންކަމުން ވޯލްޑް ކަޕުން ފުރުސަތު ނުލިބޭ ކުޅުންތެރިއަކަށް އެ ގެއްލެނީ ބޮޑު ފުރުސަތެކެވެ.
ސެނެގާލާއި މިސްރު އެންމެ ފަހުން ބައްދަލުކުރީ 2014 ވަނަ އަހަރު އެވެ.
ޕްލޭއޮފްގެ ދެން ހުރި މެޗުތަކަށް ބަލާއިރު، ކެމަރޫން ކުޅޭނީ އަލްޖީރިއާއާ އެވެ. ގާނާ އިން ނައިޖީރިއާއާ ބައްދަލުކުރާއިރު، ކޮންގޯ ކުޅޭނީ މޮރޮކޯއާ އެެވެ. އަދި މާލީ ނުކުންނާނީ ޓިއުނީޝިއާއާ ދެކޮޅަށެެވެ.
ސަލާހާއި މާނޭ އަންނަނީ މިހާރު ކެމަރޫންގައި ކުރިއަށްދާ އެފްރިކަން ކަޕް އޮފް ނޭޝަންސްގައި ވާދަކުރަމުންނެވެ. ސެނެގާލާއި މިސްރުން ގަދަ 16 ބުރުގެ މެޗުތަކުގައި އަންނަ އަންގާރަ އަދި ބުދަ ދުވަހު ވާދަކުރާނެ އެވެ. މިސްރު ކުޅޭނީ މެޗަކުން ބަލިނުވެ ދެ ވަނަ ބުރަށް އައި އައިވަރީ ކޯސްޓާ އެވެ. ސެނެގާލް ކުޅެން އޮތީ ކޭޕް ވާޑޭ އެވެ.
