ށ. އަތޮޅަށް ތަރައްގީ އެނގުނީ މި ސަރުކާރުގެ ސަބަބުން ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް މުހައްމަދު ރާޝިދުގެ ކެމްޕޭނަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އާއި މިނިސްޓަރު މާރިޔާ އާއި އެމްޑީޕީގެ ޗެއާޕާސަން ހަސަން ލަތީފް އަދި އެމްޑީޕީގެ ބައެއް މަޖިލީސް މެންބަރުންނާއި ޕާޓީގެ އިދާރީ މުވައްޒިފުން ވަނީ ވަޑައިގެންފަ އެވެ.
ރާޝިދުގެ ކެމްޕެއިން ޖަލްސާ ފޯކައިދޫގައި މިހާރު ކުރިއަށްދާއިރު އެ ޖަލްސާގައި ވާހަކަ ދައްކަވަމުން މިނިސްޓަރު މާރިޔާ ވިދާޅުވީ އެމްޑީޕީއަކީ ރައްޔިތުންނާއި ގާތުން ރައްޔިތުންނަށް ހިދުމަތް ދިނުމަށް ވިސްނާ ޕާޓީއެއް ކަމަށެވެ.
އެމްޑީޕީއަކީ ލާމަރުކަޒީ އުސޫލަށް ރާއްޖެ ހިންގަން ވިސްނި އަދި މިހާރުވެސް ވިސްނާ ހަމައެކަނި ޕާޓީ ކަމަށް މާރިޔާ ވިދާޅުވި އެވެ. އެގޮތުން މި ސަރުކާރު އައުމުގެ ކުރިން ށ. އަތޮޅުގެ ރައްޔިތުންނަށް ތަރައްގީއަކީ ކޯއްޗެއް ކަންވެސް އެނގި ނުލައްވާ ކަމަށް މާރިޔާ ވިދާޅުވި އެވެ.
"މި ސަރުކާރު އަޅުގަނޑުމެންނާ ހަވާލުވިއިރު ށ. އަތޮޅުގެ ކަންކަން އަޅުގަނޑުމެން ފަށައިގަންނަން ޖެހުނީ އަލިފުންނޭ ދެންނެވިޔަސް ދޮގަކަށް ނުވާނެ. އޭރު ރައްޔިތަކަށްވެސް ނޭންގޭ ތަރައްގީއަކީ ކޯއްޗެއް ކަމެއް. އެންމެ ކުޑަވެގެން މެމްބަރެއް އައީމަ އާދޭސް ކުރަމުން ދަނީ ދައުލަތުން ކުރަން ޖެހޭ ކަންކަން ކުރުމަށްޓަކައި ވެސް. ޖަނަރޭޓަރެއް ލިބިދާނެތޯ، ފެނުގެ ވާހަކަ ދައްކަން ހިތައްވެސް ނާރާ. ސާފު ފެނަކީ ކޯއްޗެއް ކަންވެސް ނޭންގޭ. އެއީ ވެސް ލިބެން ޖެހޭ އެއްޗެއްގެ ގޮތުގައި އާދޭސް ދަންނަވައިގެން ސަލާން ޖަހައިގެން ހޯދަން ޖެހެނީ،" މާރިޔާ ވިދާޅުވި އެވެ.
އޭގެ އިތުރުން މާރިޔާ ވިދާޅުވީ އެމްޑީޕީން އެ ދާއިރާގައި ހިންގަމުންދާ ގިނަ މަޝްރޫއުތަކުގެ ވާހަކަ އިވުމުން ހައިރާންވެވަޑައިގެންނެވި ކަމަށެވެ. ސަރުކާރުގައި އުޅުއްވި ނަމަވެސް އެހާ ގިނަ މަޝްރޫއުތައް ހިންގާކަން އެނގި ނުލައްވާ ކަމަށް ވެސް މާރިޔާ ވިދާޅުވި އެވެ.
"އަޅުގަނޑަށް ހަމަ ޔަގީން. މި ސަރުކާރުން ރާއްޖޭގެ އެކި ތަންތާ އެ ހިންގަމުން ގެންދާ ގިނަ މަޝްރޫއު ތަކުގެ އަދަދު ކުރަންވެސް،" މާރިޔާ ވިދާޅުވި އެވެ.
ކޮމަންޑޫ ދާއިރާގެ އިންތިހާބުގެ ފޯރި ވަރަށް ބޮޑަށް ގަދަވެފައިވާއިރު ސަރުކާރުން ވަނީ އެ ދާއިރާގައި މިއަހަރު ގިނަ މަޝްރޫއުތަކެއް ފެށުމަށް އިއުލާންކޮށްފަ އެވެ. އެއީ އިންތިހާބާ ދިމާކޮށް ކުރިއަށް ގެންދާ މަޝްރޫއުތަކެއް ކަމަށް އިދިކޮޅު ފަރާތްތަކުން ބުނި ނަމަވެސް އެ މަޝްރޫއުތައް ކުރިއަށް ގެންދާނެ ކަމަށް ރައީސް ސޯލިހް ވަނީ ވިދާޅުވެފަ އެވެ.
އެގޮތުން މިހާރު ވަނީ ދެ ކޮމަންޑޫ ގުޅާލުމުގެ މަޝްރޫއު އާއި އެ ދާއިރާގެ ރަށްތަކުގެ ބަނދަރު ހެދުންފަދަ ގިނަ މަޝްރޫއެއް ވަނީ ފަށައިފަ އެވެ.
