ނުކުއަލޮފާ، ޓޮންގާ (ޖެނުއަރީ 22) - ޓޮންގާގައި އަލިފާން ފަރުބަދައެއް ގޮވައި އެރި ސުނާމީއަށް ފަހު ލިބުނު ގެއްލުމުން އަރައިގަނެ ގައުމު އަލުން ބިނާކުރަން ތައްޔާރަށް ތިބި ކަމަށް އެ ގައުމުގެ ރައްޔިތުން ބުނެފި އެވެ.
އދ. އިން ބުނި ގޮތުގައި މިދިޔަ ހަފްތާގައި ހުންގާ ޓޮންގާ ހުންގާ ހާއަޕައި އަލިފާން ފަރުބަދަ ގޮވުމަށް ފަހު، އުފެދުނު ސުނާމީގެ އަސަރު ޓޮންގާގެ އާބާދީގެ 80 ޕަސެންޓް މީހުންނަށް ކުރި އެވެ.
އަލިފާން ފަރުބަދައިން ބުރައިގެން ދިޔަ ވިހަ ދުމުގެ އަސަރު ބޯފެނަށް ކޮށްފައި ވާއިރު، ދަނޑުތައް ހަލާކުވެ، ދެ އަވަށް އެއްކޮށް ދޮވެވިފައިވާ ކަމަށް ރިޕޯޓުތައް ބުނެ އެވެ.
ޓޮންގާ އާއި ދުނިޔޭގެ އެހެން ގައުމުތަކާ ދެމެދު މުއާސަލާތީ ހިދުމަތް ގުޅާލަދޭ ކަނޑު އަޑީގެ ކޭބަލްތައް ހަލާކުވެފައި ވާތީ، އެހީ ފޯރުކޮށްދިނުމުގެ މަސައްކަތަށް ވަނީ ވަރަށް ބޮޑަށް ހުރަސް އެޅިފަ އެވެ.
ނަމަވެސް ޓޮންގާގެ ނޫސްވެރިންނާ ހަވާލަދީ ބައިނަލްއަގްވާމީ ނޫސްތަކުން ބުނީ އެ ގައުމުގެ ރައްޔިތުން ތިބީ ގައުމު އަލުން ބިނާކުރުމުގެ މަސައްކަތަށް ތައްޔާރަށް ކަމަށެވެ.
އަލިފާން ފަރުބަދަ އަދިވެސް ގިނަ ދުވަސްތަކަކަށް ހަރަކާތްތެރިވާނެ ކަމަށް ސައިންޓިސްޓުން ލަފާކުރެ އެވެ. ގުދުރަތީ ކާރިސާތަކުގެ ނުރައްކާ ތިން ވަނަ އަށް އެންމެ ބޮޑު ގައުމަކީ ޓޮންގާ އެވެ.
އެ ނުރައްކާ ދުވަހަކަށް ވުރެ ދުވަހެއް ބޮޑުވަމުން ދިޔަ ނަމަވެސް. ގައުމު ދޫކޮށް ދާން ޓޮންގާގެ ރައްޔިތުން ބޭނުން ނުވާ ކަމަށް އެ ގައުމުގެ ނޫސްވެރިން ވަނީ ބުނެފަ އެވެ.
މިހާތަނަށް ޓޮންގާ އަށް އެހީ ފޯރުކޮށްދީފައި ވަނީ ޖަޕާން، ނިއުޒީލޭންޑް އަދި އޮސްޓްރޭލިއާ އިންނެވެ. ނަމަވެސް ކޮވިޑްގެ ސަބަބުން ވެސް އެހީގެ މަސައްކަތަށް ދަނީ ހުރަސް އެޅެމުންނެވެ.
ޓޮންގާ އަކީ މި ވަގުތު "ކޮވިޑް ފްރީ" ނުވަތަ އެއްވެސް ވަރަކަށް އެ ބަލި ނެތް ގައުމެކެވެ. އެގޮތަށް ދެމި އޮތުމަށް ސަރުކާރުން ވަނީ ގިނަ ފިޔަވަޅުތަކެއް ވެސް އަޅާފަ އެވެ.
ޖަޕާނުން ބޯފެނުގެ ސަޕްލައި ފޯރުކޮށްދެމުން ދާއިރު، ކާރިސާގައި އުފެދިފައިވާ ކުނިތައް ސާފުކުރާނެ ބޮޑެތި އުޅަނދުތައް ފޮނުވަން ވަނީ ތައްޔާރުކޮށްފަ އެވެ.
ނިއުޒީލޭންޑުން ވަނީ އެހީގެ ގޮތުގައި ބޮޑެތި ހެލިކޮޕްޓަރުތަކާއި ފެނާއި، ކިރު އަދި އިންޖިނަރިން އަށް ބޭނުންވާ ތަކެތި ފޮނުވަން ތައްޔާރުކޮށްފަ އެވެ.
ޓޮންގާގެ ސަރުކާރުން ވަނީ އެ ގައުމުގައި އެއް މަސް ދުވަހަށް ކުއްލި ނުރައްކަލުގެ ހާލަތު އިއުލާނުކޮށްފަ އެވެ. އެ ގައުމުގެ މުއާސަލާތީ ގުޅުން އަލުން ގާއިމްކުރަން ވެސް އެއް މަސް ނަގާނެ ކަމަށް ބެލެވެ އެވެ.
